Dơ̆ tàm pơrlòng ntoăt gơ hòi gơ jà rlau 600 nă cau tus bal tàm jơh gùt lơgar cih mat dan tus bal, tàm hơ̆ geh dùl nă cau tàm pơrlòng lơgar Nhờk. Ală cau tus bal tàm pơrlòng gơwèt uă sơnam krơi is, dềt ngan rlau jơh là 5,6 sơnam mờ dờng sơnam ngan rlau jơh là 72 sơnam.

Mờ bơta jòng là 5 kơi sồ mờ 24 kơi sồ, ală cau tus bal tàm pơrlòng ntoăt bơh 5 jiơ drim, ntoăt jat ală gơl gùng drà tàm dơlam tiah drà tàm tiah drà pa tàm kơi sồ 7, sơnah ƀònTân An, ƀòn dờng Buôn Ma Thuột. Cau tus bal  tàm pơrlòng ntoăt jơh ală bơta jòng do ndrờm geh dờp gai lòng kir sơnrai. Tơn jơh dơ̆ tàm pơrlòng ntoăt, mpồl bơyai lơh neh jàu 20 khà jờng; khà 1, khà 2, khà 3 ai ală cau tus bal cau klau, cau ùr lơh geh cồng nha jak ngan rlau jơh tàm ală gùng ntoăt dê.