Trồ mang ngai lồi poh, hìu niam chài mpồl bơtiàn ƀòn Dăk Ndrung, sàh Đức An, càr Lâm Đồng mpong săp cing, bơh tàm broă trao cing tus mờ broă dròng bè lơi nàng di. Bơh tơl dơ̆ bơsram, săp dròng cing rơhời ring tê bal. Lŏ Thị Hợi, chờ hờp pà git: “Lài mờ tŭ bơsram, añ kơlôi dròng cing kal ke ngan. Mơya tus bal bơsram mờ ơdŭ do, añ gŏ ờ kal ke bè añ neh geh tŭ kơlôi. Tus tŭ do, añ neh dròng git pe jơnau cing tờm. Chờ hờp ngan tài añ neh git dròng cing. Añ rơ̆p lơh ngan bơsram tai nàng pơgồp bal tàm broă prăp gàr bơta niam chài kòn cau añ dê”.

Ơdŭ bơto dròng cing lài ngan geh broă dong kờl bơh gơnoar atbồ sàh Đức An bal mờ gah niam chài càr Lâm Đồng dê. Tơnơ̆ mờ ơdŭ bơsram tơn jơh, ală oh mi cau ùr kung gam geh sùm dơ̆ bơsram tàm hìu niam chài ƀòn Dăk Ndrung. Ndrờm bal sùm tàm ală trồ mang ngai lồi poh, oh mi cau ùr neh rơndăp wơl broă lơh tàm suơn tàm mìr, broă hìu nàng tus bal bơsram tơl jơnau dròng cing, tàm bơto bal tơl dơ̆ dròng. Ală dơ̆ bơsram hơ̆ neh dong kờl săp dròng cing rơhời gơs mờng ngan, gơmŭt jrô tàm rài kis ƀòn lơgar dê. Mò Điểu Thị Huế, Phó Bí thư Chi bộ, Lam bồ broă Măt trận ƀòn Dăk Ndrung pà git: “Trồ ngai, oh mi cau ùr lòt lơh broă, drơng broă hìu nhă. Tus trồ mang den tơrgùm tàm hìu niam chài nàng bơsram dròng cing. Cau lơi kung chờ hờp lơm. Kơnờm mờ broă sền gròi, dong kờl mờ ai tơl bơta niam bơh Sờh, Cơl dŭ lơh broă Niam chài, làng bol bol añ geh tai bơta niam nàng prăp gàr mờ ngui ală bơta kwơ niam chài ờs mờng bơh jơi bơtiàn bol añ dê”.

Gơwèt mờ ală cau chài, broă bơto dròng cing ờ mìng là bơto tàm broă git dròng cing, mờ là jào wơl bơta kis, dong kờl rơnàng kơnòm să in git wă tơl jơnau dròng cing mpong săp tàm ală tŭ lơi, cèng geh bơta kwơ lơi, nàng bơh tŭ hơ̆ pơnyờ să git ngui tàm rài kis ƀòn lơgar. Bơh tơl dơ̆ bơsram dròng cing, cau chài Thị Dryan kơ̆p kờñ geh tai uă cau kơnòm să tus mờ cing mồng: “Sàh Đức An neh ai tơl bơta niam nàng ƀòn in pờ geh ơdŭ bơto dròng cing, nàng ală bơyô gam kơnòm să geh nùs nhơm gơboh kờñ tus bơsram. Bơh ơdŭ bơsram, bol añ kơ̆p kờñ bơto ală jơnau dròng cing yau nàng ală rơnàng kơnòm să in, nàng oh kòn, kòn sao ờ huĭ phan lời wơl mờ mò ồng neh prăp gàr bơh rài lài do”.

Nàng lam ală cau chài pơn jăt tai bơto ală bơta kwơ niam chài rơnàng kơnòm să in, tơnơ̆ mờ tŭ tơmŭt bal sàh, Anih duh broă Làng bol sàh Đức An neh tơlik Jơnau lơh nền tàm pơrjum nàng dong kờl pah nhai ai bàr nă cau chài tàm ƀòn Dăk Ndrung in. tàm hơ̆, cau chài Thị Phyơn, cau lam bồ Mpồl đơs jơnau pơn đik ờs mờng ƀòn Dăk Ndrung geh dong kờl 3 tơlăk đong pah nhai. Gơwèt mờ mò, do là broă sền gròi kwơ màng ngan tàm broă prăp gàr niam chài kòn cau Mnông dê: “Añ chờ hờp ngan mờ ưn ngài Đảng, Dà lơgar neh geh jơnau dong kờl añ in rơlao 3 tơlăk đong tàm 1 nhai. Do là bơta chờ dờng màng ngan nàng añ pơn jăt tai prăp gàr niam chài ờs mờng. Añ rơ̆p bơto sồr, bơto wơl broă dròng cing nàng rơnàng kơnòm să in, ai mpồl dròng cing cau ùr bơtàu tơnguh rơlao, nàng oh kòn pơn jăt tai prăp gàr phan lời wơl bơh mò ồng dê”.

Bơh ală bơta kwơ niam chài geh prăp gàr, sàh Đức An gam ai geh gùng dà bơ̆t bơtàu anih lòt nhơl mpồl bơtiàn tàm ƀòn Dăk Ndrung. Cau năc lòt nhơl rơ̆p geh dơ̆ nàng sền cing mồng, ală lơh chờ, broă tàñ ồi yau mờ phan sa kòn cau Mnông dê. Tàm hơ̆, hìu niam chài mpồl bơtiàn là anih lơh tờm, ràng tơlik ală phan ngui ờs mờng, yal bơta niam chài krơi is ƀòn lơgar dê mờ ală broă lơh niam chài lòt nhơl. Mò Thị Rơi, Bí thư Chi bộ ƀòn Dăk Ndrung pà git: “Broă lam sồr oh mi cau ùr, đoàn viên ơruh pơnu tus bal bơsram dròng cing ờ mìng kờñ prăp gàr niam chài mờ gam tơnguh broă pơgồp bal mpồl bơtiàn. Sàh neh bơcri priă lơh hìu niam chài pa ai ƀòn in, ai tơl bơta niam nàng làng bol in pơrjum, bơsram dròng cing. Bol añ kơ̆p kờñ ai ală phan ngui tàm rài kis ờs mờng tus nàng ràng tơlik tàm do, nàng rơnàng kơnòm să wă rơlao bè niam chài jơi bơtiàn dê”.

Bơh ală mpàng tê neh plào tài broă lơh tàm suơn tàm mìr, ală cau ùr kòn cau Mnông tàm ƀòn Dăk Ndrung gam bơto, prăp gàr huềng ai săp dròng cing ƀòn lơgar in. Ồs tàm hìu niam chài mpồl bơtiàn kung gam hìt sùm pah mang lồi poh, săp dròng cing mpong sùm ai bơta niam chài ƀòn lơgar brồ guh bal mờ bơta bơtàu tơnguh ƀòn lơgar sàh Đức An, càr Lâm Đồng dê.