Bồ nam do, tàm Ƀảo tàng Dăk Lăk, ƀòn dờng Buôn Ma Thuột geh lơh dùl dơ̆ ràng tơlik cau dồ nă să is mờ tơngume “Trường Sa – Tiah bồ nsừc dà lềng”. Dơ̆ ràng tơlik neh yal tơnggit mờr 100 pang rùp sră nggal bè ală broă lơh pơlam tàp rơcang lài tam lơh mờ rài kis bè ờs bơh kwang bàng, cau ling mờ làng bol tàm bồt dờng Trường Sa dê; broă lơh 21 bồt gơ wèt bồt dờng Trường Sa bal mờ ală phan lời kir bè bồng bi dà lơgar, bồng bi ling dà lềng làng bol Việt Nam, phan mòn mờ tê bơh ngkàr kràng, ngkàr koat bơh ală cau ling tàm bồt dờng Trường Sa mòn is. Tàm dơ̆ ràng tơlik gam pờ 5 tập lơma Phóng sự - tài liệu bè Trường Sa.

Dơ̆ ràng tơlik neh gơ hòi gơ jà gal ngan làng bol mờ nac lòt nhơl tus sền. Ồng Tôn Thất Tuấn Ninh ơm tàm kơnhoàl Lăk, càr Dăk Lăk yal, ală phan ràng tơlik neh yal li la, đềt mềr, song dơpă ngan bè bồt dờng Trường Sa uă bơta mờ bềng lìu bơta pràn: “Tàm Tây Nguyên mờ Dăk Lăk, dơ̆ sơn rờp añ geh lòt sền dùl dơ̆ ràng tơlik yal bè rài kis kung bè broă lơh bơh ală cau ling tàm bồt dờng Trường Sa dê, nàng làng bol tàm Tây Nguyên in gơtùi git bè rài kis tiah bồ nsừc dà lềng bơh dà lơgar dê”.

Ờ mìng tàm ƀòn dờng Buôn Ma Thuột, bơh nam 2014 tus tŭ do, Sở Thông tin mờ Truyền thông càr Dăk Lăk neh bơyai lơh uă broă lơh mblàng yal bè broă lơh sền gàr gơnoar tờm bồt dà lềng. Tàm hơ̆ geh ràng tơlik làm bă tiah “Hoàng Sa, Trường Sa bơh Việt Nam dê – Ală cơng tàng kah yau mờ adat boh lam” tàm ală kơnhoàl: M’Drăk, Ea Kar, Ea Súp, Krông Bông, Ea H’leo, Cư Kuiñ mờ thị xã Buôn Hồ. Tàm tơl dơ̆ ràng tơlik neh yal tơnggit sră wac sềr ù tiah mờ sră nggal là cơng tàng kah yau mờ bơnàng jă adat boh lam đơs nền gơnoar tờm bơh lơgar Việt Nam dê gơ wèt mờ 2 bồt dờng Hoàng Sa mờ Trường Sa tàm dà lềng đah mat tơngai lik. Ală sră nggal geh cih dờp tàm uă bơta sră nggal kah yau bơh lơgar Việt Nam mờ ală lơgar dê, kuơmàng là ală sră nggal, sră wac sềr rùp ù tiah geh cih, geh wac sềr, lip bơh rài 16 tus tŭ do tàm lơgar Việt Nam mờ uă lơgar tàm dunia.

Ồng Nguyễn Quốc Hiệp, Phó Kwang atbồ Sở Thông tin mờ Truyền thông càr Dăk Lăk, Kwang atbồ Mpồl bơyai lơh ràng tơlik pà git: Ală sră nggal mờ mờr 100 sră wac sềr rùp ù tiah geh ràng tơlik là bơta tơrgùm ală sră nggal tờm neh geh yal bơh lài tus tŭ do tàm lơgar mờ dunia; đơs nền tŭ tơngai đal git, lơh jat ngan ngồn mờ sền gàr gơnoar tờm bơh lơgar Việt Nam dê gơ wèt mờ 2 bồt dờng Hoàng Sa mờ Trường Sa. Bơh pah dơ̆ ràng tơlik gơ hòi gơ jà git nđờ rbô dơ̆ làng bol lòt sền, jòi git: “Bơh dơ̆ ràng tơlik neh pơgồp bơnah kuơmàng ngan nàng tơnguh jơnau git wă, nùs nhơm geh kơnòl bơh tơl nă kwang bàng, đảng viên dê đơs is mờ làng bol Việt Nam đơs bal, pơgồp bơnah uă ngan tàm broă sền gàr gơnoar tờm dà lềng, bồt bơlàu ƀòn lơgar mờ lam lơh geh cồng nha 2 kơnòl broă kuơmàng là bơt bơtàu mờ sền gàr dà lơgar”.

Broă mblàng yal bè gơnoar tờm dà lềng, bồt bơlàu gam geh ală tiah tàm càr Dăk Lăk lam lơh mờ gơ rề tus cau pơgru mờ kơnòm bơsram tàm ală hìu bơsram. Tàm thị xã Buôn Hồ, dơ̆ pơrlòng “Oh kờñ gơboh dà lềng, bồt bơlàu Việt Nam” neh geh bơyai lơh tàm lồi nam 2023 jat broă lơh lèu lời ai ală hìu bơsram kâp 2 in. Bơh dơ̆ pơrlòng in, jơh bal cau pơgru mờ kơnòm bơsram ndrờm geh bơta rơcang lài jơh nùs, jòi git uă rlau bè gơnoar tờm bồt dà lềng ƀòn lơgar bơh hơ̆ ai tơnggŏ bơta bơceh lơh tàm ală bơnah pơrlòng mblàng lơh loh, bơta chài mờ lơh lèu mblàng yal.

Pơgru H B’hai Mlô, hìu bơsram kâp 2 Trần Phú, sơnah ƀòn Đoàn Kết, thị xã Buôn Hồ pà git; Dơ̆ pơrlòng ờ mìng lơh gơlik anih nhơl ñŏ geh kuơ mờ gam pơgồp bơnah tơnguh cồng nha git wă bơh pơgru mờ kơnòm bơsram dê bè dà lềng, bồt bơlàu Việt Nam, bơh hơ̆ lơh gơlik, tơnguh nùs nhơm kờñ gơboh ƀòn lơgar, dà lơgar: “Ai kơnòm bơsram in gờñ git bơta kuơ bồt dà lềng, kah yau bơh ală rơnàng bèp ồng dê neh phi să tàm ală dơ̆ tam lơh sền gàr bồt dà lềng. Nàng ală oh git gờñ, bơh hơ̆ geh jơnau git wă, bơta sền sơ wì dipal bè bơta kuơ dà lềng, bồt bơlàu ƀòn lơgar he dê. Ală kơnòm bơsram kung kờñ ngan jòi git mờ jòi git is ală jơnau lùp, jơnau git wă bè bồt dà lềng”.

Ai gơ wèt mờ oh Trần Nguyễn Đăng Khoa, kơnòm bơsram ơdŭ 11A1, hìu bơsram kâp 3 Y Jút, xã Ea Bhôk, kơnhoàl Cư Kuiñ, càr Dăk Lăk, tài kờñ gơboh den tàng sùm jòi git jơnau tơnggit, sền clip bè bồt dà lềng tàm internet, dong oh git loh rlau tai bè gơtha kuơmàng bơh bồt dà lềng dà lơgar dê: “Gơ wèt mờ oh là kơnòm bơsram pal lơh ngan bơsram niam rlau, jơh nùs mblàng yal tus tơl nă cau bè gơnoar tờm bồt dà lềng bơh Việt Nam dê. Bơta kơp kờñ oh dê là gơ gơs dùl nă ling dà lềng, tài bồt dà lềng là dùl bơnah poac mhàm bơh bol he dê, gơ gơs là cau sền gàr gơ den hơ̆ là kơnòl dờng màng ngan”.