Tờm khuah pròc iar là tờm chi jơnhoa bơh 4 tus 10 thơk, bơkào kò gơlik jat sơyùr, hòn uă tàm tiah Tây Nguyên mờ bàr pe tiah ndai bè tiah đah Jum mat tơngai mut Dà lơgar. Tờm So đũa sùm gơlik bơkào tàm nhai 11 tus nhai 02 nam tơnơ̆ den bơtơ̆t plai. Tờm khuah pròc iar gơtùi tam lơh niam ù tiah mờ kung là phan sa bơkah geh uă bơta pràn ai să jan in.

Kòn cau Rơđê sùm ngui bơh nha lơbơn, tus bơkào, plai khuah pròc iar nàng trŭ gơm ală phan sa bơkah ngan. Jat bơta krơi is phan sa bơh tơl kơnhoàl ù tiah dê mờ geh ală broă trŭ gơm bơh bơkào khuah pròc iar dê kung krơi is sơl, kòn cau Rơđê Bih tàm kơnhoàl Krông Ana geh broă trŭ gơm mờr ndrờm mờ làng bol tiah đah Jum mat tơngai mut Dà lơgar dê là gơm bal mờ phan tàm dà ris bè ka ti, ka. Bi H’Nuah Êban, ơm tàm Buôn Trấp, thị trấn Buôn Trấp, kơnhoàl Krông Ana, càr Dăk Lăk đơs, do là phan sa mờng kwèng mờ làng bol, trồ tiah mrềt gơm tai biăp bơtăng dồ ết, hòi, lơngồt mờ bơkah ngan bơh bơkào khuah pròc iar dê gơ kờñ ngan. Bi H’Nuah Êban, đơs: “Bol añ sùm gơm bơkào khuah pròc iar  bal mờ blơn bơtang mờ ka dà dờng. Gơm bal mờ uă mrĕ hòi, hàñ kòn cau, nha é. Bơkào den plờs sang ngkòng mờ buài bơkào dê. Gơm bal mờ blơn bơtang den mìng koh dồ ết blơn lơm, mơya ờ gơtùi ờ geh mrĕ hòi, nha é mờ hàñ kòn cau. Bơdìh hơ̆ den gơm bal mờ ka kŭp bơh tàm dà dờng”.

Ai bi H’Rut Niê, ơm tàm Buôn Ky, sơnah ƀòn Thành Nhất, ƀòn dờng Buôn Ma Thuột, càr Dăk Lăk đơs, phan sa gơm bơh bơkào khuah pròc iar sùm geh tàm ală dơ̆ sào sa tŭ lòt lơh broă tàm mìr pĭc plai kơphê, tài bơh phan trŭ gơm ƀuơn ngan jòi geh, ƀuơn ngan trŭ gơm mờ bơkah ngan. Tờm do ƀuơn ngan hòn, rơ sìh gar tàm suơn hìu, tàm mìr là tờm rơ̆p hòn is. Tờm sơlơ dờng den bơkào sơlơ uă. Geh uă broă trŭ gơm ală phan sa bơh bơkào khuah pròc iar dê, gơtùi hồl cĭk mờ dà màn, halà chàng bal mờ poăc sur, poăc kơnrồ halà poăc iar mơya broă trŭ gơm mờ làng bol kờñ ngan rlau jơh hơ̆ kung gam là chàng bal mờ ka ro halà ka hấp. Bi H’Rut Niê, đơs:“Tàm ală nhai trồ tiah mrềt ờ gơtùi ờ geh phan sa trŭ gơm bơh bơkào khuah pròc iar ờ. Añ sùm pĭc bơkào rào goh, plơs ngkòng, tơnơ̆ hơ̆ chàng bal mờ ka ro halà ka hấp mờ tĕ tai ală phan tĕ bè: ƀòk ngòk, mrĕ, boh, hàñ kòn cau. Phan sa bơh kòn cau Rơđê he dê ngan là bơkah ngan”.

Bi H’Rut Niê pà gĭt tai, broă trŭ gơm nàng bơkào khuah pròc iar in tơl bơkah jat broă trŭ gơm ƀòn lơgar dê hơ̆ là chàng is lài ka ro, tơnơ̆ hơ̆ chàng bơkào so đũa mờ tŭ bơkào pa sin den tĕ ka ro, ka rì tĕ tai ală phan tĕ, bè hơ̆ rơ̆p lời wơl bơta rơbă bơh ka mờ bơta bơtang dồ ết bơh bơkào khuah pròc iar dê. Mờ dùl phan tĕ ờ gơtùi ờ geh hơ̆ là hàñ kòn cau pal geh chàng bô bơkah ngan lài mờ tŭ chàng bơkào khuah pròc iar tàm chèng.

Mờ broă trŭ gơm ƀuơn ngan mơya bơta bơkah is rơmĭt, bơkào khuah pròc iar là phan sa mờng kwèng tam dơ̆ sào sa bơh kòn cau Rơđê dê. Phan sa lơh kah wơl ală ngai trồ tơngai mrềt nggui kềng gah bơnhă ồs hơng bô bơkah ngan geh bal dồ ết bơtang, dô ết lơngồt bơh bơkào khuah pròc iar dê. Bulah ƀuơn ngan bè hơ̆ mơya lơh cau lơi lòt tàm tiah ngài kung rơ̆p kah sùm phan sa do.