Drim ngai 27/03, Anih duh broă Làng bol kơnhoàl Phú Thiện neh bơyai lơh Lơh Yàng duh khoai hòi dan mìu bơh Yang Pơtao Apui dê mờ Dơ̆ tàm pơrlòng Niam chài- tàp pràn să jan ală jơi bơtiàn dồ ết nă cau dơ̆ 16 tàm tiah Lòt nhơl kah yau- niam chài Dà lơgar Plei Ơi (sàh Ayun Hạ, kơnhoàl Phú Thiện, càr Gia Lai) nàng kờñ yal tơngĭt uă phan lời wơl niam chài mờ bơta ƀuơn bơta pràn lơh sa- mpồl bơtiàn, gơ hòi gơ jà năc lòt nhơl mờ cau bơcri priă tàm gah lòt nhơl.

Lơh Yàng duh khoai hòi dan mìu geh bơyai lơh tàm bồ nơm Yàng Chư Tao Yang, bơh ồng Siu Phơ, drơng broă rài Bơtau Ồs dơ̆ 14, bal mờ mpồl duh broă kra ƀòn mờ cau chài dong kờl đơng lam. Jơnau răc dan mờ trồ tiah cèng geh mìu càl niam, dong chi che hòn gơs niam mờ làng bol tam klăc bal, pràn kơl dang, sơr lèt gan tơl bơta trồ tiah lơh aniai. Bal mờ dơ̆ lơh Yàng duh khoai là dơ̆ lơh chờ tàm pơrlòng niam chài- tàp pràn să jan, mờ uă broă lơh li la bè, ràng tơlik dròng cing jañ mồng, tàñ phan, trah mòn rùp dơm chi, tàñ ồi kòn cau, mờ ală broă nhơl bè ntoăt cah càng èk, pañ kam mờ yàl ƀao tạ. Is ồn, ngai ntoăt jơng sơnđan “Jat cơnđoà jơng Bơtau Ồs dê” kung geh bơyai lơh, lơh geh nùs nhơm duh hồl ai dơ̆ lơh chờ in.