Tềng đah đơm tơnau dà  Mỹ Lâm, sàh Hoà Thịnh, pah dơ̆ tus trồ mho ngai dơ̆ 7 pah poh, săp ntas đờng guitar bal mờ ală săp đơs niam ngan, ƀăl hiă ngan geh đơs... bơnĕ bơnài bal mờ săp sềm hoăc, càl puh... Tàm do ờ geh mpràp mờ bong đềng niam. Tàm do geh dùl dà tơlir bơh nhơ̆t chi bal mờ ală cau ƀarah ƀarài, lơbơn niam, bè ờs bè tàm tiah ƀòn Hoà Thịnh dê sơl. Tàm do, đơs crih tam ya geh lơh geh bơh ală cau kờñ teh đờng đơs crih, mờ ai is tŭ tơngai, bơta chài bơh he dê nàng drơng broă mpồl bơtiàn. Mờ bơh hơ̆, tiah do neh gơ gơs tiah pơr gon bơh gĭt nđờ nă cau. Broă lơh ƀarah ƀarài, mơya gam lơh geh dùl bơta pa ai rài kis niam chài tàm tiah ƀòn Hoà Thịnh dê- tiah neh bơt bơtàu wơl pràn kơl dang bơh tơnơ̆ mìu càl rơbŭt dờng kah yau nhai 11 nam lài dê. Bi Nguyễn Hữu Đồng, dùl nă cau kòn ƀòn Hoà Thịnh, dùl nă cau bơto bơtê tề lam is ală mpồl cau dong kờl is dong làng bol bơsong jơnau gơ lời wơl bơh mìu càl rơbŭt dờng dà tih dà lìu kah yau dê. Mờ ală ngai do, bi sùm geh mat tàm ală dơ̆ tìp mat Mỹ Lâm nàng đơs ală jơnau đơs crih kờñ ngan ai làng bol, bơyô he dê iăt. Gơwèt mờ bi hơ̆ là bơta chờ hờp, bơta gơboh gơbài ngan. 

 "Añ kung bè bàr pe nă oh mi mờng kwèng ndrờm kờñ ngan broă lơh do. Tơnơ̆ tŭ đơng lam bồ lơh ală bơta do, añ gŏ ƀòn lơgar he dê gơ gơs niam bơnĕ rlau; làng bol geh broă lơh, rài kis nùs nhơm kung niam rlau tai sơl”.

Bơh 4 poh bơyai lơh, broă lơh tìp mat lơh wèng đơs crih tam ya mpồl bơtiàn tìp mat Mỹ Lâm sùm geh mat dùl nă cau nhơl phan teh 70 sơnam mờ teh đờng chài ngan- ồng Phạm Duy Binh ơm tàm sơnah ƀòn Tuy Hòa. Ngai dơ̆ 7 pah poh ồng bơh Tuy Hoà lòt gan gĭt nđờ jơ̆t kơi sồ nàng tus Hoà Thịnh drơng is ai cau kờñ jơnau đơs crih tam ya in mờ bơta jơh nùs jơh tồr. Ồng Binh pà gĭt:

"Tŭ dờp gĭt jơnau Hoà Thịnh bơyai lơh tìp mat lơh kwèng đơs crih tam ya tơnau dà Mỹ Lâm, añ- dùl nă cau gĭt teh đờng guitar mờ gĭt đơs- gơlơh gŏ broă lơh do krơi is ngan. Bol añ crăp rcang tus bal mờ nùs nhơm dong kờl is lơm. Añ gŏ bơta hơ̆ kwơ ngan”.

Bơdìh mờ tìp mat Mỹ Lâm, ală mang đơs crih tam ya geh bơyai lơh tàm bàr pe tiah tàm gơl gùng gan ală ƀlàng sre. Broă lơh do geh bơta geh mat bơh ală cau dong kờl is kơnòm să kơ̆p kờñ pờ geh ù tiah niam chài ai làng bol tiah ƀòn lơgar sàh Hoà Thịnh in. Rơndăp broă lơh đơs crih tam ya mpồl bơtiàn do bơh ồng Phương Văn Lành, Bí Thư Đảng ủy sàh Hoà Thịnh sơnđờm lơh mờ geh lam lơh jat tàm nùs nhơm dong kờl is. Ờ gŏ tăc vĕ mờ geh bơyai lơh tàm mho ngai dơ̆ 7 pah poh. Cau gĭt teh đờng pơgồp săp ntas đờng. Cau gĭt đơs pơgồp săp đơs. Mờ cau lơi kờñ yal jơnau dà tih dà lìu kung gơtùi tus bal sơl. Ồng Phương Văn Lành, pà gĭt, gĭt nđờ dơ̆ bơyai lơh, broă lơh đơs crih tam ya “Tìp mat Mỹ Lâm”, neh lơh geh bơta pràn gơ hòi gơ jà is rơmis ngan:

 "Cồng nha bơh sơn rờp bol añ lơh pa do neh gơ hòi gơ jà uă ngan năc lòt nhơl tàm sàh mờ bơdìh sàh, geh tŭ cau bơh càr ndai tus bal sơl, tìp mat lơh kwèng bal mờ làng bol tiah do. Do là dùl gah niam ngan nàng bol añ in yal tơngĭt uă rùp hin ƀòn lơgar tus mờ bơyô mờ năc lòt nhơl tàm sàh, bơdìh sàh kung bè tàm càr mờ bơdìh càr”.

Bơh tơnau dà Mỹ Lâm, tus brê ngơr dà Bầu Đá, bơh Ƀòn Sen tus Suối Lạnh mờ jơh bal ală ƀlàng sre lă jòng gan ală ƀòn lơgar lơngap lơngai... neh lơh geh rùp hin ƀòn lơgar Hòa Thịnh ring lơngai, ngai sơlơ gơ hòi gơ jà uă cau jòi tus sền gĭt mờ jòi gĭt.