Ngai chờ lơh ƀăo nam pa Giáp Thìn càr Kon Tum 2024 ràng tơlik, yal tơngĭt tus mờ cau sền in rlau 500 pang ƀăo nam pa bơh mờr 80 Mpồl cau lơh ƀăo tàm jơh gùt lơgar, anih lơh broă tàm càr mờ bơdìh càr.

Đơs tàm dơ̆ sơnđờm mut lơh, mò Y Ngọc, Phó Củ tịc Ủy ƀan Ñân zân càr Kon Tum đơs nền, ală anih lơh broă sră ƀăo, gah mblàng yal jơnau bơh càr dê bal mờ ala mat ală anih lơh broă yal tơngĭt jơnau, gah lơh ƀăo Dà lơgar lơh broă tàm ù tiah càr dê neh geh uă tam gơl pa tàm broă lơh jat kơnòl broă cíñ trị, tơnguh uă broă lơh dong làng bol gĭt wă, pơgồp bơnah jơh nùs ngan tàm cồng nha bơtàu tơnguh lơh sa- mpồl bơtiàn bơh càr dê. Phó Củ tịc Ủy ƀan Ñân zân càr Kon Tum, kơ̆p kờñ ală anih lơh broă yal tơngĭt jơnau, gah lơh ƀăo, gah mblàng yal jơnau pơn jat tai pơnđơl pràn lơh ngan rlau tai nàng bơceh lơh geh ală jơnau cih gah lơh ƀăo jak ngan rlau tai; yal tơngĭt, đơs nền bơta bơtàu tơnguh bơh càr dê.