Drim ngai 08/3, tàm xã Trường Hà, kơnhoàl Hà Quảng, càr Cao Bằng bơyai lơh bơhiàn lơh yàng ai dà tàm dà croh Lê Nin, ngan ngồn mut lơh chờ rê hờ tơngu rơyas Pác Bó nam 2024. Di dơ̆ do, càr Cao Bằng dờp Kơrnuat yal Phan lời wơl niam chài ờ di phan bơna dà lơgar mờ “Broă lơh tàñ ồi kòn cau bơh cau Tày dê”.

Bal mờ hơ̆, rơ gồng Ngườm Gảng mờ Hìu duh khoai Nùng Trí Cao kung geh sap sèng tiah tềl kah yau kâp càr. Bơhiàn lơh yàng ai dà bồ tô Pác Bó mờ rò dà ờ mìng ai tơnggŏ bơhiàn hùc dà kah tô dà bơh jơi bơtiàn dê mờ gam là dùl bơta niam chài cèng bơta krơi is ƀòn lơgar dê. Bơhiàn lơh yàng sơn đờm ai broă lơh chờ rê hờ tơngu rơyas Pác Bó nam 2024. Tàm dơ̆ lơh chờ gam geh Dơ̆ pơrlòng kơnrồ nam pa; pơrlòng ntoat “Rê hờ tơngu rơyas Pác Bó” nam 2024; ù tiah yal tơnggit niam chài, phan sa bơh ală xã, thị trấn dê; ràng tơlik rùp niam chài cau Nùng Vẻn.