Ală ngai bồ nam pa, ai tŭ ru broă suơn sre, mò H’Lep Niê (mat mờng hòi là mè Khuýt dê) ơm tàm ƀòn Buôr, xã Hòa Xuân, ƀòn dờng Buôn Ma Thuột nggui kềng bơrnơ̆ tàñ phan. Mò gam lơh sir blah ồi mờ uă rùp hin bơka sền krơi ngan rùp plai trám tam gơl pa. Do là rùp bơka bơh yau, ờ huan sền gŏ ngan, mò pa bơsram bơh ơdŭ bơto tàñ phan: "Cau Rơđê geh uă ngan rùp bơka bè tàm sơ ging, 2 gùng bơka, ntê chi, sơna kam, uă ngan rùp bơka. Ală bơta rùp bơka hơ̆ den añ kung neh tàñ jơh. Tŭ do jòi git tai sền geh rùp bơka lơi pa halà ờ den añ kung kờn bơsram tai, bulah añ neh dờng sơnam mơya añ kung kờñ git uă rlau tai den añ kung gam cih mat dan bơsram”.

Ơdŭ bơto broă tàñ ồi bơh mò H’Bion Bkrông (mat mờng hòi là mò K’dăm Săn dê) ơm tàm ƀòn Cư Dluê, xã Hòa Xuân pơlam. Neh rlau 60 sơnam, mò H’Bion geh mờr 50 nam đềt mềr mờ broă tàñ ồi. Mò yal, rơp bơto wơl ală bơta lơi mò git ai ală oh mi cau ùr kờñ pơn jat tai prap gàr mờ ngui niam broă tàñ ồi kòn cau bơh yau: “Mìng kơp kờñ geh pràn kơldang nàng bơto wơl ală oh mi cau ùr, kòn sau in bơta chài tàñ, bơta chài dang che brài, bơta chài koh, mai. Añ rơp bơto bơta chài khòm dang che brài, rơndap ơn che brài, rơndap lơh rùp bơka, bơta chài tơnguh bơrnơ̆ tàñ, mòn gơs rùp bơka, tàñ rùp bơka, bơh ală rùp bơka dềt tus rùp bơka dờng, bơh rùp bơka ƀuơn tus kal ke, Dơ̆ 2 là kung kơp kờñ ală kòn sau kờñ bơsram tàñ, bơsram mai nàng prap gàr”.

Ơdŭ bơto broă tàñ ồi là dùl tàm ală broă lơh bơh Mpồl tàñ ồi kòn cau bơh yau cau Rơđê dê tàm ƀòn Drai Hling, xã Hoà Xuân. Jat hơ̆, tơnơ̆ tŭ crơng gơs tàm nhai 9 nam 2023, Mpồl neh bơ tòm tơrgùm geh mờr 30 nă oh mi cau ùr kờñ bơsram mờ sền gàr broă tàñ ồi kòn cau. Ală bi geh cau chài bơto wơl ală bơta chài tàñ ồi, bơta chài dang che brài tàm bơrbơ̆, rơndap che brài gơs rùp bơka mờ lơh lài rùp hin tơl phan tàñ ngan ngồn. Bal ờ hơ̆, mpồl geh dong kờl bơrnơ̆ tàñ, măi vắt sổ, măi jing… nàng cau bơsram in lơh ngan ngồn. Bi H’Nga Byă, cau atbồ mpồl pà git: “Mờr tus, bol hi rơp hòi jà oh mi cau ùr tơrgùm bal, mòn ală phan kòn cau bè ồi àu, kơldung triau, ồi ntròñ, ồi tơ̆ jat bơhiàn bơh yau nàng ờ gơtìp roh huĭ broă lơh bơh yau mò pàng dê”.

Jat ồng Từ Văn Hợi, Củ tịc Ủy ƀan Ñân zân xã Hoà Xuân pà git, broă crơng gơs Mpồl tàñ ồi kòn cau lơh jat bro rơndap lơh bơh Sở Văn hóa, Thể thao mờ Zu lịc càr Dăk Lăk dê bè rơndap broă “Prap gàr, ngui niam bơta kuơ niam chài bơh yau niam bơnĕ bơh ală jơi bơtiàn dồ êt nă cau dê gơ jat bal mờ bơtàu tơnguh lòt nhơl”, gơ wèt broă lơh Jơnau kờñ dà lơgar bơtàu tơnguh lơh sa mpồl bơtiàn tiah làng bol jơi bơtiàn dồ êt nă cau mờ tiah kơh bơnơm, tơngai bơh nam 2021 tus nam 2030. Gùng dà ai tơlik lài bơh xã dê rơp bơtàu tơnguh niam chài gơ jat bal mờ lòt nhơl mpồl bơtiàn: “Crơng gơs Mpồl tàñ ồi kòn cau nàng ngui niam bơhiàn bơh yau bơta kuơ mờ wèt tus jơnau kờñ jŏ jòng là rơp bal mờ lòt nhơl mpồl bơtiàn nàng yal tơnggit ală phan bơna, ală bơta niam chài bơh yau cau Rơđê tàm xã Hòa Xuân dê, pơgồp bơnah bal mờ làng bol kòn cau tàm càr, ƀòn dờng yal tơnggit ală bơta niam chài bơh kòn cau dê neh prap gàr, lời wơl”.

Nam pa 2024 do, sap ntas bơrnơ̆ tàñ ồi rơhời geh mat tàm hìu jòng bơh ală oh mi cau ùr Rơđê tàm xã Hòa Xuân, ƀòn dờng Buôn Ma Thuột dê. Tàm nùs nhơm nam pa chờ hờp, ală sap ntas rơlĕ rơlùn, ală mpàng tê ngac ngar gam tàñ gơs ală rùp hin niam bơnĕ kơp kơnờm tàm ală blah ồi kòn cau Rơđê.