Tàm niam chài cau Rơđê dê, sap cing ờ mìng là sap ntas đờng goòng dê. Hơ̆ là sap hòi mpồl bơtiàn dê, là sap ntas geh mat tàm ală tŭ kuơmàng rài kis kòn bơnus dê. Kòn dềt pa deh neh geh sap cing gờm chờ. Tŭ cau kra sang rài rê mờ mò pàng, sap cing mpong ntas nàng tơngac.

Cau chài Y Tŏ Byă, mat mờng hòi là ồng Sa dê ơm tàm ƀòn Dang Kang, sàh Dang Kang, càr Dăk Lăk yal, sap cing mồng ờ gơtùi ờ geh tàm rài kis. Mơya nàng gơtùi dròng mờ jañ niam, ală cau bơsram cing pal sơn đờm bơh ală sap ƀuơn ngan rlau jơh, hơ̆ là cing gle:

“Jat bơhiàn bơh yau, tàm ală bơhiàn lơh yàng ƀòn lơgar dê, sap cing sùm geh dùl gơnoar broă kuơmàng is ồn ngan. Pah dơ̆ lơh bơhiàn duh khoai yàng, sap cing geh mpong ntas. Mơya bơh chờm, pal tàp mờ cing gle. Tŭ neh chài tơl sap dròng cing gle, den khi pơn jat tai dròng ngan ngồn cing lơngô”.

Bơh ală sap cing gle sơn rờp, cau bơsram rơhời lơh kwèng mờ tơl sap ntas, tơl bơta ndang, rơlĕ, gơguh, gơmù. Hơ̆ sồng tŭ sap cing lơngô mpong ntas tàm ală bơhiàn lơh yàng bơh yau, tơl sap cing ờ mìng cèng sap ntas, mờ gam cèng ală bơta kuơ niam chài geh tàm pơrdờn wơl bơh uă rài. Cau chài ồng Y Ka Niê, mat mờng hòi là ồng Cứu dê ơm tàm ƀòn Dang Kang, sàh Dang Kang, càr Dăk Lăk pà git:

“Tŭ do añ neh dờng sơnam, mơya añ kung pơnđơl bơto dròng cing jañ mồng kòn sau tàm ƀòn in. Tus tŭ do, añ neh bơto geh dùl mpồl, ală sau neh dròng chài ngan ală jơnau cing mờ añ neh bơto wơl. Añ kơp kờñ kòn sau pơn jat tai bơsram mờ gàr sap cing, nàng ờ lơh roh huĭ bơta niam chài bơh yau kòn cau he dê”.

Mờ bơta bơto wơl jơh nùs ngan ală cau chài dê, nùs nhơm tàm ală dơ̆ bơsram dròng cing tàm ƀòn sùm ram mhŭ. Hơ̆ ờ mìng là bơsram bơta chài dròng dùl sap cing. Hơ̆ gam là tŭ tơngai nàng ală oh dềt git rlau tai bè niam chài kòn cau he dê. Geh oh pa rơp 7 sơnam neh sơn đờm lơh kwèng mờ cing gle. Bơh hìu rơng, sap cing lòt jat ală oh tus hìu bơsram, tus ală dơ̆ bơ tòm tơrgùm mat mpồl bơtiàn. Bi Y Tloi Niê, mat mờng hòi là bèp Tra dê, dùl nă cau tàm ƀòn đơs:

“Broă sền gàr, prap gàr mờ bơto wơl cing mồng sơn đờm bơh bơta kơp kờñ làng bol tàm ƀòn dê. Bol hi kung sùm bơto wơl kòn sau in, bơh ală oh dềt tus ală cau dờng sơnam. Is ồn, rơnàng cau dờng sơnam bơto wơl kòn sau bơh 7 tus 8 sơnam in, mờ kung rơcang bơto ală kơnòm bơsram tàm hìu bơsram kâp 2 in tai”.

“Tờm gle kràn den ƀang but”, mơya tềng đap ală tam gơl sơrbac mhar ngan mpồl bơtiàn dê, uă cau kơnòm să kung gơ lòt jat bơta lòt lơh broă ngài, den tàng ờ di tŭ lơi ƀòn lơgar kung gơtùi bơtòm tơrgùm wil tơl mpồl cing mồng kơnòm să. Hơ̆ kung là bơta kơlôi rơcang bơh cau chài ồng Y Cheo Byă, mat mờng hòi là ồng Bươm dê, ơm tàm ƀòn Dang Kang:

“Mùl màl, mpồl cau chài bol hi neh dờng sơnam mơya kung gam sùm bal mờ gơp tàp. Kuơmàng rlau là ƀòn lơgar kờñ pal geh broă rơndap lơh bơto wơl den broă prap gàr mờ ngui niam cing mồng rơp lơh geh cồng nha rlau. Do ờ di là broă is ală cau chài bol hi dê, tài bol hi neh dờng sơnam, tơnơ̆ do rơp ờ gam pràn nàng lòt bơyai lơh tai”.

Sap cing Dang Kang tŭ do kung gam nggồr chờ pah dơ̆ lơh chờ, lơh yàng. Mơya tơnơ̆ tơl sap cing niam bơnĕ hơ̆ là git nđờ bơta kơlôi rơcang tơl nă cau chài kơnòm să dê. Bơta gơboh mờ bơta lơh ngan ală cau chài dê gam bơto tơl “huềng” brê bơnơm dờng dê tus mờ rơnàng kơnòm să. Nàng pah tŭ trồ mang tus, tàm tiah brê bơnơm dờng, cau kung gam klo sap cing mồng mpong ntas bè sap ờ hềt tŭ lơi ơm rlô ƀòn Dang Kang dê.