Ală ngai bồ sơnam pa, tiah lòt nhơl niam chài ƀòn brê bơnơm mpồl bơtiàn Ko Tam, ƀòn dờng Buôn Ma Thuột, càr Dăk Lăk niam ngan, gal ngan năc rềp ngài tus. Bi H’Drim Ayun, cau lơh broă tiah lòt nhơl, pà gĭt:“Tàm hìu rơng do geh broă lơh tìp mat lơh kwèng tam ya xoang, ñô tơrnờm geh bơyai lơh bơh ngai 1 tus ngai 5 Sa tềp. Tàm jơh ală tiah ndrờm geh ală broă lơh ai năc lòt nhơl in sền gĭt. Tàm ală dơ̆ do là dơ̆ nàng he in yal tơngĭt niam chài bơh làng bol tiah do dê là làng bol kòn cau  Rơđê he dê tus mờ tơl nă cau mờ ală broă lơh do năc lòt nhơl kờñ ngan, mờ ờ di là tŭ lơi kung geh dơ̆ sền gĭt niam chài kòn cau Rơđê tàm tiah do dê lơm ờ den tàng chờ hờp ngan wă rò ală năc lòt  nhơl tus tàm dơ̆ Sa tềp do”.

Là dùl tàm ală năc lòt  nhơl rơ wah càr Dăk Lăk là tiah tus lòt nhơl tàm ală ngai bồ sơ nam pa, bi Nguyễn Thiên Đăng, tus bơh Đồng Nai chờ hờp đơs: Ală ngai do, ờ mìng geh sền bơta niam bơnĕ brê bơnơm tơlir lơngơm mrềt lơm mờ bi gam geh tŭ tơngai sền gĭt ală broă lơh niam chài mpồl bơtiàn gơ kờñ ngan. Ngan là tŭ dơ̆ sơn rờp geh bơnĕ bơnài bal mờ ù tiah cing mồng, tam ya bal mờ ală gùng tam ya xoang ờs mờng halà ñô tơrnờm kềng gah bơnah ồs. Bi Nguyễn Thiên Đăng, đơs:“Bơh nti añ kung neh lòt dô dar rau, geh iăt dròng cing jañ mồng, geh ñô tơrnờm, geh sa phan sa buh tàm do gơ kờñ ngan mờ añ kờñ ngan gùng tam ya xoang tai”.

Gơwèt mờ bi Huỳnh Thị Thuỷ, bulah kis mờ lơh broă tàm càr Dăk Lăk uă nam, mơya nam do hìu bơnhă bi kung gam rơwah ƀòn Ako Dhông –Ƀòn tàm drà nàng lòt nhơl nam pa. Jat bi, do là broă lơh niam ngan nàng kơnòm dềt in gĭt mờ sền dờng màng bơhiàn niam chài ờs mờng dê. Ală sền gĭt geh ngan bè sền dròng cing jañ mồng, tus bal ală dơ̆ bơyai lơh halà sa ală phan sa mùl geh ngan rơ̆p dong ală kòn in gĭt wă loh làng rlau tai bè bơhiàn niam chài tiah do dê.

Bi Huỳnh Thị Thuỷ:“Sa tềp nam do añ lam hìu bơnhă tus tiah lòt nhơl do nàng sền gĭt nùs nhơm Sa tềp tàm do. Tiah do geh uă ngan broă lơh cèng bơta ờs mờng mờ cèng bal bơta pa tŭ do dê. Geh cing mồng, geh sền gĭt bè niam chài ñô tơrnờm. Añ kơ̆p kờñ jơh hìu bơnhă he tàm do sền gĭt bal geh bơta niam chài ờs mờng hơ̆. Añ tàm do den añ pal gĭt wă mờ ală oh kòn añ kung geh sền gĭt den Sa tềp là dơ̆ di pal ngan rlau jơh”.

Kàl prang Nam pa tàm càr Dăk Lăk ờ mìng cèng tus nùs nhơm niam mờ pa lơm mờ gam là dơ̆ nàng tơl nă cau in tàm tơrbŏ bal mờ ală bơta kwơ niam chài ờs mờng niam ngan. Làng bol mờ năc lòt nhơl ndrờm hơn chờ dờp geh dùl kàl prang nam pa wil tơl, tiah niam chài mờ trồ tiah brê bơnơm tàm bơnĕ bơnài bal, nàng lời wơl ală kir sơnrai niam ngan ờ gơtùi hŭi.