Broă lơh bơto wơl Sơng gơr yô - Mồng pe - Cing pram là broă lơh tàm tơngume Rơndap broă lơh dềt sồ 6 Broă lơh jơnau kờñ dà lơgar bơtàu tơnguh lơh sa - mpồl bơtiàn tiah làng bol jơi bơtiàn dồ êt nă cau mờ tiah kơh bơnơm bè “Prap gàr, lơh niam bơta niam chài bơh yau niam bơnĕ ală jơi bơtiàn dồ êt nă cau dê pơgồp bal mờ bơtàu tơnguh lòt nhơl” bơh Sờh Niam chài, Tàp pràn să jan mờ Lòt nhơl càr Dăk Lăk lơh.

Tàm rlau 2 nhai bơsram, ală kơnòm bơsram Hìu bơsram kâp pe kòn cau ơm sa ngai Đinh Núp, sàh Phú Mỡ mờ ală ơruh pơnu sàh Xuân Lãnh geh ală cau chài bơto wơl bơta chài jañ sơng gơr yô, jañ mồng pe, dròng cing pram chài rơgơi; lơh ngan ngồn ală jơnau tamya xoang pơgồp bal mờ tơl bơta rơlĕ, ndang cing dê, tơl jơnau cing. Mò Nguyễn Thụy Phương Hiếu, Phó Kwang lam bồ Sờh Niam chài, Tàp pràn să jan mờ Lòt nhơl càr Dăk Lăk pà git, bơh tŭ tơngai geh ală cau chài bơto wơl lơh ngan ngồn jañ sơng gơr yô, jañ mồng pe, dròng cing pram, ală oh neh git bơta chài jañ mờ dròng mhar ngan, kờñ ngan tàp mờ gơtùi lơh niam ală jơnau cing mồng gơ jat bal mờ ală dơ̆ lơh chờ, lơh yàng ờs mờng jơi bơtiàn he dê. Tơnơ̆ ơdŭ bơsram do, ală oh digơlan geh bơto pơlam, tàp nàng gơ gơs ală cau tờm tàm pơrdờn wơl broă prap gàr ală bơta kuơ niam chài bơh yau niam bơnĕ jơi bơtiàn he dê:

“Ală sau geh bơta gơguh jak uă ngan. Kơnờm geh ală cau chài bơto wơl, ală oh bơh sơn rờp neh git loh mờ dròng niam ngan ală jơnau cing kung bè lơh ală jơnau tamya xoang. Do là bơta sơn đờm ƀuơn ngan. Sờh kơp kờñ hìu bơsram rơp pơn jat tai bơt bơtàu mpồl kơnòm bơsram do gơ gơs dùl mpồl tờm ngan nàng lơh niam tàm tơngai tus. Bơh hơ̆, ală oh rơp geh uă tŭ niam nàng lòt tus bal ală dơ̆ pơrlòng, ală dơ̆ bơyai lơh, ờ mìng tàm mpồl bơtiàn mờ gam tàm ală hìu bơsram kòn cau ơm sa bic tơn mờ ală hìu bơsram tàm ù tiah càr dê nàng tìp mat lơh kwèng, bơsram, đòm jat, pơgồp bơnah prap gàr niam chài jơi bơtiàn he dê”.

Niam chài bơyai lơh Sơng gơr yô - Mồng pe - Cing pram là bơta gơ bơrlŭ bal bơh pe bơta đờng goòng là Sơng gơr yô - Mồng pe - Cing pram tàm sap ntas gùng đơs crih, bơta rơlĕ, ndang mờ dà đơs bơh rùp să jan nàng lơh gơs dùl bơta niam chài bơyai lơh krơi is in. Sap ntas bơh Sơng gơr yô - Mồng pe - Cing pram dê geh uă bơta krơi is, cèng ală bơta kuơ niam chài kòn bơnus niam ngan. Tài geh gơtha kuơmàng bè hơ̆ den tàng nam 2015, Niam chài bơyai lơh Sơng gơr yô - Mồng pe - Cing pram geh Ƀộ Niam chài, Tàp pràn să jan mờ Lòt nhơl dờp là phan lời wơl niam chài ờ di phan bơna kâp dà lơgar. Broă bơyai lơh chờ tàm dơ̆ bồ nam pa ờ mìng là dơ̆ bơ tòm tơrgùm mat niam chài mpồl bơtiàn mờ gam là broă lơh ngan ngồn prap gàr mờ lơh niam bơta kuơ phan lời wơl niam chài dê. Ồng La Văn Hãng - Lam bồ Cơldŭ Niam chài sàh Xuân Lãnh, càr Dăk Lăk pà git:

“Bơh nam 2016 tus tŭ do, ƀòn lơgar neh gàr sùm bơyai lơh dơ̆ lơh chờ do nàng gàr sùm mờ lơh niam bơta niam chài làng bol jơi bơtiàn dồ êt nă cau tàm Xí Thoại đơs is mờ Xuân Lãnh đơs bal. Bol hi lơh ngan là bulah tơnơ̆ tŭ tơmut bal lam lơh gơnoar atbồ ƀòn lơgar 2 kâp bulah kal ke kàr lơi den bol hi kung gam gàr sùm bơyai lơh nàng lơh gơlik bơta niam ai làng bol ală jơi bơtiàn dồ êt nă cau in tìp mat lơh kwèng, bơsram, đòm jat bal mờ gơp mờ pơn jat tai sền gàr, lơh niam bơta niam chài jơi bơtiàn he dê”.

Sơng gơr yô - Mồng pe - Cing pram là bơta niam chài krơi is làng bol kòn cau Bahnar mờ Prum dê, geh sền gàr mờ tàm pơrdờn wơl bơh uă rơnàng. Bơh ală dơ̆ lơh chờ mpồl bơtiàn tus ơdŭ bơsram tŭ do, sap sơng gơr, sap mồng, sap cing kung gam mpong ntas, tàm tơrbŏ bal rơnàng kơnòm să mờ bơhiàn bơh yau jơi bơtiàn he dê. Broă gah lơh broă geh gơnoar càr Dăk Lăk lam lơh bơto wơl ală kơnòm bơsram in ờ mìng pơgồp bơnah prap gàr dùl phan lời wơl niam chài kuơmàng, mờ gam lơh gơlik tai ală bơta tờm là cau kơnòm să nàng bơta niam hơ̆ pơn jat tai geh sền gàr, lơh niam mờ gơ rề uă tàm rài kis tŭ do.