Bơh jơnau kơlôi sơnơng lơi neh lơh H Juel mờ hìu nhă pờ geh Kông ty Leng Gung mìng lơh bè yal mờ kă bro ală phan geh lơh bơh bơta niam chài ờs mờng cau Mnông càr Dăk Nông dê?

H Juel: “Pơgăp mờ do tàm 10 nam, tŭ añ pa bao, añ gŏ làng bol gam prăp gàr uă ngan bơhiàn ờs mờng, tàm hơ̆ uă ngan là ală broă lơh yàng duh khoai, mờ tàm ală lơh yàng duh khoai den ờ tŭ lơi ờ geh drăp tơrnờm. Bơh tŭ hơ̆ añ bơsram mờ pume añ bơto tàm broă ƀĕ tơrnờm mờ lơh kañ ờs mờng, lài ngan ƀĕ tơrnờm bơh 1 tus 2 drăp nàng cau tàm hìu in ñô ha là ngui tàm ală dơ̆ ñô lơh yàng dềt tàm hìu, tơnơ̆ mờ hơ̆, rơhời ƀĕ geh uă rơlao nàng ờ mìng drơng tàm broă ñô sa ƀòn lơgar mờ gam kờñ yal tơrnờm geh lơh jăt mờ broă lơh ờs mờng bơh kòn cau Mnông dê tus mờ ală cau kờñ ñô tàm ală tiah in, mờ tŭ do tơrnờm añ ƀĕ neh geh tăc mờ uă cau. Bơdìh hơ̆ tai, añ gam gơboh kờñ ngan tus mờ broă tàñ ồi yau kòn cau añ dê, ală phan bơka tềng ồi yau ndrờm geh dùl jơnau, 1 bơta kwơ krơi is tàm rài kis pah ngai dê, ală rùp bơka bè gar nhồng, gar rơpoal, yoas, sềm, phan tàm brê, rùp cau… ndrờm geh wăc niam mờ nền nòn ngan. Den tàng añ neh geh jơnau kơlôi pal yal tus mờ ală cau in git tai bè bơta niam chài hơ̆ kòn cau añ dê, bơh tŭ hơ̆ Kông ty TNHH Leng Gung añ dê geh lơh tàm nam 2022”.

Kă bro ală bơta phan bè niam chài geh bơta lơi krơi is mờ ală bơta phan ndai mờ tàm hơ̆ den he pal sền kwơ bơta lơi?

H Juel: “Kă bro ală bơta ờs mờng bơh kòn cau dê bè tơrnờm, ồi yau, ală bơta phan geh tàñ, phan lời kir geh lơh bơh phan tàñ ồi yau, bơh đơr, rơyah… geh uă bơta krơi is mờ kal ke rơlao pơn drờm mờ kă bro ală bơta phan ndai, tài ală bơta phan do geh rơwah ờ hoan geh uă cau tus blơi, den tàng nàng geh cau tus blơi uă, bol añ pal lơh ngan nàng di pal mờ drà kă bro dê, lơh geh uă bơta phan ờs mờng bơh tàm bơta neh geh lài ồi yau dê bè kơl dung trao, khŏ jĕp, ală bơta phan lời kir nàng git geh jơnau kờñ bơh cau blơi dê mờ ai bơta niam chài ờs mờng bơh kòn cau añ dê yal nàng geh uă cau in git tus”.

Ală phan ồi ờs mờng tàñ geh, sơ̆, đồng, nir ha là drăp tơrnờm… bơh H Juel tăc geh cau năc kờñ blơi lah ờ, drà kă bro tŭ do bè lơi, broă kă bro gơtìp kal ke lơi lah ờ?

H Juel: “Tơrnờm kung bè ală phan tàñ bè sơ̆, đồng, nir, ồi yau dê bơh kông ty bol añ tŭ do kung neh geh uă ngan cau git tus mờ kờñ blơi. Ờ mìng di mờ jơnau kờñ bơh cau năc tàm càr Dăk Nông dê mờ gam geh uă cau năc tus bơh ƀòn dờng Hồ Chí Minh, Hà Nội kờñ blơi sơl, tŭ do broă kă bro ală bơta phan do kung buơn ngan sơl”.

Gơtùi đơs gah kă bro bơh hìu nhă H Juel dê gam tăc ală bơta phan geh lơh bơh bơta niam chài ờs mờng. Broă kă bro do di gơlan kung gam pơgồp bal tàm broă ai geh broă lơh, tơnguh uă priă geh ai làng bol kis tàm ƀòn in?

H Juel: “Añ chờ hờp ngan tài ală bơta phan ờs mờng bơh kòn cau añ dê geh uă cau git tus, mờ dong kờl ală cau chài tàñ sơ̆, tàñ ồi yau, cau chài ƀĕ tơrnờm in geh tai priă tàm rài kis, ai broă lơh ờs mờng kòn cau añ dê kis wơl tàm rài kis pa tŭ do nàng geh uă cau git tus bơta niam chài kòn cau Mnông Preh, Prâng, Nong… tus mờ uă cau rơlao”.

Să tờm H Juel là cau ai jơnau tơngit, cau sền jơnau đơs, mờ gam bal mờ hìu nhă atbồ kông ty, bàr broă lơh do geh tàm bơtơl bal sơl lah ờ?

H Juel: “Mờ broă lơh tờm añ dê là cau ai tơngit jơnau, sền jơnau đơs kòn cau Mnông mờ atbồ kông ty TNHH Leng Gung den kung ƀuơn sơl… Tŭ lik lơh broă añ soh phan kòn cau ờs mờng bơh Kông ty Leng Gung lơh gơs den tàng geh yal phan geh lơh mờ mblàng yal tàm broă prăp gàr bơta niam chài kòn cau añ dê tơn. Mờ kung bơh broă lơh ai jơnau tơngit, sền jơnau đơs den tàng khà măt kă bro tơrnờm añ dê tăc geh uă ngan cau blơi mờ uă cau git tus kờñ blơi sơl. Añ gŏ do là dùl bơta bơtoah ngan mờ ƀuơn ngan gơwèt añ dê”.

H Juel geh rơcang broă rơndăp lơh lơi ai broă lơh bơh să tờm dê, tàm hơ̆ uă ngan là tàm broă prăp gàr, ngui niam ală bơta kwơ niam chài ờs mờng? Geh jơnau đơs lơi H Juel kờñ pơyoa tus ală ơruh pơnu, oh mi ƀòn lơgar in lah ờ?

H Juel: “Añ kờñ lơh gơs dùl nơm hìu jòng hờ đang ờs mờng kòn cau Mnông dê nàng geh rùp rài yal, prăp gàr bơta niam chài ală bơta phan ờs mờng kòn cau añ dê. Bơdìh hơ̆ tai añ rơcang pơgồp bal mờ ală kông ty lòt nhơl tàm do mờ bơdìh càr nàng yal tai phan bơh kòn cau Mnông Preh, Prâng, Nong… tàm càr Dăk Nông dê. Añ kung kơ̆p kờñ ală rơnàng ơruh pơnu kòn cau Mnông lơh ngan prăp gàr bơta niam chài ờs mờng kòn cau dê, bañ lời gơtìp roh”.

Ơi, dan ưn ngài H Juel!