Broă lơh mờ tơngu me “Bơh Huila lik tus tàm dunia” geh Kwang atbồ anih lơh broă ala măt lơgar Colombia tàm lơgar Việt Nam pơgồp bal mờ ală anih lơh broă, mpồl lơh broă tàm ƀòn dờng Đà Nẵng bơyai lơh. Tàm broă lơh, ală cau chài kơnòm să lơgar Colombia yal tus làng bol mờ cau năc tàm Hội An ală gùng đơs crih, tamya krơi is bè Bambuco, Rumba Campesina, Rajaleña mờ Sanjuanero.

Tus bal broă lơh gam geh ală kơnòm dềt ƀòn dờng Đà Nẵng. Bơh tàm ală jơnau đơs crih tìp bal, ală bơyô gam kơnòm să bàr lơgar geh tai dơ̆ nàng tìp bal, tam pà bal mờ git wă rơlao bè niam chài. Broă lơh do geh tàm broă bơceh lơh Cri bơyai broă lơh bal mờ lơgar ndai Tàp pràn să jan mờ Niam chài bơh Bộ Cri bơyai broă mờ lơgar ndai lơgar Colombia dê, wèt tus lơh pràn tơrgùm bal mpồl bơtiàn, kis bal ring lơngai mờ cri bơyai bàr niam chài, is ồn bơh ală broă lơh ai ơruh pơnu mờ kơnòm pa tào in.