Ta ntŭk kan kơl hành chính công xã Ia Hrung, n’gor Gia Lai, râng geh ăp nar, yuh Phạm Thị Thuỷ, nuĭh way kan ntŭk kan wăng sa geh dơn rlău 10 kôp săm ƀŭt rhŏ mpeh neh ntu. Ntơm nơh, dŭt âk mông nar bâh yuh an nău kan răk lĕ ăp ntil săm ƀŭt, tâm rđil đah nău ntrŭnh bâh pháp luật. Bâh ntơm geh nău kon nuĭh ƀư AI kơl âk ngăn, yuh lĕ geh ƀư ndơ̆ săm ƀŭt ta nĕ, ndơ nĕ mbra geh rgum lĕ n’hanh nchŏng mbơh dâk ăp nkô̆ nău an geh nkah uănh mô lah săm ƀŭt hôm nha mô tŏng. Yor nĕ, săk rnglăy nău kan bâh yuh hao âk tơ̆ ngăn.  "Rnôk ê hŏ geh AI kơl ƀư, du nar gâp kanŭng geh ƀư 4 tât 5 săm ƀŭt kan dơm. Lôch geh dŏng AI uănh năl ăp ntil săm ƀŭt kan, rnoh aơ hôm nha hao tât klâp ma 15 tât 20 ngăn. Ta ntŭk aơ dŭt hvi jêng nău uănh răk lĕ săm ƀŭt lah dŭt khlăy ngăn. Rnôk nĕ he rgum ta nău kan uănh năl ta ntŭk, tu tơm săm ƀŭt n’hanh tâm rnôk dŏng neh”.

Ia Hrung lah ngoăy tâm âk ntŭk geh rnoh săm ƀŭt an geh kan lah dŭt âk ngăn ta n’gor Gia Lai. Kanŭng tâm 6 khay bôk năm 2026, ta ntŭk kơl kan hành chính công bâh xã lĕ geh dơn bơi tât 4.800 săm ƀŭt kan. Geh rnôk, xã Ia Hrung geh nkah yor rnoh săm ƀŭt kan ƀư mbrơi. Yơn lah, lôch 2 khay dŏng AI, nău aơ lĕ geh rgâl âk ngăn. Rnoh săm ƀŭt mbrơi uănh kan lĕ hŭch rlău 62%- rnoh dŭt âk ta lam n’gor. Xã Ia Hrung lah ngoăy tâm 10 xã, phường geh UBND n’gor Gia Lai rnê yor geh dŏng săk rnglăy nău kan dŏng AI neh ntu. Wa Huỳnh Ngô Tùng Điệp, Groi kruanh UBND xã Ia Hrung an git.  "Săk rnglăy nău dŏng AI kơl knơm âk ngăn ta rnoh mbrô n’hanh nău pah kan. UBND xã lĕ geh mât uănh cán bộ, công chức geh sŏk dŏng lĕ rngôch săk rnglăy nău kan công nghệ aơ. Yơn lah, lĕ rngôch lĕ geh uănh nđôi, uănh năl tay, dơn kan nglâ̆ dŭt hôm nha geh đah cán bộ mbơh nău kan n’hanh nuĭh geh nău dơi kan doh rklaih ăp ntil săm ƀŭt hành chính”.

Lôch geh ƀư tĭng nglăp nsum ntŭk kan hành chính, rnoh săm ƀŭt mpeh neh ntu pă an ta xã ta Gia Lai lĕ hao ngăch tâm rnôk nuĭh kan hôm mô tŏng. Bâh nău ŭch bâh kruanh UBND n’gor Gia Lai, ntŭk kan kơl an hành chính công n’gor lĕ geh tâm rgop đah ntŭk kan mbơh dăn dŏng neh ntu tât rdâk njêng nău kan AI neh ntu. Tâm âk khay, mpôl kan công nghệ thông tin n’hanh cán bộ way kan  ndrel mbơh nti tay AI bâh Chat GPT đah trong kan văn bản pháp luật, nău way kan n’hanh âk rbăn săm ƀŭt kan mpeh neh ntu lĕ geh uănh năl tâm nău kan ngăn.

Bôk khay 6/2026, nău kan ntơm geh ndơ̆ lăp dŏng n’hanh aƀaơ lĕ geh mbơh ƀư tâm ban ta 135 xã, phường ta lam n’gor, kơl an rmal njrăng klâp ma 80% ăp nău way kan hành chính neh ntu nău way kan. Yơn săk rnglăy bôk năp ta Gia Lai an saơ, nău mĭn kan kon nuĭh ƀư AI mô geh rgâl cán bộ, ma lah ndơ gay ma mpôl kan cán bộ ƀư an geh săk rnglăy lơn, pơk trong ƀư mhe tâm nău rgâl mhe hành chính, ntop n’hao nău ueh kơl an ƀon lan n’hanh doanh nghiệp ta ntŭk.