Ngai chờ Niam chài ală jơi bơtiàn dồ êt nă cau càr Gia Lai nam 2025 digơlan bơtòm tơrgùm rlau 700 nă cau chài tàm 17 kơnhoàl, ƀòn drà dờng mờ ƀòn dờng tàm càr dê. Ù tiah ngai chờ gơklŏ gơcrà rùp să niam chài bal mờ ală broă lơh lơh tơngŏ wơl ơm kis mpồl bơtiàn, soh phan, đơs crih tam ya, trŭ gơm phan sa ờs mờng bơh yau mờ ală jơnau nhơl làng bol rài yau dê; ală cơldŭ phan bơkah ƀòn lơgar dê bè kơphê, tơrnờm, piang ding (piang prùng), puăc buh…pơgồp bơnah yal uă bơta bềng lìu mờ rơ̆ ru niam chài bơh làng bol ală jơi bơtiàn tàm càr dê.

Cau chài ồng Nay Ka tàm ƀòn Phu Ama Nhuer 2, sàh Ia Rtô, ƀòn drà dờng Ayun Pa pà gĭt: Nam do, mpồl cau chài ƀòn drà dờng Ayun Pa geh 46 nă cau rơ̆p tus bal uă tơngume krơi is ngan bè dròng cing jañ mồng, tàñ ồi yau, tus bal ală jơnau nhơl làng bol rài yau dê.