Là dùl tàm ală jơi bơtiàn bơh càr ndai tus ơm kis lơh sa tàm càr Dăk Lăk, mpồl bơtiàn kòn cau Thái tàm xã Hoà Phú uă ngan là tus bơh ală càr tiah đah tô mat tơngai mŭt dà lơgar, bè: Sơn La, Lai Châu...Tŭ do, xã Hoà Phú geh mờr 600 hìu kòn cau Thái bal mờ rlau 2 rbô nă cau. Ală nam rềp ndo, rài kis lơh sa, mpồl bơtiàn bơh làng bol dê ngai sơlơ kơ̆ kơl jăp. Khi kung gam prăp gàr  sùm ală bơhiàn niam chài pơnrơ is ngan bơh kòn cau he dê tàm ală dơ̆ sa tềp, lơh yàng lơh chờ.

Mpồl niam chài bơh yau kòn cau Thái geh tơlik măt bal mờ mờr 30 nă cau tàm mpồl là làng bol kòn cau Thái geh bơta kờñ gơboh mờ kờñ ngan prăp gàr niam chài bơh yau ờs mờng jơi bơtiàn dê gam ơm kis tàm xã Hoà Phú. Broă tơlik măt mpồl nàng kờñ prăp gàr ală bơta niam chài bơh yau bè niam chài tam ya lì kòn cau Thái, dà đơs, akhar cih, phan ngui soh, ală dơ̆ lơh yàng lơh chờ. Bơh hơ̆ lơh geh anih nhơl niam mờ là tiah pơrjum cribơyai ai làng bol kòn cau Thái dê tàm ù tiah càr đơs bal mờ ƀòn dờng Buôn Ma Thuột đơs is.