Nùs kờñ gơboh mờ bơta kờñ ngan mờ săp ntas dròng cing gơlơh bè neh gơmŭt jrô tàm să tàm puăc mhàm bơh cau chài Cil Ha Ôñ dê bơh tŭ ồng gam kơmòm ngan. Ồng yal wơl, tŭ hơ̆ ồng sùm lòt jăt mè bèp tus sền ală dơ̆ lơh chờ lơh yàng pơrjum ñô sa dờng dềt, bè: Chờ sa piang kòi pa, lơh yàng duh khuai yàng kơh yàng bơnơm, yàng dà lài mờ tŭ rồ ù lơh sươn lơh mìr răc dan mờ yàng ai pà dồ kàl lơh sa geh tơnhàu uă. Tŭ dờng, ồng kung sùm geh lòt jăt ală cau kra, cau kwang ƀòn lòt dròng cing tàm uă tiah tàm càr, bè: Dam Rong, Lâm Hà, Đức Trọng, Di Linh...Mờ tŭ do, bulah neh tàm sơnam 90 sơnam mơya sền gŏ săp ntas dròng cing bơh làng bol he dê geh pơhìn hŭi roh tĕ, ồng Cil Ha Ôñ bal mờ bàr pe nă cau chài ndai tàm ƀòn lơgar kung gam pơn jăt tai kơ̆ nùs, jơh nùs hòi jà oh kòn, kòn sau, jơi nòi mờ làng bol ƀòn lơgar tus bal prăp gàr, sền gàr niam chài cing mồng mơkung pờ uă ơdŭ bơto wơl bơta chài dròng cing ai oh kòn kòn sau in. Ồng Cil Ha Ôñ, yal:  Añ kờñ ngan bơto wơl bơta chài dròng cing ai ală rơnàng kơnòm să in nàng bơhiàn niam chài bơh mò pàng he dê lời wơl gam prăp gàr wơl jŏ jòng tus rài tơnơ̆ do. Añ kung sùm lam ală mpồl dròng cing, tàm hơ̆ geh mpồl cing kơnòm să lòt dròng tàm ală dơ̆ bè lòt lăp bau, ñô bau, tŭ ƀòn lơgar geh jơnau sồr den añ kung sùm hòi ală bol kơnòm mờ añ neh bơto hơ̆ lòt dròng bal.

Ơdŭ bơto dròng cing pa ndo ngan rlau jơh mờ ồng Cil Ha Ôñ dê tus bal bơto geh lơh tàm xã Dà Sar bal mờ 30 nă cau bơsram là cau klau, cau ùr đoàn viên, ơruh pơnu kòn cau K’Ho sơnam bơh 15 tus 30 tus bơh ală thôn, ƀòn tàm ù tiah xã Dà Sar. Ơdŭ bơsram do gơ ơm tàm Rơndăp broă lơh “Prăp gàr, ngui niam bơta niam chài niam bơnĕ bơh jơi bơtiàn dồ êt nă cau dê gơ jăt bal mờ bơtàu tơnguh lòt nhơl” tàm ù tiah càr Lâm Đồng dê, bơh Sở Văn hoá, Thể thao mờ Zu lịc càr Lâm Đồng pơgồp bal mờ kơnhoàl Lạc Dương bơyai lơh. Ồng Cil Ha Ôñ pà gĭt, ală bol kơnòm lòt bơsram ơdŭ do rơ̆p geh bơto yal bè bơta chài dròng mờ dròng cing, bơta chài dròng ai cau in sền, broă chài ngui cing ntas di. Tơnơ̆ tŭ bơsram, ală cau bơsram geh jơnau sồr là gĭt dròng cing chài ngan mờ chài dròng geh êt ngan là bơh 2 tus 3 jơnau cing tờm ngan, bè: chờ hờp wă rò năc lòt nhơl mờ hìu bơnhă, chờ ñô lir bong, chờ sơnam pa...Ồng ờ gŏ kah do neh là ơdŭ nđờ mờ ồng neh lòt bơto bơta chài dròng cing, mìng gơn kơnờm bơh hơ̆ pơgồp dồ bơnah dềt rơhền bơta pràn bơh he dê tàm broă prăp gàr, sền gàr niam chài cing mồng pàng yau he dê. Mơya nàng ngui niam bơta kwơ niam chài ờs mờng bơh yau mò pàng he dê do, kờñ ngan bơta tơrgùm bal pràn dồ nùs bal bơh jơh ală ƀòn lơgar dê. Ồng Cil Ha Ôñ, đơs tai: Tài bơh dồ nơm chi gŏ gơtùi lơh gơs dồ nơm bơnơm den tài, uă chi den hơ̆ sồng gơtùi lơh gơs dồ nơm brê dờng, den tàng bè hơ̆ añ kơ̆p kờñ làng bol ƀòn lơgar he dê pal dồ nùs dồ tồr bal mờ gơ̆p. Tài bè hơ̆ làng bol mờ dà lơgar pal dồ nùs bal mờ gơ̆p lơh broă lơh sa, sền gròi kơlôi rơcăng lơh sa nàng bơtàu tơnguh. Oh kòn kòn sau pal kơlôi rơcăng tàm broă bơsram sră, geh bè hơ̆ den hơ̆ sồng bơtàu tơnguh kơ̆ kơl jăp jŏ jòng.

Jăt ồng Kră Jañ Ha Nrang, kwang bàng niam chài xã Dà Sar dê yal, bơh bơta bơto pơlam bơh ồng Cil Ha Ôñ dê mờ bàr pe nă cau chài ndai tàm ƀòn lơgar, uă ơruh pơnu tàm xã neh gơtùi dròng jơh ală jơnau cing bơh kòn cau he dê. Tus tŭ do, xã Dà Sar neh lơh geh Mpồl dròng cing mờng chài ngan, sùm lòt dròng cing tàm ală dơ̆ bơh ƀòn lơgar dê bơyai lơh. Do ờ mìng là bơta chờ hờp gơ wèt mờ ală cau chài lơm mờ gam là bơta chờ hờp bơh xã dê tŭ ờ lời bơta niam chài cing mồng gơtìp hŭi roh tĕ. Ồng Kră Jañ Ha Nrang, đơs: Tàm do ờ geh cau lơi gĭt bè cing mồng ờ, cau chài Cil Ha Ôñ jơh nùs ngan tŭ gơnoar ătbồ tiah do sồr bơto ơdŭ bơto dròng cing ai bol kơnòm in den ồng jơh nùs ngan dờn dờ tơn. Tus tŭ do, ồng kung gam jơh nùs ngan tus bal bơto yal wơl mờ ồng kung gam jơh nùs ngan tus bal lơh niam wơl ală jơnau cing, bơto pơlam ală bol kơnòm dròng bè lơi gơ in ntas di mờ jơnau cing bơh kòn cau K’Ho he dê.

Bal mờ Mpồl cing xã Dà Sar, kơnhoàl Lạc Dương gam geh 5 mpồl cing ndai mờ mờr 15 mpồl cing tàm hìu bơnhă rah rài tàm thị trấn Lạc Dương mờ ală tiah lòt nhơl, bè: Lang Biang, Ƀòn Cù Lần, Brê Dà lơgar Bidoup- Bơnơm Mò. Ală mpồl cing dờng dềt do mìng dròng ai năc lòt nhơl in sền chờ hờp lơm. Bơta pal đơs, uă ngan ală cau bơh mpồl cing dờng dềt do dê ndrờm geh bơta jơh nùs jơh tồr bơto yal wơl bơh ồng Cil Ha Ôñ dê.