Ală ngai do, ƀòn Ako Dhong, ƀòn dờng Buôn Ma Thuột bềng ur ar ngan năc lòt nhơl bơh tàm càr mờ càr ndai mờ geh bal làng bol ơm kis tàm lơgar ndai rê hờ ƀòn tờm wă rò sơnam pa sa tềp bơhiàn yau. Tơnơ̆ 30 nam ơm ngài mờ ƀòn dờng kờñ gơboh ngan, bi Nguyễn Kim Nguyên ơm kis tàm lơgar Mỹ nisơna tài bơh gĭt nđờ bơta tam gơl tàm ƀòn tờm dê, mờ bi nisơna ngan rlau jơh là tam gơl tàm ƀòn lơgar, gam grồ guh pa ngan mơkung sền gàr geh bơhiàn ờs mờng bơh yau. Hùc dà kơphê bơkah ngan tềng bồ hìu rơng  Arul Huose, bi Nguyễn Kim Nguyên, đơs: Oh mŭt tàm do kung sền gŏ gơlơh kờñ ngan. Tàm do gơlơh bè là brê bơnơm sơl, gơlơh bè dòn song ngan...ndrờm bè geh bè lơi đơs bè hơ̆...gơlơh niam ngan tàm nùs tàm tồr.

Tàm tŭ uă cau gam kờñ ngan iang ngan mờ bơta tàm bơrlŭ bal ƀal hiă mờ niam bơnĕ ngan chaì ngan tàm Arul House den cau chài jak ngan Vũ Lân là cau neh rlau 40 nam đềt mềr mờ broă lơh kơlôi sơnơng, prăp gàr niam chài Tây Nguyên dê, ƀòn Ako Dhong mờ ù tiah niam chài Arul House gam là anih pơnrơ mùl gŏ ngan bơh bơta tàm pơn jăt tam gơl niam chài dê. Ồng đơs là, phan lời wơl niam chài cing mồng Tây Nguyên ờ gŏ di pal là dùl bơta ơm dồ anih sùm ờ mờ pal kis duh hồl bal jăt tŭ tơngai. Mùl màl tàm Arul House mờ ƀòn Ako Dhong pà gŏ, do là dùl tàm ală gùng lòt nàng phan lời wơl niam chài Tây Nguyên geh tàm pơn jăt tai tàm rài kis pa tŭ do. Cau chài jak ngan ồng Vũ Lân, đơs: Ờ mìng là gàr wơl bè ờs ờ mờ khi gam gĭt lơh bơka bơceh lơh pa wơl lơh geh dồ ù tiah pa bè ù tiah tàm Arul do gùt dar ngui phan bơka bè là ală plung lơh mờ dơm chi halà ai rùp trah mòn mờ dơm chi do gơ tơngŏ wơl uă ngan bơta ơm kis ờs mờng kung bè là jơnau kơ̆p kờñ bơh làng bol dê mờ tŭ do là khi ơn gùt dar ù tiah do. Hơ̆ kung là bơta tam gơl mơya là tam gơl dipal. Gơ gơdờp ngan wơl geh mờ tiah ơm kis kờñ pal geh lơh uă bè lòt nhơl lơh geh phan jòi sa ai să tờm làng bol tàm ƀòn in.

ARul House là dùl tiah ơm kis tàm uă rơnàng cau, bơh hìu bơnhă mò H’Len Niê dê, tàm ƀòn Ako Dhong, sơnah ƀòn Tân Lợi, ƀòn dờng Buôn Ma Thuột. Mò H’Len Niê dùl nă cau ùr mờng lơh broă sa sươn sre, mìng ià wơu ià sơƀàt lơm, pơnì mờng àñ sơ̆, àñ sah, tài bơh nùs nhơm pơñiờ să bè ală phan lời wơl bơh mò pàng dê, neh rơhời lơh geh ù tiah ơm kis bơh hìu bơnhă he dê gơ gơs dùl ròt anih prăp gàr phan kwơ yau niam chài kòn cau Rơđê dê mờ geh hìu ñô sa phan sa kòn cau Rơđê dê ờs mờng bơh yau. Mò H’Len Niê, đơs: He kờñ, he gơboh he kơlôi mờ he lơh dồ bă lơh is lơm mờ ờ gŏ di añ là cau gĭt kă bro ờ. Bơta mpờl gŏ sùm tềng măt he dê hơ̆ là gŏ bơta kwơ niam chài mò pàng he dê lời wơl. Tài bơh Arul là jơnau yal bơh rài kis Len dê, ai Arul là măt bèp Len dê den. Len kơlôi là rùp să bơh bèp bơh mè dê kung là dùl nă kòn bơnus ù tiah Việt Nam he dê kờñ gơboh den tàng he ờ gŏ gơtùi lơh iơh geh mò pàng he dê, kis dà lơgar he dê mờ he pal tơngŏ bơh să tờm he dê bơh broă lơh broă lơh mờ broă ơm kis lơh lòt mờ he pơñiờ să.

Bơta kờñ gơboh niam chài kòn cau Rơđê dê, kờñ gơboh bơhiàn ờs mờng bơh yau hìu bơnhă dê, jơi nòi mờ ƀòn lơgar dê là bơta gơn kơnờm nàng H’Len Niê lơh geh ù tiah niam chài Arul. Mờ bơta gơn kơnờm să tờm pràn kơldang mờ uă bơta dong kờl jơh nùs jơh tồr, cau ùr mìng mờng kwèng mờ broă sươn mìr tàm ƀòn Ako Dhong neh bơ̆t bơtàu gơtùi Arul House cèng bềng rài kis niam chài bơh yau kòn cau Rơđê dê. Mơya tŭ hìu đam do lơh sir, H’Len Niê pal kong mờ broă bơdìh mờ jơnau tơl pràn bơh he dê, hơ̆ là kờñ priă jền tơl nàng Arul House gơtùi niam sùm mờ tŭ tơngai. Bè hơ̆ sồng tơnơ̆ do bi neh tìp mờ bi Trần Thị Châu Phương là cau geh mờng chài ngan tàm gah lòt nhơl tàm Hội An mờ ƀòn dờng Hồ Chí Minh. Mờ tŭ do, Trần Thị Châu Phương là Kwang ătbồ Arul House. Mò Trần Thị Châu Phương, đơs: Tŭ hơ̆ añ sĕ còp oh H’Len bal mờ dồ broă lơm là dồ nă năc lòt nhơl lơm gời gơ dê. Oh kung kờñ gĭt sơl ñchi gơlơh bơh tài dồ nă ùr kòn cau Rơđê mờ geh wơl bơta gơn kơnờm tus bè hơ̆ taih, gơ wèt mờ oh là dồ nă năc lòt nhơl den oh gŏ hơ̆ là bơta dờng màng ngan den oh hơ̆ sồng rê lòt bal mờ H’Len. Đơs ngan den oh ờ hềt lơh geh bơta lơi ai Arul in ờ, oh gŏ tàm ƀòn lơgar cau kis dùl rài kis gơlơh niam ngan, là jak chài ngan mơya ờ hềt geh cau rơndăp tăp sèng wơl. Ơm tàm hìu, tơl nă cau sa phan lơi, ngai bè ờs sa phan lơi, ngai lơh chờ lơh yàng sa phan lơi den ală bơyô hơ̆ trŭ gơm yờ sa, oh mìng là cau rơndăp tăp sèng, lơh gơ in niam wơl rlau gời mờ rài kis niam chài is là neh geh lài jơh gơ dê. Bơh tàm dơlam kòn bơnus bơh tơl nă bơyô dê den bơh hơ̆ Arul lơh gơs pah ngai.

Tŭ do, Arul House neh là dùl tàm ală anih mờng kwèng ngan gơ wèt mờ năc lòt nhơl bơh tàm dơlam mờ bơdìh lơgar pah tŭ lòt tus mờ tiah tờm kơphê Buôn Ma Thuột dê. Tŭ dồ ngai duh hồl bơh ƀòn dờng Buôn Ma Thuột dê gam wơl, ồs hìt ờs mờng bơh yau gơ sa tềng gùl ƀlàng tờm bơh Arul House dê. Săp ntas tur cing ntas nggồr sùm, jơnau đơs crih eirei niam bơnĕ ngan mờ dar cau tam ya bềng bơta kờñ gơboh kòn bơnus, gơ tàm tơrbŏ wơl làng bol ƀòn Ako Dhong mờ năc lòt nhơl bơh làm bă tiah gơgơs dồ ƀòn bal.