Dăk Lăk lời mờr 186 tơmàn đong nàng bơtàu tơnguh niam chài nam 2026 nàng bơcri priă lơh tàm 102 sàh, sơnah ƀòn. Bơta pa là gơnoar atbồ kấp sàh geh rcang lài mat, khà priă bơcri mờ yal mờ Mpồl duh broă Làng bol dùl kấp bal lơh nền, ai lơh lài tàm tiah sar lơgar ngài, tiah làng bol jơi bơtiàn dồ ết nă cau gam ờ tơl phan bơna bơt bơtàu niam chài.

Tàm kấp càr, mờr 80 tơmàn đong geh ai 6 rơndăp broă lơh in, geh lơh niam wơl Hìu ơn prăp phan kwơ yau Dăk Lăk, Hìu sền sră Hải Phú, lơh niam wơl Hìu niam chài Diên Hồng, ƀlàng Hìu ơn prăp phan kwơ yau Phú Yên mờ lơh niam wơl 2 tiah tềl lời wơl kah yau dà lơgar. Broă lơh tơrgum bơtàu tơnguh phan bơna bơt bơtàu niam chài, lơh sa măi mok niam chài, mơkung prap gàr bơhiàn niam chài is ală jơi bơtiàn dê. Tàm hơ̆, ală bơta geh ai lơh lài lơh sir là anih tờm niam chài, hìu niam chài sàh mờ hìu niam chài mpồl bơtiàn. Broă tam pà kấp bơta pràn geh kơ̆p kơnờm bơtàu tơnguh rài kis nùs nhơm, tơrmù ƀà bơta ngài dờp lèng niam chài đah ală tiah dê. Ală sàh pal ngui priă di jơnau kờñ, geh cồng nha, pleh bơcri priă lềng làng, pơhì pơhà.