Mò Lê Thị Trúc Linh, Phó Kwang atbồ Sở Văn hóa, Thể thao mờ Zu lịc càr Dăk Nông pà git, di tơngkah 20 nam ngai crơng gơs wơl càr, đơs lài khà nac lòt sền rơp gơguh uă nisơna. Sở bal mờ Ủy ƀan Ñân zân ală kơnhoàl neh lòt sền ală anih ơm wơl bè bơta pràn lơh broă drơng ala, mờ kung sồr lơh niam wơl ală broă lơh nàng tơnguh bơta niam drơng nac lòt nhơl in. 

Jat hơ̆, tàm ƀòn dờng Gia Nghĩa mờ ală kơnhoàl rềp bal là Dăk Glong, Dăk Rlâp, Dăk Song, Dăk Mil, geh mờr 200 anih ơm wơl gơtùi drơng rlau 7 rbô 100 nă nac pah ngai. Bal mờ hơ̆, ală kơnhoàl tờm ngan tàm ală tour, gùng lòt nhơl Kông viên điạ cất gùt plai ù UNESCO Dăk Nông bè Krông Nô, Dăk Glong, Cư Jút, ală anih ơm wơl kung neh tơnguh bơta niam rơcang lài drơng nac lòt nhơl in. Di dơ̆ do, nac lòt nhơl kung gơtùi sền git bè rài kis, niam chài, phan sa bơh làng bol ală jơi bơtiàn Dăk Nông dê tàm ală anih lòt nhơl mpồl bơtiàn.