HĐND n'gor Dak Lak hŏ n'gluh an dŏng Nghị quyết mbrô 19 quy định trong ntop kơl ntop tay đah kon se nti n'hanh nhih nti phổ thông nội trú ta ăp xã n'har bri n'hanh kâng n'har bri. Tĭng Nghị quyết, kon se nti bán trú dơi ntop kơl 110.000 prăk ăp kon se/khay prăk sa măng, kon se nti nội trú dơi ntop kơl 300.000 prăk ăp kon se/khay.

Kon hŏk hăn nti ngai jay hôm dơi ntop kơl prăk hăn nsong đŏng. Đah kon hŏk tiểu học, rnoh ntop kơl lah 120.000 prăk ăp khay lah ngai ntơm bah 4 km tât bah dâng 15 km, rnoh ntop kơl lah 240.000 prăk lah ntơm bah 15 km let lơ. Kon hŏk THCS dŏng rnoh tâm ban đah ngai ntơm bah 7 km tât bah dâng 15 km n'hanh ntơm bah 15 km let lơ. Mông nar ntop kơl mô rlău 9 khay tâm năm nti.

Năm nti aơ, kon hŏk, sinh viên ta n'gor Dak Lak dơi tơm prăk ngih dak ntop kơl 55% rnoh prăk bảo hiểm y tế, tâm ban 751.410 prăk du hê/năm. Dak Lak kŏ nchrăp geh nklăp 41 rmen prăk rvăt ndrôm săm ƀŭt gay ăp ngih săm ƀŭt ƀư an kon hŏk manh.

Ndrel đah ntop kơl na nê̆, Dak Lak rgum ntuh kơl ndơ dŏng, lơn lah ta ăp ntŭk hôm jêr jŏt. Năm nti 2026-2027, Dak Lak geh tay 3 ngih sam ƀŭt nội trú liên cấp ta ăp xă n'har bri n'hanh 1 ngih sam ƀŭt nội trú liên cấp ta xă kâng n'har bri Ea Rốk dơi ndơ̆ lăp dŏng. Ăp ndơ ƀư dơi ntuh kơl tâm ban, gay njêng ntŭk ntĭm nti, gŭ rêh dơh lơn an bơi 3.100 kon hŏk nkual n'har bri n'hanh kâng n'har bri.

 Wa Lê Thị Thanh Xuân, Giám đốc Sở Giáo dục n'hanh Đào tạo Dak Lak, an gĭt, n'gâng kan rgum tay ăp tơm ndơ bah tơm prăk trung hạn n'hanh tơm prăk bah ăp Bôk nău kan rƀŏng tĭng lam dak an ntĭm nti gay ntuh kơl, ƀư lôch jêh ntŭk ntô ngih sam ƀŭt. "Ta năp măt, đă ăp ntŭk pă tŏng rnoh prăk dŏng kan an ntĭm nti. Tĭng ăp tơm prăk aơ, n'gâng kan kŏ rđau ăp ngih săm ƀŭt dŏng ân săk tam tơm prăk gay ntuh kơl, nkra ngih vâl ndrel ndơ dŏng. Bah nê, đăp mpăn tŏng nau dơi ntĭm ndrel nti ân năm nti mhe, ăp nhoat n'hao nau nâp ndrel tŏng dơi nau kan tâm rơh rnôk aơ."