Bơi 70 năm, n’hâm soan lĕ rach âk, yơn wa Bùi Văn Tạc, ta ƀon Mrông Yố, xă Ia Phí, n’gor Gia Lai mô bah nkah gĭt nuĭh nô lah tahen khĭt kăl e Bùi Văn Tửu, khĭt tâm lơh năm 1954 ta ntŭk tâm lơh mpeh Bắc. Dơi cán bộ ta ntŭk ndơ̆ sĭt phường Pleiku gay sŏk nting rhŏ an trong kan uănh năl ADN, wa Bùi Văn Tạc mô dơi mpôn nău răm: “Mpŏng kâp têh ngăn lah aƀaơ dơi joi săk, dơi joi môch gay ndơ̆ sĭt đah u che, đah me bơ̆. Nuĭh bên tâm rnăk wâl aƀaơ roh bơi lĕ hôm”.

Geh măt bah dŭt ơm ta ntŭk sŏk nting mham lah wa Lê Thị Hòa, ta xă Đăk Đoa. RNăk wâl wa geh 2 hê nô lah tahen Lê Thắng, khĭt năm 1972 n’hanh Tahen Lê Lợi, khĭt năm 1974, khĭt ta ntŭk tâm lơh Quảng Trị da dê. Âk năm bah năp, wa ndrel nuĭh rnăk wâl lĕ hăn joi nău mbơh, ôp ăp ntŭk đah mpŏng dơi joi ntŭk tâp bah ăp nô, yơn tât aƀaơ mô hŏ geh săk rnglăy. Yor rĭ, nău sŏk nting mham ADN rơh aơ mpoh ang tâm rnăk wâl du nău mpŏng kâp mhe. “Aƀaơ rnăk wâl mpŏng ŭch dơi joi 2 hê nô, geh săk, geh năm ta môch gay rnăk wâl ăp năm tât khâl ăp nô”.

Ta nkual dak lêng Quy Nhơn, nău răm mpŏng ŭch saơ kloh ta măt wa Nguyễn Văn Phước rnôk dơi sŏk mham ADN đah mpŏng ŭch dơi joi nuĭh nô lah tahen khĭt kăl e Nguyễn Tỷ, khĭt năm 1969. Mê̆ bơ̆ roh ơm, ăp nău nkah gĭt đah nuĭh nô knŭng tă bah nău nkoch bah nuĭh bên. Rlău n’gul răch năm bah năp, rnăk wâl wa Phước hôm e ƀư brah huêng phan tahen khĭt kăl e Nguyễn Tỷ yơn mô hŏ du tơ̆ gĭt wa khĭt n’hanh ntŭk tâp. “Nar aơ geh nău ƀư sŏk mham ADN nuĭh bên dŭt rhơn. Bah jŏ hôm e ƀư brah huêng phan nô yơn mô gĭt nô ntŭk gŭ dŭt rngot. Mpŏng nô gâp dơi rgum sĭt môch tahen khĭt kăl e gay gâp geh ntŭk tât chop khâl”.

Rơh sŏk mham ADND nuĭh bên tahen khĭt kăl mô hŏ dơi năl nău mbơh ta Gia Lai dơi ƀư ta 9 ntŭk ta lam n’gor. Rmôt Công an, cán bộ nai dak si ndrel nuĭh kơl kan dơi dăp pă na nao tâm rnôk sŏk mham. Thượng tá Nguyễn Hòa Bình, Groi kruanh Jrô kan Cảnh sát mât uănh hành chính mpeh đăp mpăn nău rêh jêng, Công an n’gor Gia Lai an gĭt, nuĭh rnăk wâl tahen khĭt kăl e dơi ntĭm ƀư jêh samƀŭt rhăch nău, uănh nu nău mbơh săk di na nê̆ jrŏng mham, sŏk mham n’hanh uănh joi samƀŭt tĭng di trong kĩ thuật. “Ntĭm rđău, ntĭm công an gưl xă tâm nău kơp uănh, joi ăp nău mbơh tahen khĭt kăl e mô hŏ năl săk kơt nuĭh bên sŏk mham nkoch trêng gay nuĭh ƀon lan râng”.

Tât aƀaơ, Gia Lai lĕ jêh nău kơp uănh tay, năl na nê̆ n’hanh joi nău mbơh tahen khĭt kăl e, nuĭh rnăk wâl ta Ntŭk samƀŭt samtra Ngih dak mpeh ƀon lan gŭ. Lam n’gor lĕ joi nău mbơh bah 32 rbăn tahen khĭt kăl e; tâm nĕ geh rlău 8 rbăn tahen khĭt kăl e mô hŏ dơi năl săk. Nkre dơi năl nklăp 4.200 nuĭh rnăk wâl mpeh tâm sŏk mham ADN.

Wa Nguyễn Thị Thanh Lịch, Groi Kruanh UBND n’gor Gia Lai, an gĭt:

"Mbơh ƀư nău kan 500 nar măng, rlău  ma nău sŏk mham ADN gay njuăl hăn năl, mpôl hên joi n’hanh kơp lĕ rngôch nuĭh rnăk wâl ăp tahen khĭt kăl e, ăp nuĭh mô hŏ dơi joi nting gay ƀư rĭng tâm ban, samƀŭt samtra tâm di, kơl joi năl ADN tahen khĭt kăl e. Aơ lah di an ăp rơh nkah gĭt đah nău rgum bah ăp tahen kăl e an đăp mpăn dah rŏng bah Neh dak, gay ơm ndơ̆ tahen khĭt kăl e sĭt đah nuĭh bên n’hanh rnăk wâl”.

Geh ăp rnăk wâl lĕ kâp rlău n’gul răch năm knŭng gay gĭt nuĭh bên nơm dôl ntŭk gŭ. Trong hăn nĕ hôm e geh âk mông nar, yơn du ntil nting mham ADN dơi sŏk dơn nar aơ lah ntop tay du nău dơi gay ăp nău mbơh hôm e n’gul gâl dơi nthoi tay. N’hanh nĕ lah trong ăp gưl, ăp nău kan ndrel nsum mpôl ƀư tay nău ueh đah ăp nuĭh lĕ khĭt yor Neh dak, gay nar lơ âk tahen khĭt kăl e dơi plơ̆ sĭt đah săk năm deh bah nơm n’hanh đah nău wơt kâp bah rnăk wâl./.