Nău nteh chĭng gong n’gloh lam nklang jay rgum ƀon buôn Puăn, xã Ea Phê, n’gor Dak Lak rlai lăp nsum ăp njuat ndăch rvăch n’gôr gră mpơl lor du năm khay jŭr geh play dôl tât dăch. Nkre đah ăp nar mô gŭ rlu mât chăm mir tơm nchrăp khay klêh, ăp bu hăr blău n’hanh rmôt njroh mprơ bah ƀon ndăn tiăr nti gay rgop tâm nar Lễ hội Sầu riêng n’gor Dak Lak bơi tât. Đah nuĭh ƀon lan ta aơ, lễ hội mô dơn lah nar rgum pâl bah play sầu riêng ma hôm lah rnôk nkoch mbơh săk tơm văn hóa Tây Nguyên tât băl mpôl dăch ngai. Wa Y Cư Ayun, nuĭh buôn Puăn an gĭt, lễ hội dôl tât dăch jêng ăp nuĭh gơih nđơr tiăr nti đŏng.

“Geh lễ hội sầu riêng bơi tât ri mpeh chĭng gong buôn Puăn he nsrôih lĕ n’hâm suan râng tŭr goh chĭng gong n’hanh ndăch rvăch an uĕh lơn. He ŭch rŏng lễ hội sầu riêng gay an kônh wa he hun hao wăng sa, tăm sầu riêng, mpŏng sầu riêng geh rnoh khlay đăp mpăn nău rêh bah nuĭh ƀon lan”

Lah nkual rgum tăm đah nklăp 850 ha sầu riêng, xã Ea Phê uănh Lễ hội Sầu riêng mô dơn lah rnôk nkơnh n’hơ ndơ tuch tăm ma hôm lah rnôk nkoch mbơh săk tơm bah 23 rnoi nuĭh dôl gŭ rêh ta n’gor. Lôch nău dơi bah Nar rgum Văn hóa ăp rnoi mpôl đê̆ bôk năm aơ wăch rgum rlău 25.000 tơ̆ nuĭh, n’gor nchrăp tay ăp nău kan văn hóa, ndơ ngêt sa, pla n’hơ ndơ geh ƀư OCOP n’hanh hun hao pâl nđaih nsum mpôl nkre đah mât ndray văn hóa. Tĭng wa Nguyễn Thị Kim Oanh, Kruanh UBND xã Ea Phê, ntŭk rgum tơm bah n’gor ta lễ hội mbra lah ăp nău kan nkoch mbơh văn hóa Bru - Vân Kiều, nkre đah trong rƀŏng hun hao pâl nđaih nsum mpôl.

“Tĭng nar Lễ hội sầu riêng lor bôk năp năm 2026 bah n’gor Dak Lak, xã Ea Phê hŏ rdâk njêng trong nchrăp ƀư ăp nău kan ndơ ngêt sa, pla n’hơ ndơ geh ƀư OCOP n’hanh nchreng an uănh du đêt nău kan bah Bru - Vân Kiều. Ntŭk rgum tơm bah xã lah mbra an ƀư njăr trong n’hanh hăn tât let năp tay ri mbra ntik n’hao pâl nđaih nsum mpôl đah nuĭh ƀon lan rnoi Bru-Vân Kiều”.

Ta xã Krông Pắc, ntŭk ƀư ăp rơh tâm rlong rnoh khlay sầu riêng tâm trôm nar lễ hội, pah kan nchrăp dơi ntrôl ngăch đŏng. Rlău ma ƀư tâm rlong rnoh khlay n’gor hôm ƀư tay 5 nău kan tĭng ƀư ntơm bah n’gul khay 8 tât bôk khay 9. Wa Lại Đức Đại, Kruanh UBND xã Krông Pắc an gĭt, trong leo tâm rlong rnoh khlay dơi mpŏng nta geh tay trong buăt nthoi đah nuĭh tơm mir, doanh nghiệp rgum rvăt n’hanh tăch n’gluh, nkre rgop rdâk njêng săk ntơ lư sầu riêng Dak Lak tĭng rêng rnoh khlay.

“Xã mpôl hên mpŏng dŭt âk tâm trong tăch tâm rlong rnoh khlay nuĭh tơm mir sầu riêng, aơ lah rnôk pơk luh du ƀư gay tât đah tơm ndơ tăch dja tĭng rêng ndơ tăm tâm ban kơt lah rnôk gay nkơnh n’hơ săk ntơ lư sầu riêng Krông Pắc lah êng n’hanh sầu riêng bah n’gor Dak Lak lah nsum.”

Lễ hội Sầu riêng n’gor Dak Lak lor bôk năp ƀư ntơm bah nar 15/8 tât 2/9 đah rêng kan văn hóa, pâl nđaih, ntrŭt ntrôl tăch rgâl n’hanh buăt nthoi tăch ndơ tuch tăm. Aơ lah lor bôk năp lễ hội dơi ƀư têh gưl n’gor, ntơm rgâl bah du nău kan êng tâm dâng jêng lễ hội bah ndơ tăch tơm khlay. Wa Trần Hồng Tiến, Giám đốc Sở Văn hóa, Thể thao n’hanh Pâl nđaih n’gor Dak Lak mpŏng.

“Mpôl hên mpŏng ta lễ hội rơh dja ri mbra wơt nklăp rlău 300.000 tơ̆ năch pâl nđaih tât đah n’gor Dak Lak, rlău ma nê ri mbra kơl n’hao săk ntơ lơ sầu riêng Dak Lak tât ntŭk tăch tâm n’hanh bah dih dak, njêng săk ntơ lư êng. Mbra geh âk nău kan bah meng gay nkơnh n’hơ, nkoch mbơh rup gui văn hóa, kon nuĭh bah n’gor Dak Lak, njêng suan wăch rgum, tơm khlay gay wăch rgum năch, rêng lam rnoh khlay sầu riêng Dak Lak tât đah lam dak n’hanh ăp dak lam ntŭr neh”.

Dak Lak aƀaơ geh bơi 45.000 ha sầu riêng, âk rlău 20% rnoh neh tăm sầu riêng lam dak. Năm 2025, nsĭt geh tăch n’gluh nklăp 1,1 rmen USD, ndơ̆ sầu riêng jêng ngoăy tâm ăp ndơ tăch tơm bah n’gor. Yơn bah kơi ăp rnoh nê lah trong rêh bah rmưn rbăn rnăk, lah nău rgâl bah âk ƀon lan n’hanh tơm ndơ gay mât ndray ăp rnoh khlay văn hóa way ơm.

Lễ hội Sầu riêng n’gor Dak Lak lor bôk năp yor kơt nê̆ nsĭt geh âk nkô̆ hôr khlay lơn du nău nkơnh n’hơ ndơ geh ƀư tuch tăm. Nê lah rnôk gay buăt nthoi mât chăm đah ntŭk tăch rgâl, nkre đah hun hao pâl nđaih đah mât ndray văn hóa, tĭng kơn rdâk njêng rup gui Dak Lak lah ntŭk tât bah ăp khay play njŭng n’hanh ntŭk tŭr goh chĭng gong săk ntơr êng. Rnôk ăp tâm râp chĭng n’gloh lam khay sầu riêng dŭm lah rnôk nkual neh Tây Nguyên njuăl tât băl mpôl tâm dak n’hanh dak bah dih nău mpơl gĭt mpeh du n’gor gĭt ntik n’hao săk geh tuch tăm, mât ndray săk tơm n’hanh rƀŏng tât hun hao jŏ jong đŏng.