Gam lòt tàm gùng dềt tàm bơnah brê bơh Brê dà lơgar Yok Đôn, tiah xã Krông Na, kơnhoàl Buôn Đôn, càr Dăk Lăk dê, rơ was me H’Blú sền gŏ phan sa den lơh tềl mơ ală rơ was ndai in git. Lòt jat ngkời rơ was H’Blú, rơ was dam Khăm Phanh kung sơrbac mhar ntoat hờ bồ đap nàng sa ală tờm prìt neh geh koh lờs. Tơnơ̆ tŭ sa jơh, bol gơ rơ lĕ rơlùn rê hờ gah dà dờng nàng hùc dà, um dà nàng nac lòt nhơl in tryăng sền.

Tơl broă lơh bơh 2 nơm rơ was dê ndrờm gơlik geh dồ bă geh is, ờ geh bơta rồn bơklơn halà geh jơnau sồr lơi bơh cau pơ đào dê. Nac lòt sền ơm tàm bơta yah ngài lơngăp lơngai, sền ală broă lơh bơh rơ was dê mờ iat cau pơlam lòt nhơl yal bè bơta geh is, jơnau tơnggit mờ kah yau pơ đào, sền gàr tơl nơm rơ was dê. Bi Phan Ngọc Quế Lâm, nac lòt nhơl tàm quận 11, ƀòn dờng Hồ Chí Minh tus bal dơ̆ lòt sền đơs: “Sền gŏ rơ was tàm tiah geh is, gŏ bol gơ khat gơboh he kung gơ lơh prài să jan sơl tŭ sền gŏ bơta niam bè hơ̆. Rơ was là dùl jơi phan kis tàm brê mờ dilah geh ơm tàm brê den sền gơ lơh niam dồ bă geh is rlau. Geh cau pơlam lòt nhơl yal uă jơnau tơnggit bè rơ was niam ngan mờ kơp kờñ là he geh git uă rlau tai bè bol gơ”.

Broă lơh lòt sền do là tour lòt nhơl brê bơnơm đềt mềr mờ rơ was bơh Brê dà lơgar Yok Đôn mờ Mpồl phan kis câu Á pơgồp bal lam lơh bơh nggùl nam 2018. Mờ jơnau kờñ sền gàr mpồl rơ was hìu tàm Dăk Lăk tềng đap bơta geh ngan ală rơ was ngai sơlơ kra, ờ sô, roh bơta khat gơboh, ờ jai tai lơh broă. Tŭ do, geh 10 nơm rơ was tus bal broă lơh, tàm hơ̆ geh 6 nơm rơ was me sùm ơm rềp mờ nac lòt nhơl. Jat bi Phạm Xuân Quỳnh, kwang bàng rơndap broă lơh bơh Mpồl phan kis câu Á pà git, ală rơ was tus bal broă lơh neh ngan ngồn geh khat gơboh ơm tàm ù tiah nggùl brê bơnơm, lik klàs bơh che srĭ mờ bơta kơryan kòn bơnus dê. Ala mờ nggui tềng ngkời rơ was, nac lòt nhơl geh tryăng sền rơ was bơh ngai, sền bol gơ sa, hùc dà, um, bic, lòt nhơl tàm brê… mờ ờ lơh gơ rềng tơn tus rài kis bol gơ dê: “Cau pơ đào rơ was ờ ià gai lòs, ờ ia mut dơm chi, mìng ngui phan ƀàn halà siam gơ in sa nàng rơ was pơgồp bal mờ he. He ngui ală broă lơh hơ̆ rơhời rơp dong rơ was rê wơl mờ ală bơta geh is gơ dê, gơ rơp gơtùi git gơ pal lòt jòi phan sa tềng lơi, sơm bời is kòp bè lơi, tàm sền gàr gơp bè lơi. Rơhời den nùs tồr rơ was dê niam rlau den pràn kơldang să jan gơ dê kung niam rlau. Phan sa, dà hùc den di bè ală bơta lơi mờ gơ kờñ. Bơta niam rơ was dê geh tơnguh rlau tai”.

Tàm 6 nam do, Brê dà lơgar Yok Đôn wă rò nac lòt nhơl tus sền tour lòt nhơl brê bơnơm đềt mềr mờ rơ was. Nam 2023, tour lòt sền do geh Mpồl Kỷ lụk Việt Nam yal là 1 tàm 20 tour krơi is ngan rlau jơh Việt Nam. Bi Y Siêm Hđơk, cau pơlam lòt nhơl Brê dà lơgar Yok Đôn đơs là: Broă dờn dờp do ai gŏ, broă lơh ờ mìng cèng tus bơta gơ rềng niam tus jơi rơ was mờ tiah kis geh is mờ gam geh nac lòt nhơl kờñ ngan tai: “Tour lòt sền rơ was gam là tour gơ hòi gơ jà nac lòt nhơl tàm lơgar mờ lơgar ndai uă ngan rlau jơh, cèng wơl bơta kuơ niam chài ai ală rơ was in. Tàm tŭ lòt sền rơ was den he rơp mblàng wơl ală jơnau kờñ pơyua nac lòt nhơl in nàng khi sơlơ kờñ rơ was rlau tai”.

Kung mờ broă lơh lòt nhơl đềt mềr mờ rơ was, nac lòt nhơl tŭ tus mờ Brê dà lơgar Yok Đôn kung gơtùi sền git ală broă lơh ndai bè: đì plung tàm dà dờng Srêpôk, đàr ka, lơh sàl ơm wơl, tryăng sền mờ rùp hin ală jơi sềm, lòt jơng tàm brê, jòi git bè ù tiah brê dơm chi dờng… Ồng Vũ Đức Giỏi, Phó Kwang atbồ Anih tờm ƀơto bơsram tiah ơm kis mờ broă drơng ala, Brê dà lơgar Yok Đôn pà git, Anih tờm gam lơh li la ală broă lơh sền git kung bè ală phan gam geh tŭ do nàng gơ hòi gơ jà nac lòt nhơl: “Brê dà lơgar kung neh tam pà gơs ală tour lòt sền rơ was nggùl ngai halà gùt ngai, lòt sền bal mờ rơ was halà ală tour lòt nhơl lơyah rlau nàng di mờ tŭ tơngai mờ bơta geh ngan, jơnau kờñ nac lòt nhơl. Tus do den tơnơ̆ tŭ Rơndap broă lơh lòt nhơl geh lơh sir, Brê dà lơgar Yok Đôn rơp hòi jà ală cau bơcri priă lơh bal kă bro, lơh broă bal halà ơpah tiah ơm kis brê nàng cau in bơcri priă tàm bơtàu tơnguh lòt nhơl brê bơnơm bơh Brê dà lơgar Yok Đôn dê”.

Li la siñ họk, uă jơi phan kis, chi che kuơmàng, ờ huan geh ngan, Brê dà lơgar Yok Đôn là tiah geh phan sa, dà hùc kung bè ală bơta bè tiah kis dipal nàng mpồl rơ was hìu tàm Dăk Lăk gơ dờp mờ rê wơl mờ rài kis nggùl brê bơnơm. Bơh hơ̆, lơh gơlik tŭ niam nàng rơ was geh sền gàr jŏ jòng, pràn kơldang mờ khat gơboh rlau, mờ kung lơh gơs dùl bơta lòt nhơl sền git krơi is tŭ nac lòt nhơl tus mờ Dăk Lăk.