Jăt mờ hơ̆, Ngai sră mờ niam chài sền sră tàm càr Dăk Nông nam do geh bơyai lơh mờ bơta dờng kấp càr, nàng dờp bal Ngai sră mờ Niam chài sền sră Việt Nam ngai 21 nhai 4, chờ gờm tơnkah 20 nam ngai crơng gơs tai càr Dăk Nông (01/01), tơnkah 49 nam ngai tơnklàs Gia Nghĩa, càr Dăk Nông (23/03).

Tàm ƀòn dờng Gia Nghĩa, bơh ngai 13 tus ngai 15 nhai 3, Ngai chờ sră geh bơyai lơh mờr jơ̆t broă lơh, geh pơnrơ ngan là ală dơ̆ ràng tơlik, ràng rơlao 15 rơbô pang sră mờ ală jơnau cih văn họk nghệ thuật; ràng tơlik yal ală bơta ngui kông nghệ dong kờl bơtàu tơnguh bơta niam chài sền sră, tam gơl sồ drơng broă bơto bơtê, tam gơl sồ gah thư viện; tìp bal cau cih sră-jơnau cih; tìp bal mpồl, cau cih jơnau kơnòm să mờ pơrlòng mpồl tamya pa bơh ală hìu bơsram dê. Jăt ồng Hoàng Mạnh Thắng, Phó Kwang atbồ Sở Thông tin mờ Truyền thông càr Dăk Nông yal, mờ broă dong kờl bal bơh 22 mpồl lơh broă, Ngai chờ sră mờ niam chài sền sră nam do geh mùl màl là ală ngai chờ tàm càr Dăk Nông dê.