Mpồl niam chài bơh yau jơi bơtiàn kòn cau Tày, Nùng, Mường xã Ea Kao geh 52 nă cau là làng bol ală jơi bơtiàn kòn cau Tày, Nùng, Mường kờñ gơboh, kờñ ngan bơta niam chài bơh yau dê tus bal. Tơnơ̆ tŭ geh jơnau lơh nền tơlik mat, cau tàm mpồl geh bơto pơlam, mblàng yal wơl bơta chài đơs then, đờng tíñ bơh kòn cau Tày, Nùng dê; ràng tơlik bàr pe jơnau cing kòn cau Mường.

Tơnơ̆ 2 poh, ală cau bơsram neh gơtùi ràng tơlik niam 3 jơnau cing Mường mờ 3 jơnau đờng tíñ, hát then. Krơi mờ ală mpồl neh tơlik mat lài hơ̆, do là mpồl sơnrờp geh bơta pơgồp bal bơh uă jơi bơtiàn mờ jơnau kờñ pơgồp bơnah prap gàr mờ lơh uă ală bơta kwơ niam chài, đơs crih tam ya bơh yau dê; lơh geh tiah nhơl ai làng bol ală jơi bơtiàn in geh tiah nhơl chờ hờp lơh rài bồ tơngoh niam mờ sơlơ tơnguh bơta tam klăc bal.