Bal mờ 18 mpồl tus bal ràng tơlik, Măng chờ Ào kăp mờ Phan soh jơi bơtiàn yal tơnggĭt uă bơta niam chài is bơh ală jơi bơtiàn dê, ù tiah ƀòn lơgar dê tìp bal tàm Dăk Lăk. Bơh àu kăp, àu puan tiah tus phan soh ồi kòn cau Rơđê, Jrai, M’Nông, Thái, Tày, Mường…tơl bơnah ràng tơlik tơnggŏ dùl bơhiàn is tàm bơta li la niam chài càr Dăk Lăk dê tơnơ̆ tŭ tơrgùm bal dùl.

Tus bal ràng tơlik là ală kwang bàng, cau tàm mpồl cau ùr, cau lơh broă sa, ùr geh bồ tơngoh jak, ùr cau kă bro mờ cau ùr tàm mpồl phàu crong. Ală mpồl cèng tus mpràp ală phan soh ờs mờng bơh yau bal ală bơceh mai pa rài do, pơgồp bal mờ rùp bơka ồi mờ àu kăp.

Tàm phan soh kòn cau Thái dê, bi Hoàng Thị Dương, tus bơh sàh Buôn Đôn yal, do là tŭ nàng cau tàm mpồl cau ùr tàm ală ƀòn lơgar tam tìp, lơh kwèng mờ lùp nàng gĭt tai bè niam chài bơh ală jơi bơtiàn dê.

“Do là dùl ngai chờ bơh cau ùr dê mơkung là tŭ niam nàng cau ùr tàm tơrbŏ đah oh mi cau ùr mờ ală Mpồl Cau ùr ală sàh dê. Bè ờs bol he là ờ ru ngan, ờ geh tŭ jiơ nàng tìp măt lơh kwèng mờ gơ̆p mờ do là dùl tŭ niam nàng oh mi cau ùr in tìp măt lơh kwèng, tàm tơrbŏ, lùp bơsram bal mờ gơ̆p mờ kung lùp nàng gĭt geh tai uă bơhiàn krơi is bơh tơl ù tiah ƀòn lơgar dê”.

Bal mờ lơh broă jờng rơ niam chài ờs mờng bơh yau dê, broă lơh gam tơlik măt Mpồl KOLs  KOCs Dăk Lăk, nàng kờñ tơrbŏ bal cau lơh broă sa, mpồl lơh broă bal mờ ală cau bơceh tơngume, yal tơnggĭt mờ tăc phan tàm anih sồ. Mò H’Giang Niê, Chủ tịch Mpồl Cau lơh broă sa càr Dăk Lăk đơs là, geh tai uă cau lơh broă sa gơgơs ală cau geh gơrềng tàm internet mpồl bơtiàn mờ tơngguh uă cồng nha lơh broă bơh mpồl dê, kung là broă tă pơgồp ai bơta bơtàu tơngguh bơh broă lơh sa sươn sre ƀòn lơgar dê in.

“Bol hi kơ̆p gơn là mpồl KOLs, KOC càr dê rơ̆p tàm tơrbŏ tai uă drà dờng tàm ù tiah jơh gùt lơgar đơs bal mờ geh tŭ là lòt tus dunia tơn, lơh geh dùl mpồl nàng kờñ yal uă ală phan bơna càr Dăk Lăk dê đơs is mờ ală càr ndai tàm jơh gùt lơgar dê đơs bal. Bơh mpồl do, bol hi kờñ bơto gơgơs dùl rơnàng cau lơh broă sa duh hồl, bơceh lơh mờ pin dờn lòt tus drà kă bro sồ”.

Kung tàm dơ̆ do, tàm Buôn Ma Thuột, càr Dăk Lăk geh lơh ràng tơlik rùp biài bơrteh brài tu Dơng bơnơm. Hìu jòng, broă lơh ù buh, bơrnơ̆ tàñ ồi bal mờ ală rùp hiñ rềp mềl tàm rài kis làng bol Tây Nguyên dê geh ală cau chài wăc rùp wăc tàm biài bơrteh bơh ală gùng wăc lơbơn mờ bềng bơta ngoh rơngăc.

Trương Văn Linh là dùl nă cau chài wăc rùp, Lam bồ Gah Wăc mòn rùp niam chài, Klờng Kao đẳng Niam chài Đơs crih tam ya Dăk Lăk cèng tus ràng tơlik in 3 phan jăt broă lơh bềng bơta kơlôi sơnơng. Tàm hơ̆, pang rùp Phan pà bơh ù pơrhê dê geh ồng ai jơnau gơ dan bơh ù ƀazan mờ tờm kơphe, mơya ờ tơnggŏ bơh ală rùp hin yal tơnggĭt mùl màl mờng kwèng. Trương Văn Linh, cau chài wăc rùp yal:

“Kơphe Dăk Lăk dê neh geh tăc tus dunia, den añ ai jơnau gơtha là “Phan pà bơh ù pơrhê” dê mờ broă lơh pang rùp bềng jơnau kơlôi sơnơng. Tŭ cau ntàu tềng nđăp pang rùp, jăt bơta kah wơl bơh tơl nă cau dê den geh bơta gĭt gŏ is”.

Tơl pang rùp tàm ràng tơlik ndrờm tơnggŏ nùs nhơm bơh cau bơceh lơh dê gơ wèt mờ bă ù mờ niam chài Tây Nguyên. Ràng tơlik Brài bơrteh Dơng bơnơm bơyai lơh tàm Hìu prăp gàr phan kwơ yau Dunia Kơphe, Buôn Ma Thuột, càr Dăk Lăk pờ mpồng drơng cau sền in tus jơh ngai 30/10/2026.