Tờm gơnơng bơh kòn cau Mạ dê sùm geh ntào song mum lơmpòng mờ măt ù, tơnơ̆ tŭ sơntơ̆p jrong dang che 8 gah geh bơta jòng ndrờm bal. Ală dang che do geh tàñ gơs uă dà lĭp rơlir mờ ală rùp hin, bơta dờng dềt krơi is bè sềm, bơkào, nha, rùp sơnyùr kòi halà ală rùp lơm pòng, wil, 3 mum... Cau chài ồng K’Brẻo, ơm tàm ƀòn B’Sumrăc, xã Lộc Tân, kơnhoàl Bảo Lâm, càr Lâm Đồng pà gĭt, tờm gơnơng kòn cau Mạ sền bơdìh bè tờm plai mil brê geh uă ntê, bè tờm lơ u ală nha krơi is pơn yơu bè jơi nòi tàm mpồl bơtiàn dê. Cau chài ồng K’Brẻo, đơs: “Tờm gơnơng sùm geh ntào tàm ală dơ̆ lơh Yàng, uă ngan là dơ̆ lơh Yàng sa rơpu. Do là dùl pơrya mờng kwèng ngan bơh ală ƀòn lơgar dê. Tờm gơnơng bơh tơl nă cau tàm ƀòn bal mờ cau kra ƀòn dê ntào. Bal mờ tờm gơnơng den gam geh ală phan sa bơh yau bè iar buh, poăc rơpu.... nàng duh khoai Yàng, ưn ngài Yàng neh ai pà dùl nam mìu càl niam, phan tam geh dờng gơs niam ai ƀòn lơgar in”.

Pah nam, tơnơ̆ tŭ tơnhào phan lơh geh bơh suơn sre, ƀòn lơgar rơ̆p duh khoai ơn pơdơng rơpu nàng ưn ngài Yàng dilah phan tam geh tơnhào uă. Ai phan tam ờ hoan geh tơnhào den rơ̆p bơyai lơh dềt rlau, mìng sa piang pa tàm ală hìu bơnhă, ơn pơ dơng duh khoai iar halà be.

Pah tŭ ƀòn lơgar geh dơ̆ lơh Yàng sa rơpu, dơ̆ lơh Yàng ñô lir bông là ntào tờm gơnơng. Tờm gơnơng tàm dơ̆ lơh Yàng sa rơpu bơh kòn cau Mạ dê geh tàm pà gơs 2 bơta là tờm gơnơng ñô tơrnờm mờ tờm gơnơm sa poăc rơpu. Cau chài ồng K’ Brẻo, ơm tàm ƀòn B’Sumrăc, xã Lộc Tân, kơnhoàl Bảo Lâm, pà gĭt, tờm gơnơng ñô tơrnờm geh ntào tàm nggùl hìu jòng geh trah mòn uă rùp hin bè sềm, phan poan jơng mờ drăp tơrnờm geh kơ̆t tềng hơđơm tờm gơnơng do dê. Ai tờm gơnơng sa poăc rơpu geh ntào tàm ƀlàng kung geh bơka niam ngan mờ ală rùp hin mùl geh ngan bơh dơ̆ lơh chờ dê bè tờm gơnơng dờng rlau mờ tờm gơnơng ñô tơrnờm tàm hìu jòng. Lài mờ tŭ lơh dơ̆ lơh Yàng ntào tờm gơnơng do pal răc dan mờ Yàng, yal mờ ồng pàng bơh yau in. Cau chài ồng K’ Brẻo, pà gĭt: “Nàng lơh dơ̆ lơh Yàng ntào tờm gơnơng den ƀòn lơgar rơ̆p rcang lài drăp tơrnờm mờ dùl nơm iar. Kra ƀòn koh ñgko iar jài răc dan mờ Yàng jài, yal mờ ală Yàng in gĭt ngai do ƀòn he dê lơh Yàng sa rơpu halà dơ̆ lơh Yàng ñô lir bông tŭ tơnhào jơh phan tam, jà Yàng tus sa bal mờ ƀòn lơgar”.

Tàm bơta pin dờn bơh kòn cau Mạ dê, tờm gơnơng ngan là tiah Yàng ơm kis mờ sa phan ơn pơdơng. Den tàng bè hơ̆, gam tờm gơnơng là gam pal ơn pơdơng tơrnờm mờ poăc. Cau tờm ƀòn là cau geh gơnoar sồr làng bol ntào tờm gơnơng, ơruh pơnu tă pơgồp bal dà kơl hề, cau den lòt jòi che ryah, cau den lòt jòi tờm gle kồs, trah mòn nàng ntào tờm gơnơng. Cau chài ồng K’Brẻo, pà gĭt tai:“Tờm gơnơng rơ̆p geh ntào tềng mpồng mut hìu mpồl bơtiàn halà hìu cau kra ƀòn, kwang atbồ ƀòn dê. Lài mờ tŭ ntào, ală ơruh pơnu tàm ƀòn rơ̆p tơrgùm wơl nàng bal mờ gơ̆p ntào tờm gơnơng. Tờm gơnơng rơ̆p geh ntào tơnơ̆ tŭ cau kra ƀòn lơh jơh bơhiàn duh khoai Yàng”.

Tờm gơnơng bơh kòn cau Mạ dê ờ mìng tơngŏ nùs nhơm gĭt ưn ngài bơh ƀòn lơgar dê gơwèt mờ Yàng tơnơ̆ dùl kàl tam phan geh tơnhào uă, kơ̆p kờñ Yàng dong kờl ai lơngăp lơngai ƀòn lơgar in lơm mờ gam là dùl broă lơh niam chài krơi is ngan, niam ngan, là anih tờm bơh dơ̆ lơh Yàng dê, pơrya bơh bơta kơ̆p kờñ rài kis hwềng nùs lơngăp lơngai.