Lôch âk năm rgum joi nting tahen ơm khĭt Y Chông Triêk hŏ rgum saơ n’hanh bôr tâp ta Nghĩa trang Liệt sĩ xã Liên Sơn Lắk, n’gor Dak Lak di tâm rnôk nar 27/7 năm aơ. Nê lah nău dơi bah Rơh plơ̆ sĭt lôch n’gul rach năm khĭt roh mô dơn wat jêh nuih n’hâm ŭch rŏng bah ndrăng băl tahen ma hôm kơl rnăk wâl rngơt bah nuih n’hâm mpŏng kâp. Yuh H'Wai Triêk, oh bu ur tahen ơm khĭt, an gĭt ntơm bah aơ, nar Tahen ơm khĭt – Rmanh 27/7 ăp năm mbra lah nar nkah gĭt nar roh nô.

 "Njăr trong hăn joi nô bah mpôl hên aƀaơ hŏ mpôch dŭt tay, đăp mpăn rnôk nkah gĭt nar khĭt- nar tết ri oh kon hŏ gĭt môch, gĭt ntŭk tâp geh moh săk Y Chông Triêk lah uĕh hôm."

Nău rthi nuih n’hâm bah rnăk yuh H'Wai Triêk lah nău geh kêng dŭt uĕh bah du rơh joi ntoch jong rlău n’gul rach năm, ma chông yôch lah “Trong kan 500 nar măng”.

Wa Võ Thị Hồng, ta phường Ea Kao, n’gor Dak Lak geh nô roh ta ntŭk tâm lơh B2 năm 1972. Âk năm aơ, ƀă ma oh, ƀă ma kon, ƀă ma său hŏ âk tơ̆ joi. Lĕ Tây Ninh tât ăp n’gor miền Tây, lôch nê plơ̆ sĭt dơm. Tĭng ƀư “Trong kan 500 nar măng”, păng hŏ ndơ̆ an ntil ADN bah he, đah nău nsing nơm lah mbra geh nar joi saơ nô.

"Âk năm an ăp mon hăn joi lĕ rngôch ăp nghĩa trang ta nkual Tây Ninh, aƀaơ rơh dja hăn sŏk ntil ADN gâp dŭt mpŏng ngăn. Gâp tăng lư ta miền Tây joi saơ âk nting tahen ơm khĭt ngăn jêng dŭt nsing nơm, bol ơm mô lah nkai gâp mpŏng joi saơ đŏng."

Tâm bah kơt nê, wa Phan Đức Nhuận, ta phường Thành Nhất, hŏ âk tơ̆ lăp tâm ăp n’gor mpeh bah dâng joi oh bu klô lah tahen ơm khĭt Phan Đức Thắng. Geh tơ̆ saơ ta mạng xã hội ntoh du gâl môch tâm trŭp moh săk dơm, păng hăn tât dĭl. Mpŏng lôch nê hôm roh nău mpŏng đŏng. Yơn rơh dja ri êng. Păng nsing nơm khoa học mbra kơl ăp nuĭh hôm rêh wat jêh nuih n’hâm ŭch rŏng bah nuĭh hŏ roh.

"Aƀaơ me bơ̆ khĭt lĕ hôm, yuh nô hŏ ranh ngăn hôm đŏng. Trong nchrăp dja ƀư an nuĭh ƀon lan n’hanh gâp nơm dŭt yô̆ rhơn. Uănh aơ tâm ban kơt rơh tâm lơh n’glĕ dŭt tâm rơh joi tahen ơm khĭt. Rơh dja geh nău mpŏng yor ngih dak n’glăp dŏng công nghệ glo tơm."

Tâm “Trong kan 500 nar măng”, n’gor Dak Lak n’gluh nău ŭch geh rlău 270 nting tahen ơm khĭt. Êng năm 2026 nsrôih joi geh 180 nting tahen ơm khĭt; nkre lôch jêh nău sŏk ntil ADN đah 4.019 môch mô hŏ năl săk ta 33 nghĩa trang.

 Lôch ăp rnoh ŭch tât geh nê lah hang rbăn tơm nău lư dơi ra uănh tay, hang rbăn tơ̆ hăn tât ăp xã n’hanh hang rbăn môch dơi pơk luh na nê̆. Đại tá Ksor Lành, Groi Chính ủy Bộ Chỉ huy Quân sự n’gor Dak Lak an gĭt, Bộ Chỉ huy dôl rgum mpôl kan dŭt âk. Đội K51 dơi tâm pă jêng 8 rmôt gŭ kâp jŭr tâm dâng, kan nsum đah n’gâng kan tâm dâng hăn ôp uănh, ntrŏng năl, rgum joi nting tahen ơm khĭt; nkre njêng 6 rmôt way mât uănh du rơh âk ntil ta ăp nghĩa trang gay rhŏ dŏng uănh năl ADN. Ndrel đah nê lah nău kan nsum bah mpôl công an tâm nău dơn ntil ADN rnăk wâl tahen ơm khĭt n’hanh n’gâng kan Nội vụ tâm ra uănh tay, di rnoh mât prăp nău lư nghĩa trang, môch tahen ơm khĭt.

“Aƀaơ mpôl hên hŏ geh rlău 6 rbăn nău lư tahen ơm khĭt. Mpôl hên hŏ nchih siƀŭt kuăl jă gay njuăl tât ăp mpôl ăp nuĭh n’hanh mpôl hên ƀư phiếu ôp suăng lor nău lư tahen ơm khĭt ma mã QR, ma mã dja, ăp nuĭh gĭt mpeh nău lư nting tahen ơm khĭt mbra nchih ăp nău lư tâm nê n’hanh lât njuăl ri păng mbra lăp tâm máy tơm me bah Bộ chỉ huy quân sự n’gor. Ma trong nkra ƀư dja, nău leo rgum tâp tâm let năp tay mbra geh nău tam lơn.”

Trong kan 500 nar măng ta Dak Lak hŏ geh ăp nău dơi bôk năp tâm năm 2026: rgum geh 19 nting tahen ơm khĭt, tâm nê geh 12 nting tahen ơm khĭt ta Campuchia n’hanh 7 nting tahen ơm khĭt ta n’gor. Rlău 500 ntil hŏ dơi rgum dơn gay rhŏ dŏng uănh năl ADN. Wa Đào Mỹ, Groi Kruanh UBND, Groi kruanh Ban gŭ kâp njrăng, Ban rđău đă “Trong kan 500 nar măng rgum, joi n’hanh năl săk tahen ơm khĭt” n’gor Dak Lak, lah rjăp, bol pah kan dja nar lơn ma jêr jŏt yor năm khay hŏ rŭch ngai, yơn n’gor mbra rgum geh ăp tơm ndơ, ăp ndơ dŏng n’hanh ăp nău lư gay joi tay ăp nting tahen ơm khĭt hôm gŭ tay.

"Mpôl hên rgum lam trong kan chính trị lăp kan, ma ăp trong dơn geh dŭt âk nău lư, grêt dêh ntŭk kan ta ntŭk, dŏng ăp ndơ gay joi saơ nting tahen ơm khĭt hôm gŭ tay ta nâm neh."

Ăp nting tahen ơm khĭt dơi joi saơ lah ntop geh tay du rnăk rngơt bah nău mpŏng kâp, ntop tay du nău ton đah ăp nuĭh hŏ roh dơi tĭng ƀư ăp tŏng. “Trong kan 500 nar măng” mô dơn lah njăr trong hăn kơl joi ma hồ sơ, ma nău nkah n’hanh công nghệ ADN, ma hôm lah njăr trong hăn bah nău tâm rŏng, nău dơn kan n’hanh nuih n’hâm nkah gĭt.