Pin dờn dròng ală jơnau cing tềng đăp năc lòt nhơl, hơ̆ sồng kŭp lơma, cùp rùp ală lơh broă niam chài mờ yal tơnggĭt tàm ală phan ngui internet mpồl bơtiàn dê, Y Justin Adrơng ơm tàm ƀòn Kmrơng Prong A, sàh Ea Tu, ƀòn dờng Buôn Ma Thuột, gơlơh gơdan ngan. Bi Y Justin pà gĭt: “Añ geh bơsram bơta chài dròng cing jañ mồng, mơkung là broă chài cùp rùp, kŭp lơma nàng yal uă cing mồng, là kwơ ngan ai is añ in mờ ai jơh ală làng bol ală jơi bơtiàn tàm Tây Nguyên geh tàm ù tiah niam chài cing mồng do. Geh ală rùp hin halà bơta chài, broă chài nàng kŭp lơma, cùp rùp gơtùi ai rùp hiñ hơ̆, viđiô hơ̆ nàng bol hi sền gàr mờ yal tơnggĭt tus tơl nă cau in”.

Ngui rùp hin nàng yal jơnau niam chài bơh jơi bơtiàn dê, gam hòi là photo voice, là dùl tàm ală bơta chài geh Kụk Phan lời wơl Niam chài, gơ wèt Ƀộ Niam chài, Tàp pràn să jan mờ Lòt nhơl lam lơh tàm càr Dăk Lăk bơh lồi nam 2024 bơh broă lơh tơrlòng lài tàm tơrbŏ phan lời wơl “Ù tiah niam chài cing mồng Tây Nguyên tàm gùng lòt lòt nhơl phan lời wơl Buôn Ma Thuột- Dăk Lăk”. Bal bal mờ hơ̆, cau bơsram gam geh bơsram ală bơta chài dròng cing bơh ƀươn tus kal ke, lơh niam wơl ală tìs mờng gơbàn tàm dròng cing jañ mồng, bơsram tai bàr pe jơnau cing yau bơh kòn cau Rơđê dê…Ồng Y Bây Kbuôr, ơm tàm ƀòn Kmrơng Prong A, sàh Ea Tu, ƀòn dờng Buôn Ma Thuột, pà gĭt: “Lài do den ală jơnau cing bơh kòn cau Rơđê dê den ờ geh bơsram niam wơl tơl bè dơ̆ do ờ. Bơh ală ơdŭ bơsram tàp den să tờm añ mùl màl gŏ rơnàng kơnòm geh gĭt wă uă rlau bè bơta kwơmàng bơh cing mồng cau Tây Nguyên dê, ndrờm gĭt mờ bơsram ală jơnau cing bơh ồng pàng he dê lời wơl”.

Broă lơh tơrlòng lài tàm tơrbŏ phan lời wơl ù tiah niam chài cing mồng tàm gùng lòt lòt nhơl là lơh broă tàm tơngume Rơndăp broă lơh 6, gơ wèt Broă lơh jơnau kờñ dà lơgar bơtàu tơngguh lơh sa- mpồl bơtiàn tiah làng bol jơi bơtiàn dồ êt nă cau mờ tiah bơnơm, tơngai bơh nam 2021- 2030. Tàm Dăk Lăk, broă lơh tơrlòng lài lơh tàm ală ƀòn tàm sàh Ea Tu, ƀòn dờng Buôn Ma Thuột.

Mìng tơnơ̆ rlau 01 nhai lam lơh, neh geh 60 nơm viđiô, rlau 100 rùp hiñ bơh làng bol dê lơh is, là ală jơnau geh yal mờ rùp hiñ dồ bă is ngan, rềp mềl ngan. Ồng Lại Đức Đại, Phó Kwang Lam bồ Sờh Niam chài, Tàp pràn să jan mờ Lòt nhơl càr Dăk Lăk dê đơs là, broă lơh tơrlòng lài pa neh lơh geh cồng nha dipal ngan mờ rài kis gơ wèt mờ broă prăp gàr, ngui niam bơta kwơ phan lời wơl Ù tiah niam chài cing mồng Tây Nguyên dê, wèt tus gơgơs bơta pràn ai lòt nhơl mpồl bơtiàn in.

“Tàm pơn jăt cồng nha lơh geh bơh broă lơh tơrlòng lài dơ̆ do dê, bal mờ bơta sền gròi bơh Kụk Phan lời wơl, bơh Ƀộ Niam chài, Tàp pràn să jan mờ Lòt nhơl dê, tàm nam 2025, Sờh rơ̆p sồr ală cơldŭ broă lơh ờs mờng, ală tiah cih măt dan pơn jăt tai lơh ală broă lơh tơrlòng lài tàm ală tiah ndai tàm càr Dăk Lăk. Rơ̆p geh bơta pơgồp bal kơ̆ kơl jăp rlau, lam lơh uă broă lơh tơrlòng lài dồ tŭ bal, ală ơdŭ gơtùi tàm pơn jăt gơ̆p bal mờ bơta tus bal bơh ală cau gĭt wă jrô broă do mờ ală cau chài dê”.

Bal mờ càr Dăk Lăk, ală ơdŭ bơsram tàp kung geh bơyai lơh tàm ală càr: Gia Lai, Kon Tum mờ Tây Ninh, lời ai làng bol ală jơi bơtiàn dồ êt nă cau in. Broă bơto lời wơl bơh ală cau chài geh mờng chài mờ bơngă pin dờn tàm mpồl bơtiàn dê lơh, bơto pơlam niam wil tơl, geh bơta chài, niam chài lơh. Jăt Tiến sìh mò Nguyễn Thị Thu Trang, Lam bồ Cơldŭ Ătbồ phan lời wơl niam chài ờ di phan bơna, Kụk Phan lời wơl Niam chài dê, tŭ geh bơto bơta gĭt wă, làng bol rơ̆p geh tai mờng chài tàm broă ngui phan lời wơl nàng lơh gơlik geh broă lơh broă sa, bơtàu tơngguh mpồl bơtiàn, prăp gàr wơl bơhiàn niam chài krơi is.

“Bơta tàm tơrbŏ bal đah ală mpồl bơtiàn geh bal phan lời wơl niam chài ờ di phan bơna ndrờm bal, bơta tàm tơrbŏ bal đah ală rơnàng ơm tàm dồ mpồl bơtiàn bal mờ bol hi bơto pơlam ai mpồl bơtiàn in broă lơh photo voice là mpồl bơtiàn pờ is jơnau đơs he dê, yal is ală jơnau niam chài he dê. Rlau mờ cau lơi jơh, să tờm làng bol kòn cau Rơđê rơ̆p yal geh ală jơnau bè khi niam ngan rlau jơh, gơkờñ ngan rlau jơh, song dơ pă ngan rlau jơh, ngan ngồn ngan rlau jơh, kung bè gĭt wă is geh bơhiàn niam chài krơi is làng bol he dê, pơn jăt tai tàm pơdờn is, bơhiàn niam chài krơi is mpồl bơtiàn he dê”.

Ờ mìng tơngguh uă gĭt wă bè prăp gàr mờ ngui niam bơta kwơ niam chài bơh phan lời wơl ù tiah niam chài cing mồng Tây Nguyên dê- phan mòn niam chài ờ di phan bơna kòn bơnus gùt plai ù dê lơm, broă tàm tơrbŏ bal phan lời wơl niam chài tàm gùng lòt lòt nhơl gam pơgồp bơnah lơh gơlik geh bơta pràn kis gam sùm ai niam chài cing mồng in tàm rài kis pa tŭ do. Ngui niam jơh ală bơta ƀươn bè măy mŏk mờ internet mpồl bơtiàn, tơl nă cau gơtùi bơtòm tơrgùm, tàm tơrbŏ mờ lơh gơlik geh ală jơnau lời kir song dơ pă ngan bè rài kis mpồl bơtiàn he dê, bơh hơ̆ pơgồp bơnah lơh niam rlau broă sền gàr ală bơhiàn mờng kwèng niam bơnĕ bơh tơl jơi bơtiàn dê.