Dơ̆ pơrlòng ntoat càr Dăk Lăk nam do geh 17 mpồl cau pơrlòng gơ wèt 2 gah kơnhoàl, thị xã, ƀòn dờng mờ gah anih lơh broă, hìu bơsram, mpồl tus bal. Ală cau pơrlòng rơp tus bal pơrlòng ntoat bơh 2 tus 5 kơi sồ mờ 8 tơngume geh: cau klau tờm, cau ùr tờm, cau klau srơh, cau ùr srơh, cau klau kơnòm să mờ cau ùr kơnòm să. Tơn jơh dơ̆ pơrlòng, mpồl bơyai lơh neh jàu gai lòng ai ală cau pơrlòng geh khà 1, khà 2, khà 3 tàm ală tơngume pơrlòng.

Jàu bồng bi mpồl bal ai ală mpồl geh cồng nha jak tàm tơl tơngume pơrlòng mờ khà 1, khà 2, khà 3 gùt mpồl ai tơl gah cau tus bal pơrlòng in. Dơ̆ pơrlòng ntoat geh lơh pah nam nàng kờñ lơh gơlik bơta niam ai ală cau pơrlòng in tus bal pơrlòng, tìp mat lơh kwèng, cribơyai mờng chài mờ tơngume bơta mờng chài lơh broă, pơgồp bơnah sơlơ tơnguh broă lơh tàp ntoat mờ sơlơ tơnguh srơh tàp pràn să jan làng bol bơtàu tơnguh.