Xã Dăk Ha, kơnhoàl Dăk Glong là dùl tàm ală tiah tus tàm gơl gùng “ jơnau đơs crih pơn rơ ngan bơh dà mờ ồs dê” tàm phan lời wơl Kông viên địa cất gùt plai ù UNESCO Dăk Nông. Ồng K’ Bang, kòn cau M’nông, cau chài tàñ phan ơm tàm ƀòn Ting Wel Đăng, xã Đăk Ha, pà gĭt, broă càr sac rơwah ƀòn là tiah ơm bơh phan lời wơl mờ pơlam gùng dà bơt bơtàu lòt nhơl mpồl bơtiàn dê neh pờ geh gùng dà bơtàu tơnguh lơh sa ai làng bol in. Kòn cau M’nông tiah do gam rcang lài nùs nhơm nàng mut gơ rờm bal bal mờ gùng dà bơtàu tơnguh lòt nhơl mờ drơng broă. Ồng K’ Bang, đơs:“Gah broă bơh yau bơh jơi bơtiàn he dê tŭ do bơtàu tơnguh ngan, drơng jơnau kờñ ngui jài, tăc ai năc lòt nhơl in jài. Bè tàñ phan do là cau klau tàm ƀòn cau lơi kung pal gĭt, prap gàr broă jài mờ lơh geh priă jền tai”.

Kung tàm gùng lòt rê tàm tiah phan lời wơl Kông viên địa cất gùt plai ù UNESCO Dăk Nông, kơnhoàl Krông Nô là kơnhoàl geh uă ngan tiah hàng niam, ù tiah niam bơnĕ geh is mờ ală mpồl bơtiàn làng bol jơi bơtiàn dồ ết nă cau gam cèng uă ngan bơhiàn niam bơnĕ bơh yau dê. Ồng Y Suơ Hlong, ơm tàm ƀòn Dru, thị trấn Dăk Mâm, kơnhoàl Krông Nô, pơn yờ să ngan tŭ tiah ồng ơm kis là dùl tàm ală ù tiah cèng bềng bơhiàn niam chài niam bơnĕ ngan mờ geh uă ù tiah niam ngan tiơng pơn rơ ngan. Tàm hơ̆ gơtùi đơs tus ñjùh dà Dray Sáp, ală rơgồng bơnơm ồs. Ồng Y Suơ Hlong, đơs:“Añ chờ hờp ngan tŭ sền gŏ ală ù tiah hàng niam bè ñjùh dà Dray Sáp halà rơ gồng bơnơm ồs geh tơmut tàm broă ai ngui, ngui niam bal mờ bơta niam chài bơh yau nàng bơtàu tơnguh lơh sa, mpồl bơtiàn. Uă làng bol kung neh tus bal mờ geh ală drơng broă lòt nhơl, rài kis sơlơ bơtàu tơnguh”.

Mò Tôn Thị Ngọc Hạnh, Phó Củ tịc Ủy ƀan Ñân zân càr Dăk Nông pà gĭt, càr geh trồ tiah ai pà gời, phan kwơ lòt nhơl li la uă ngan, geh uă ngan ù tiah hàng niam brê bơnơm dờng ơning ơnàng, tiah hàng niam, ù tiah niam bơnĕ ngan. Dùl ròt ñjù dà dờng ngan gơ ơm mpồn tàm ală bă brê dờng bè Dăk G’lun, Dray Sáp, Gia Long, Trinh Nữ... Bal mờ hơ̆ là ală rơ gồng bơnơm ồs, Tiah prap gàr ù tiah brê bơnơm Nâm Nung, Brê Dà lơgar Tà Dùng, Tơnau dà  Tà Dùng mờ mờr 40 bồt dờng, dềt geh pơn yơu bè “Pòt Hạ Long tàm Tây Nguyên”. Ngan là, Dăk Nông geh uă bơhiàn niam chài bơh yau mờ 40 jơi bơtiàn oh mi ơm kis bal. Jơh ală bơta hơ̆ lơh geh dùl ù tiah is geh Kông viên địa cất gùt plai ù UNESCO Dăk Nông.

Nàng ngui niam bơta ƀuơn, bơta pràn hơ̆, Nghị quyết Pơrjum dờng Đảng ƀộ càr Dăk Nông dơ̆ XII sền gĭt broă bơtàu tơnguh lòt nhơl là dùl tàm ală 3 broă lơh tờm lơh sa bơh càr dê. Mò Tôn Thị Ngọc Hạnh, pà gĭt, mờ ală broă lơh di ngan, đơng lam ngan ngồn, tàm ală nam do, càr Dăk Nông gam hời rơ hời ai gah lòt nhơl geh cih tàm sră wăc sềr ù tiah dunia dê. Mò Tôn Thị Ngọc Hạnh, pà gĭt: “Nàng lơh dùl ròt bal, pơgồp bal mờ jơh ală bơta là broă lơh kờñ pal geh mờ bol añ neh hời rơ hời lơh geh ală broă lơh, ală tiah geh lơh ngan ngồn bơh broă bơto bơtê, yờ tơnguh uă bơta gĭt wă mpồl bơtiàn dê. Lơh bè lơi nàng làng bol gơtùi gĭt wă, tam klăc bal mờ làng bol ngan là cau tờm bơh broă prap gàr, ngui niam, bơtàu tơnguh ală phan lời wơl, tơl broă lơh geh gàr niam, ràng tơlik wơl, lơh jat niam, bơtàu tơnguh, prap gàr ală bơhiàn yau niam bơnĕ bơh ală jơi bơtiàn. Prap gàr niam chài là phan bơna ai bơtàu tơnguh lòt nhơl mờ lòt bal mờ bơtàu tơnguh lơh sa, mpồl bơtiàn bơh càr dê”.

Jat tàm bơnàng jă bơta niam chài niam ngan, ù tiah brê bơnơm dờng ơning ơnàng, nhơm trồ tiah tàm tiah niam gùt nam lơngơm mrềt, bal mờ ală pơlam gùng dà bơcri priă di ngan, kơ̆p kờñ tàm rài tơnơ̆ do ờ ngài, lòt nhơl càr Dăk Nông rơ̆p brồ guh pràn kơl dang, gơ hòi jà năc lòt nhơl rê tàm tiah phan lời wơl Kông viên địa cất gùt plai ù UNESCO Dăk Nông.