Ală ngai lơh broă sa suơn sre neh jơh mờ làng bol geh tŭ tơngai ru, mờr 30 nă oh mi kòn cau Bahnar tàm mpồl tàñ phan ơm tàm thôn 5, xã Pờ Tó, kơnhoàl Ia Pa, càr Gia Lai den tơrgùm wơl bal mờ gơ̆p tàñ biài tềng hơđơm rồm hìu rơng dê. Cau dờng sơnam ngan rlau jơh neh rlau 50 sơnam, geh ală ùr ơruh pa tàu dờng mìng pa 17, 18 sơnam lơm. Khi jơh nùs ngan tàm bơto bal, bal mờ gơ̆p tàñ tơl rùp bơka bơh yau, halà lơh geh ală rùp bơka pa tàm ào, ồi dê.

Bi Đinh Như, ơm tàm thôn 5, xã Pờ Tó, pà gĭt:“Lài do ală mò, tơrgùm wơl ală mơi, ală wa. Tơngai pa tŭ do den ală bi lùp bơsram bal tai. Tơnơ̆ do he wơl bơto wơl ai rơnàng kơnòm să in, ală sau 16 sơnam, 18 sơnam lùp bơsram uă rlau tai”.

Ai tàm xã Ia M'nông, kơnhoàl Chư Păh, càr Gia Lai, ală oh mi kòn cau Jrai tàm mpồl tàñ phan ƀòn Kép 2 dê sac rơwah dùl nơm hìu rơng tàm gùl ƀòn lơh tiah tàñ phan mờ ràng tơlik ală phan bơna ồi kòn cau dê. Do là tiah tus tàm mpồl lòt nhơl mpồl bơtiàn ƀòn Kép 2 dê. Tus tàm do, năc lòt nhơl sền gĭt bơta niam bơh biài, rùp bơka tàm ồi, tàm tơl nơm ào, ồi, kơldung ơn priă, kơl dung ià...., geh sền gĭt bơta kal ke tŭ tàñ gơs phan, nền nòn ngan tŭ bơsram tàñ tàm bơrnơ̆, sac rơwah ai he in ală phan lời kir sơnrai. Bi H’ Uyên Niê- cau tờm mpồl tàñ phan pà gĭt, tŭ do neh geh mpồl lơh sa kă bro kĭ lơh broă bal mờ mpồl, pờ tơlik geh tŭ tơngai pa ai broă prap gàr bơtàu tơnguh broă tàñ phan yau dê. Kơnờm bơh broă lơh geh ală phan bơna geh bơta gơtùi ngui gơwèt mờ năc lòt nhơl, mờ cau chài sùm lơh geh priă pơgap 5 tơlak đong pah nhai. Bi H’ Uyên Niê, đơs:“Mpồl cau ùr bol añ tam gơl broă lơh, lơh uă ală phan bơna bơh yau gơ gơs phan lời kir sơnrai. Pơn yơu bè pang ồi yau bè do den bol añ gơtùi tàñ gơs ală kơl dung, kơldung ơn priă, ào halà pơno blo tồr...bơh hơ̆ lơh geh jơnau kờñ bơh năc dê tŭ tus sền gĭt. Cau chài geh dờp geh tơn cồng nha lơh geh bơh he dê, bơh hơ̆ cau chài geh nùs nhơm, kờñ uă rlau tai, nàng prap gàr bơhiàn niam chài niam bơnĕ dê”.

 Tàm jơh gùt càr Gia Lai neh geh 106 mpồl tàñ phan yau, tơrgùm rlau 1 rơbô 600 nă cau ùr tus bal. Khà cau do gam pơn jat tai gơguh tŭ broă tàñ phan yau geh càr sền gròi yal tơngĭt uă bè dùl phan bơna niam chài kwơ màng nàng bơtàu tơnguh lòt nhơl. Càr Gia Lai neh ai broă tàñ phan yau gơ gơs dùl tơngume kwơ màng tàm broă rơndăp lơh “Prap gàr, ngui niam bơta kwơ niam chài bơh yau niam bơnĕ bơh ală jơi bơtiàn dồ ết nă cau pơgồp bal mờ bơtàu tơnguh lòt nhơl” gơwèt broă lơh jơnau kờñ Dà lơgar bơtàu tơnguh lơh sa- mpồl bơtiàn tiah làng bol jơi bơtiàn dồ ết nă cau mờ tiah kơh bơnơm tơngai bơh nam 2021-2030”. Tŭ do phan bơna bơh yau geh ràng tơlik, yal tơngĭt tàm ală broă lơh ràng tơlik cing mồng lồi poh, lam lơh sùm tàm Ƀlàng dờng Đại đoàn kết, tiah tờm ƀòn dờng Pleiku.

Mò Nguyễn Thị Thanh Lịch, Phó Củ tịc Ủy ƀan Ñân zân càr Gia Lai pà gĭt, jơnau kờñ bơh càr dê là prap gàr, yal tơngĭt mờ ai phan bơna bơh yau gơ gơs phan phan bơna tàm gah lòt nhơl tàm càr dê. Mò Nguyễn Thị Thanh Lịch, đơs:“Bơh do bol añ kơ̆p kờñ jờng rơ cau chài, cau kơlôi sơnơng neh lơh sùm, geh phan bơna cèng bềng bơta niam chài. Bol añ kơ̆p kờñ ờ mìng ơm wơl tàm broă yal mờ yal tơngĭt lơm mờ gam lơh phan bơna lơh sa, yal tơngĭt ai năc lòt nhơl pơgồp bal gơ gơs phan bơna kă bro, pơgồp bơnah tàm bơtàu tơnguh lơh sa kơ̆ kơl jăp bơh càr Gia Lai dê”.