Tĭng Nghị định 66/2025 bah Chính phủ, Gia Lai dơi tâm pă rlău 1.400 tấn phe an rlău 24.000 kon se nti, nuĭh kơt nti mpeh săk dơi geh ntop kơl.

Nuĭh dơi kơl lơn âk lah kon se nti tiểu học, THCS n’hanh THPT dôl kơt nti ta nkual rnoi mpôl đê̆ n’hanh mpeh yôk yang, nkual jêr jŏt mha êng, nkual meng dak lêng n’hanh gôl dak; kon se nti gŭ ngai đah nhih nti, yôk nor, mô dơi plơ̆ sĭt tâm nar.

Trong kơl dja dŏng đah kon se nti rnoi mpôl đê̆, kon se nti mpeh rnăk ach o, rnăk dăch kêng ach o n’hanh du đêt nuĭh dơi kơl đŏng kơt kon tahen ơm khĭt, tahen ơm rmanh, tahen ơm kop ji, kon se nti quet nte.

Đah nuĭh kơt nti ta ăp Ntŭk rgum ntĭm nti nău kan – Ntĭm nti way mbro, trong ntop kơl dơi dŏng an ăp nuĭh mpeh săk dơi kơl, rnăk ach o, rnăk dăch kêng ach o, nuĭh rnoi mpôl đê̆ ta nkual dŭt jêr jŏt mha êng mô geh ngai bah jay tât nklang ntơm bah 10 km let lơ.

Bah meng nê, tĭng ƀư Nghị định 188/2026 bah Chính phủ, Gia Lai dơi phăt tay rlău 291 tấn phe ntop kơl rlău 6.800 kon se nti. Tâm rnoh dja, rlău 4.200 kon se nti bán trú nŭng nar dơi ntop kơl rlău 136 tấn phe; rlău 2.500 kon se nti nội trú dơi ntop kơl rlău 155 tấn.

Ăp kon se nti dja dôl tĭng nti ta 7 nhih nti phổ thông nội trú rep gưl nkual n’har bri, lah ăp nhih nti ta ăp xã Ia O, Ia Chia, Ia Mơ, Ia Púch, Ia Nan n’hanh Ia Dom.

UBND n’gor Gia Lai jao Chi cục Dự trữ Ngih dak nkual XI rdeng, đăp mpăn tŏng ăp rnoh âk n’hanh săk kah phe tât ăp ntŭk njŭn dơn ta nklang ăp xã, phường. Nău jao dơn ân ƀư lôch jêh bah năp nar 30/9.

Sở Giáo dục n’hanh Đào tạo dơi ƀư bôk nthoi, kan nsum đah UBND ăp xã, phường n’hanh ăp nhih pah kan geh tât dơn, tâm pă phe ngăch, di nuĭh.

Trong ntop kơl rgop đăp mpăn tŏng geh ndơ kơt nti, gŭ rêh an kon se nti, nuĭh kơt nti geh nău rêh jêr jŏt, lơn lah ta ăp nkual jru, nkual ngai, n’har bri; bah nê kơl ăp kon se nti đăp mpăn nuih n’hâm tâm năm nti mhe.