Tàm ù tiah kơh bơnơm Langbiang dờng ơning ơnàng jơnhua 1 rbô 500 thơk pơndrờm mờ mat dà lềng, Dà Làc geh trồ tiah ai pà nhơm mrềt lơngờm gùt nam, ù tiah brê bơnơm hàng niam, gơ gơs là anih tus lơngăp lơngai, gơ kờñ ngan bơh nac lòt nhơl tàm lơgar mờ dunia dê. Là ù tiah ơm kis jŏ rài bơh cau K’Ho dê, tàm ală nam lồi rài XĨ, cau Tây neh tus ù tiah do lơh ƀòn dờng ơm rlô să, tơnơ̆ hơ̆ gơ hòi gơ jà uă mpồl cau ơm kis tàm uă rài. Bơh bơta tàm bơrlŭ bal ală rài niam chài neh lơh gơlik bơta krơi is tàm mờng kwèng rài kis bơh cau Dà Làc tŭ do dê.

Bơh 130 nam crơng gơs mờ bơtàu tơnguh, muh mat tiah drà Dà Làc, Lâm Đồng neh geh bơta tam gơl uă ngan, lơh sa- mpồl bơtiàn bơtàu tơnguh, lơngăp lơngai dà lơgar geh gàr kơ̆, bơta git gơp lơh broă mờ lơgar ndai geh rề ơnàng. Bơdìh mờ bơta pràn bè bơtàu tơnguh lơh sa suơn sre ngui măi mok pa, lòt nhơl neh gơ gơs là gah lơh sa tờm ngan. Pal đơs là Dà Làc neh gơtùi ngui niam bơta niam chài jơi bơtiàn, gơ jat bal mờ mờng kwèng rài kis cau Dà Làc dê là “sơrmah sơrmài- niam chài – kờñ nac”.

Ồng Đặng Quang Tú, Củ tịc Ủy ƀan Ñân zân ƀòn dờng Dà Làc đơs nền, ală cồng nha pơn rơ pal pơn iờ să ngan bơh ƀòn dờng dê, hơ̆ là neh gơ gơs Anih tờm lòt nhơl tiơng pơn rơ tàm lơgar mờ dunia, ƀòn dờng Festival bơkàu mìng dùl lơm bơh lơgar Việt Nam dê, Ƀòn dờng ngac ngar, Ƀòn dờng bơceh gùng đơs crih bơh UNESCO dê mờ tŭ do gam pơn jat tai lơh ngan bơt bơtàu tiah drà phan lời wơl dunia. Ờ mìng bè hơ̆ lơm gời, Dà Làc gam geh 2 dơ̆ dờp là “Ƀòn dờng lòt nhơl sàng goh ASEAN” mờ là dùl tàm ală anih tus niam ngan rlau jơh câu Á. Ồng Đặng Quang Tú đơs nền: “Nam 2014, Thủ tướng Cíñ phủ tơlik Kơrnuat sồ 704, kung bè Nghị quyết sồ 04 bơh Tỉñ ủy càr Lâm Đồng dê neh git nền jơnau kờñ: Bơt bơtàu Dà Làc gơ gơs là tiah drà tam gơl pa, ƀòn dờng bơceh lơh, là anih tờm lòt nhơl ù tiah brê bơnơm, ơm rlô să dờng màng, lòt nhơl niam chài phan lòt wơl kâp dunia niam ngan, là anih tờm niam chài, đơs crih tamya, tàp pràn să jan mờ lơh prài bồ tơngoh kâp kơnhoàl ù tiah; dùl anih tus pơn rơ ngan lời ai bơta bơceh mờ bơyai lơh niam chài đơs crih tamya in. Tềng đap ală tŭ niam mờ bơta ƀuơn pa, Đảng ƀộ, gơnoar atbồ mờ làng bol ƀòn dờng Dà Làc rơp tam klac bal dùl nùs, lơh ngan tam gơl pa, bơsram đòm jat, geh kơnòl nàng lam lơh jat ngan ngồn bơta kơp kơnờm bơtàu tơnguh, kah ưn ngài dà kơl hề dờng màng bơh ală rài bèp bi dê neh geh màng jòi rồ, bơt bơtàu mờ bơtàu tơnguh ƀòn dờng do”.

Đơs tàm dơ̆ bơyai lơh tơngkah kir sơnrai 130 nam Dà Làc crơng gơs mờ bơtàu tơnguh, Phó Thủ tướng Cíñ phủ Lê Minh Khái neh cih dờp mờ jờng rơ ală cồng nha geh pơn rơ mờ Đảng ƀộ, gơnoar atbồ, ling klàng mờ làng bol ală jơi bơtiàn ƀòn dờng Dà Làc đơs is, càr Lâm Đồng đơs bal neh lơh geh tàm tơngai lài, tă pơgồp kuơmàng ngan tàm cồng nha bal bơh dà lơgar dê.

Mờ bơta kơp kờñ ngan bal mờ bơta pin dờn bè dùl ƀòn dờng Dà Làc gàr bơta hàng niam geh is, ờs mờng bơh yau mơya sùm tam gơl pa, bơceh, bơtàu tơnguh ngai sơlơ niam chài, tam gơl pa, niam rlau tàm tơnơ̆ do, Phó Thủ tướng sồr Đảng ƀộ, gơnoar atbồ, làng bol ƀòn dờng Dà Làc pal sơlơ chồl pràn rlau tai bơtàu tơnguh lơh sa- mpồl bơtiàn mờ jơnau đơs ai làng bol lơh tờm; làng bol ờ mìng là jơnau kờñ mờ gam là cau tờm, là bơta gơn kơnờm, là cau geh dờp kuơ bơh cồng nha bơtàu tơnguh. Phó Thủ tướng đơs nền: “Añ sồr Đảng ƀộ, gơnoar atbồ, làng bol ƀòn dờng Dà Làc pal pơn jat tai sền gàr, bơt bơtàu mpồl tam klac dờng jơi bơtiàn; ngai sơlơ tơnguh pràn jak đơng lam bồ mờ bơta pràn lơh broă bơh Mpồl lơh broă Đảng, đảng viên dê; lơh kơ̆ bơta tam klac bal, ring bal tàm Đảng ƀộ mờ jơh gùt anih lơh broă cíñ trị, lơh gơlik bơta ring bal bơh ală rơnàng làng bol dê. Lơh gơs bơta li la, hòi jà uă ngan rlau jơh, geh cồng nha ală bơnah priă jền tă pơgồp bơh mpồl bơtiàn mờ kràñ cê rlau tai tàm broă bơcri priă bơtàu tơnguh phan bơna ndrờm bal, dipal, geh cồng nha, ngan là ală rơndap broă lơh phan bơna kuơmàng, phan bơna niam chài, bơto bơsram, lơh sơnơm, phan bơna tam gơl sồ, bơt bơtàu ƀòn dờng ngac ngar, pơgồp bơnah ai Dà Làc gơ gơs là dùl tiah bơtàu tơnguh kuơmàng bơh kơnhoàl ù tiah, bơh dà lơgar dê, anih tàm tơrbŏ bal kuơmàng mờ ală lơgar rềp bal mờ dunia”.

Phó Thủ tướng kung tơngkah, Dà Làc pal pơn jat tai gàr sùm khà jờng mat tiơng pơn rơ ƀòn dờng Festival bơkàu Dà Làc; ngui ală bơta pràn mờ bơta ƀuơn, bơcri priă bơtàu tơnguh lòt nhơl geh bơta niam uă; bơtàu tơnguh lơh sa suơn sre ngui măi mok pa jat gùng dà tơlir, sàng goh, jŏ jòng sùm, đềt mềr mờ tiah ơm kis; lơh broă jơh nùs mờ gàr niam gơnoar broă là lơgar tàm mpồl ală ƀòn dờng bơceh bơh UNESCO dê, bơh hơ̆ pơgồp bơnah sơlơ tơnguh bơta kuơ tă pơgồp pràn kơldang bơh gah lơh mờ măi mok niam chài dê tàm rài lơh sa ƀòn dờng dê.