Lơh jăt Jơnau lơh nền tàm pơrjum sồ 08 nam 2021 bơh Mpồl duh broă Làng bol càr Dăk Lăk dê bè broă dong kờl bơtàu tơnguh lòt nhơl mpồl bơtiàn tàm ală thôn, ƀòn làng bol jơi bơtiàn ờ gal cau tơngai bơh nam 2021 tus 2025, tàm 3 nam do, càr Dăk Lăk neh dong kờl 5 ƀòn mờ 22 hìu nhă, mờ kờp jơh priă tă mờr 4 tơmàn 200 tơlăk đong. Bơta pràn mìng geh bơcri tàm broă lơh phan bơna, ù tiah niam, jơnau cih bơto sồr, hìu jă brê, ƀlàng ơn rơndeh, phan soh, phan uh mờ phan teh nàng lơh.

Broă dong kờl lài ngan neh ai tơl bơta niam nàng làng bol tus bal ai broă drơng ala lơh hìu ơm, phan sa, lơh bơta niam chài mờ bơto sồr lơh. Mơya, bơnah uă broă lơh gam dềt; phan geh lơh đah ală ƀòn gam gơtìp ndrờm bal, pơgồp bal mờ mpồl lơh sa kă bro lòt nhơl ờ hềt nền nòn. Khà cau năc mờ priă geh ờ hềt kơl jăp, lơh kal ke ai broă lơh niam wơl phan bơna broă lơh, bơcri priă tai mờ lơh geh sùm broă lơh tơnơ̆ mờ tŭ tơn jơh broă dong kờl. Mò H’ Zuni Niê, Bí thư Chi bộ ƀòn lòt nhơl mpồl bơtiàn Akŏ Dhông đơs là, broă dong kờl pa pal geh lơh broă bal jŏ jòng rơlao mờ mpồl bơtiàn. “Jơnau lơh nền tàm Pơrjum sồ 08 nam 2021 bơh Mpồl duh broă Làng bol càr là tơngu me tờm kwơ màng lài ngan nàng bơtàu tơnguh lòt nhơl mpồl bơtiàn, bơh ală ơdŭ bơto lòt nhơl tus mờ broă dong kờl lơh phan bơna, là bơta pràn dờng ngan nàng làng bol bơtàu tơnguh is lòt nhơl. Kơ̆p kờñ là broă dong kờl tơngai bơh nam 2026 tus 2030 rơ̆p lơh gơs rơlao bè kơrnoăt boh lam, ờ mìng dong kờl dùl dơ̆ mờ rơ̆p pơn jăt tai geh dong kờl sùm; geh ală broă dong kờl mùl màl rơlao gơwèt mờ ală làng bol gam prăp gàr hìu jòng, ală cau chài dròng cing ha là cau chài tàñ ồi yau”.

Tàm pơrjum, ală cau ala măt Mpồl duh broă Làng bol càr Dăk Lăk kung đơs uă jơnau, jơnau dan bè broă dong kờl tơngai bơh nam 2026 tus 2030 tam gơl bơh broă dong kờl tơl gah broă lơh tus mờ lơh broă bal tàm jơh tơngai lơh gơs phan, bơyai lơh broă mờ tìp bal drà kă bro. mờ bơsong ală gơkòl bè ù tiah, priă càn mờ phan bơna dong kờl, pal lơh loh kơnòl atbồ, lơh niam wơl broă lơh; tơnguh uă jơnau git wă mờ bơta pràn pơgồp bal nàng làng bol mùl màl lơh tờm broă lòt nhơl.

Jơnau đơs pơn dŭt dơ̆ pơrjum, mò Cao Thị Hoà An, Phó Bí thư Duh broă sùm Tỉnh ủy, Chủ tịch Mpồl duh broă Làng bol càr Dăk Lăk sồr Anih duh broă Làng bol càr mhar kơlôi sơnơng geh kơrnoăt boh lam pa ala Jơnau lơh nền tàm Pơrjum sồ 08 bè broă dong kờl bơtàu tơnguh lòt nhơl mpồl bơtiàn tàm ală thôn, ƀòn làng bol jơi bơtiàn ờ gal cau. “Añ sồr Anih duh broă Làng bol càr pal kơlôi sơnơng, pơlam nàng lơh geh kơrnoăt boh lam pa ala jơnau lơh nền tàm pơrjum lài do. Ală kal ke, gơkòl, ờ di pal den he pal geh gùng dà broă lơh nàng lơh niam rơlao. Ai làng bol, mpồl lơh sa kă bro lơh tờm nàng lơh pràn broă pơgồp bal đah mpồl lơh broă bal lòt nhơl mpồl bơtiàn mờ mpồl lơh sa kă bro lòt nhơl; bơto bơtê tơn bè jơnau git wă, dà đơs lơgar bơdìh, phan sa nàng làng bol lơh mpồl ai broă lơh drơng ala tơn”.