Sơn đờm ai ală broă lơh niam chài bồ nam pa Giáp Thìn 2024 in là bơhiàn bơyai lơh rò Mè sơn rờp Dà lơgar Âu Cơ tàm Tiah lòt nhơl ƀòn brê bơnơm, niam chài, mpồl bơtiàn Ko Tam, ƀòn dờng Buôn Ma Thuột, càr Dăk Lăk. Tàm nùs nhơm king crŭ, dơ̆ bơyai lơh geh lơh yŭ rơyùm, ai tơnggŏ nùs nhơm ki ngàm, kah ưn ngài Mè sơn rờp Dà lơgar, mờ ală pha pơ dơng bè ƀañ phe, mbar, ce lơngồt mờ uă phan bơkah tiơng pơn rơ ƀòn lơgar dê. Làng bol mờ nac lòt nhơl pơn jat tai lòt sền ù tiah mờ kơt sră cih bơta kơp kờñ tàm tờm chi hòi dan. Lòt bal mờ hìu bơnhă tus bal dơ̆ bơyai lơh do, mò Nguyễn Thị Thoạt 70 sơnam, ơm tàm sơnah ƀòn Tân Lợi, ƀòn dờng Buôn Ma Thuột đơs: “Dơ̆ sơn rờp añ lòt ndo tus bal Dơ̆ rò Mè sơn rờp Dà lơgar Âu Cơ. Ngan ngồn gơ lơh ngoh rơngac ngan, tơngkah kòn sau in nàng kah ưn ngài bè tơngu rơyas kòn bơnus dê mờ kah bè nùs nhơm gơ lòng sồr bơh kòn sau dê gơ wèt mờ Mè sơn rờp Dà lơgar, dong kòn sau git là, he pal sền gàr kah yau cau Việt Nam he dê, pal sùm kah bè tơngu rơyas, kah bè mò pàng, jơi nòi tờm he dê”.

Bơh nam 2019 tus tŭ do, tàm do, sùm bơyai lơh Chu ñàng, kah ưn ngài Mè sơn rờp Dà lơgar tàm ngai 25 nhai 12 nam lơgar he dê mờ dơ̆ bơyai lơh Rò Mè sơn rờp Dà lơgar tàm ngai 07 nhai 1 pah nam. Mò Nguyễn Thị Ngọc Anh, Kwang atbồ Kông ty pà git, bơhiàn bơyai lơh Rò Mè sơn rờp Dà lơgar Âu Cơ gơ gơs dùl bơta niam chài, lơh gơlik bơta tam klac, đềt mềr bơh mpồl bơtiàn ală jơi bơtiàn dê, ngai sơlơ geh uă cau git tus mờ tus bal: “Bơhiàn duh khoai Mè sơn rờp Dà lơgar Âu Cơ đơs bè jơnau yal yau Mè sơn rờp Dà lơgar Âu Cơ lam 50 nă kòn guh hờ đang bơnơm, kung gơ jat mờ bơhiàn jat jơi mè bơh làng bol jơi bơtiàn dồ êt nă cau Tây Nguyên dê bè kòn cau Rơđê tàm càr Dăk Lăk tŭ do, kung gam jat bơhiàn jat jơi mè. Mờ kung kơp kờñ jơh tơl nă cau bơh jơnau yal yau “dùl nă mè deh 100 nai tap, 100 nă kòn” do rơp bal mờ gơp tam klac nàng bơt bơtàu dà lơgar, ƀòn lơgar, tam pà bal mờ gơp nàng bal mờ gơp kis tàm sòr, tàm dong kờl, sền gàr bal mờ gơp”.

Ală broă lơh niam chài, lơh chờ bồ nam pa gam geh bơyai lơh tàm ală kơnhoàl, thị xã tàm càr Dăk Lăk. Pơn rơ bè: Ngai chờ niam chài, tàp pràn să jan kòn cau Mông tàm kơnhoàl Krông Bông, Dơ̆ lơh chờ Hảng Pồ tàm thị xã Buôn Hồ, Dơ̆ lơh chờ niam chài bơh yau kòn cau Việt Bắc tàm kơnhoàl Krông Năng, dơ̆ pơrlòng tàm pơt Vụ Bổn… Tàm kơnhoàl Krông Ana geh 2 broă lơh dờng là Dơ̆ pơrlòng plung cau klau ờs mờng rề ơnàng mờ Dơ̆ lơh yàng tă tờm chi gơnơng bơh cau Mường dê. Ồng Hoàng Minh Giám, Phó Củ tịc Duh broă sùm Ủy ƀan Ñân zân kơnhoàl Krông Ana pà git: “Do là dùl bơta niam chài bơh ală jơi bơtiàn kơnhoàl Krông Ana dê nàng hòi dan ală yàng sền gàr dà lơgar ring lơngai, làng bol lơngăp lơngai, kàl lơh sa tơnhàu geh uă. Kung di tàm dơ̆ bơyai lơh bè do kờñ hòi jà mờ yal tơnggit rùp hin kơnhoàl Krông Ana hàng niam dê, pah nam kung bơyai lơh dùl ròt ală broă lơh lòt nhơl gơ hòi gơ jà nac lòt nhơl tus mờ Krông Ana”.

Tàm xã Chư Prông, Ủy ƀan Ñân zân kơnhoàl Ea Kar, geh bơyai lơh Ngai chờ Niam chài ală jơi bơtiàn kơnhoàl dơ̆ 3 mờ ală broă lơh bè: đơs crih tamya ờs mờng ală jơi bơtiàn; tàm pơrlòng ală bơta nhơl ñŏ kòn cau bơh yau; ràng tơlik mờ sa ală phan sa ală ù tiah dê; lòt sền ală ù tiah niam chài Tây Bắc, Tây Nguyên mờ niam chài mut gơ rờm bal; lòt sền tiah tềl kah yau tiơng pơn rơ ñrùh dà Brai Y Bar; pơrlòng plung thúng mờ plung Ka Yak; ràng tơlik mờ tac ală phan tiơng pơn rơ, phan OCOP.

Mờ 28 jơi bơtiàn ơm kis bal, lơh broă lơh sa tàm 220 thôn, ƀòn, tổ zân phố tàm gùt kơnhoàl neh lơh gơlik bơta tờm, bơta niam bal mờ uă bơta niam chài geh ai tơnggŏ tàm ngai chờ. Bal mờ sap cing mồng cau Rơđê dê, sap đòng tíñ đơs then bơh cau Tày – cau Nùng dê, gùng đơs quan họ Bắc Ninh là ală bơta nhơl ñŏ kòn cau bơh yau cèng bơta krơi is bơh ală jơi bơtiàn dê bè to kòn, tàm gĕ be, nhơl cah ơyun, lềt mat kup ada…

Jat ồng Lại Đức Đại, Phó Kwang atbồ Sở Văn hóa – Thể thao mờ Zu lịc càr Dăk Lăk pà git, ală broă lơh niam chài, lơh chờ tàm càr geh lơh rah rài sùm tàm jơh gùt nhai 1. Ală bơhiàn lơh yàng, lơh chờ geh tơngume nhơl ñŏ, chờ hờp cèng bơta niam chài ală jơi bơtiàn dê, ai tơnggŏ bơta li la tàm niam chài bơh 49 jơi bơtiàn gam ơm kis tàm càr dê. Do ờ mìng là ală broă lơh pơgồp bơnah tơnguh jơnau kờñ lòt nhơl, mờ gam lơh gơlik anih lòt nhơl niam bơnĕ, cèng wơl bơta chờ hờp ai làng bol mờ nac lòt nhơl in tàm ală ngai bồ nam pa: “Ală broă lơh niam chài, đơs crih tamya, tàp pràn să jan gơ rềng tus broă prap gàr ală bơta niam chài jơi bơtiàn geh bơyai lơh duh hồl ngan tàm ală kơnhoàl mờ kuơmàng là bơh ngai 05 tus ngai 15 nhai 1, rah rài tàm ală kơnhoàl tàm càr. Ală broă lơh geh bơyai lơh di tàm ală ngai bồ nam pa hàng niam nàng làng bol in sơn đờm 1 nam pa bal mờ uă bơta chờ hờp kung bè kơp kơnờm”.