Geh măt ta nkual ntŭk gŭ mhe bah dŭt ơm, wa Nay Ơn, nuĭh ƀon Nông Siu, xă Ia Dreh, răm rhơn rnôk săch dơn lôk neh mhe. Wa an gĭt, âk năm bah năp, rnăk wâl rêh tâm nkual ƀa ƀơ geh dak băm jru, geh nkhah êng tâm yan mih. Rơh aơ, wa lah ngoăy tâm 20 rnăk ta ăp ƀon Ia Klon, Gom Gốp, Bhă Nga n’hanh Blăk dơi kơl lor pă an ntŭk gŭ mhe lor. Nkual ntŭk gŭ mhe Ia Dreh geh rnoh neh 5,77 ha, dĭng lĕ rnoh ntuh kơl 127 rmen prăk, aƀaơ ntơm jêng gung trong, rse điện geh nklăp 75% n’hanh nău  ntăm n’gâng pă lôk neh lĕ jêh. Wa Nay Ơn, an gĭt: “Ntŭk gŭ ơm dŭt mô ueh, way geh dak băm, dŭt rvê. Aƀaơ ngih dak nta an ăp rnăk trơn tât ăp ntŭk đăp mpăn. Gâp dŭt rhơn, dŭt ueh n’hanh lah ueh ngih dak ntop kơl”.

Mô knŭng ta Ia Dreh, 953 rnăk ta nkual trôk nar lơh ta ăp xă Ia Tul, Ia Hiao, Ia Rsai, xă Uar, Đăk Song n’hanh Ia Ly mbra dơi pă ntŭk gŭ mhe đăp mpăn, ntơm lôch nău klach rvê yan mih phŭt sial.

Gia Lai lah ƀon tơm bah Hoàng đế Quang Trung. “Nău kan Quang Trung” dơi n’gor Gia Lai ƀư bah aƀaơ tât lơ 15/12/2026, đah nău ŭch ndơ̆ lĕ rngôch nuĭh ƀon lan luh ăp nkual klach pĭch rlâm, dak băm ta năp yan mih. Lam n’gor mbơh ƀư 16 nău nchrăp ƀư, trong ƀư tâm pă, đăp mpăn ƀon lan nkual trôk nar lơh. Tâm nĕ, nkual mpeh Tây n’gor geh 7 nău nchrăp ndâk ƀư nkual gŭ mhe geh dĭng lĕ prăk ntuh kơl rlău 875 rmen prăk. Ăp nkual ntŭk gŭ mhe dơi ntuh kơl tŏng ăp ntung trong, điện, dak dŏng, ŭnh ang, ngih samƀŭt, jay rgum rƀŭn nsum n’hanh ăp ndơ ƀư khlay êng, an nâp nâl nuĭh ƀon lan đăp mpăn nău rêh jŏ jong.

Gay đăp mpăn ngăch, UBND n’gor Gia Lai đă jêh ƀư lĕ rngôch ta năp lơ 31/8, jao an 100% jay gŭ bah năp lơ 30/11 n’hanh jêh nău trơn nuĭh ƀon lan bah năp lơ 15/12. Đah ăp rnăk mô dơi ƀư jay, ăp ntŭk mbra rgŏ jă nuĭh kan, lŭ choih, prăk ƀư tĭng trong “Mpông jay jao tât ty”, kơl nuĭh ƀon lan geh jay gŭ jêh rnôk lôch ƀư. Wa Dương Mah Tiệp, Groi Kruanh UBND n’gor Gia Lai đă:  “Ban mât uănh ntuh kơl ndâk ƀư bah n’gor n’hanh ăp nuĭh ndranh rgum dŭt n’hâm măy mŏk, ndeh rklư, lŭ choih ndăn jêh ăp ndơ ƀư khlay, đăp mpăn uĕh nâp n’hanh tŏng ăp ngăch ƀư. UBND xă ƀư ueh trong kan nkoch trêng rgŏ jă geh nău tâm ban ŭch tâm ƀon lan, ngăch mkra ăp jêr jŏt mpeh tâm nău dơi mkra n’hanh an neh tŏng ăp mbơh ƀư kloh rah wah, di nău ntrŭnh. Nkre nchrăp lŏ ăp tơm prăk tâm di tĭng nkô̆ nău ŭch êng gay ntop kơl an nuĭh ƀon lan ndâk ƀư jay gŭ, kơl an rnăk ach o, rnăk geh nău rêh jêr jŏt, rnăk mô dơi ƀư./.