Nău jêr jŏt têh ngăn aƀaơ lah ta nău geh âk n’hanh mât jâng nai dak si ta ăp nkual njônh ngai, nkual jru, nkual ƀon lan rnoi đê̆ yor nău kơl an mô hŏ tâm di n’hanh nău pah kan hôm nha mô dơi . Lam  n’gor geh 135 ngih dak si đah 369 ntŭk ngih dak si ba dâng. Bol ma geh lĕ rngôch ngih dak si lĕ geh nai dak si pah kan da dê, yơn nău ngăn n’gor hôm nha mô tŏng nuĭh kan klâp ma bơi tât 500 nuĭh. Ta meng nĕ, nău kan n’gâng kan 2 gưl ƀư an UBND ăp gưl xã dŭt jêr đŏng tâm nău mât uănh nău way kan, mô tŏng blău na nê̆ tâm nău leo pă dak si tâm ban leo kan ngih dak si kơt lah du ntŭk kan êng.

Ta năp ăp nău ngăn aơ, ta rơh pah kan mhe aơ đah mpôl kan uănh nđôi bôk nău kan bâh Uỷ ban Dân nguyện bâh Quốc hội, UBND n’gor Gia Lai lĕ đă Trung ương ơm ntrŭnh ntĭm đă dơn ngoăy mpeh ntŭk pah kan, nău leo kan nuĭh kan tĭng di nău way kan rnoh nuĭh ƀon lan n’hanh nău ngăn ta ntŭk, nkre lah kơl prăk ntuh kơl an tâm ban ndơ dŏng ntung trong, năp ăp ntil ndơ dak si ta ntŭk kan ba dâng. Mbơh kloh na nê̆ nău way kan ndrel đah ăp nău mĭn rvê bâh ta ntŭk, wa Nguyễn Thị Thanh Lịch, groi kruanh UBND n’gor Gia Lai nkoch. “N’gor ntrŭnh mbơh geh âk nău kơl kan mpeh geh âk nuĭh tât kan yơn kơt lah mô geh nai dak si sĭt. Mpeh ta ntŭk kan dak si, mpeh đah ngih dak si lĕ jêr hôm, hôm mpeh xã rĭ khân păng mô sĭt kan. Aƀaơ, rnoh geh nuĭh kan dŭt âk bâh hên lah 600 rkeh prăk an du hê nai dak si n’hanh kơl prăk manh ngih jay gŭ. Mpôl hên lĕ geh ƀư nău nchrăp gay ma leo kan, đă kan ngai, tâm pleh kan. Yor lah ndơ̆ jur ma mô geh ndơ kan leo kan rĭ mpŭng lir ngăn rnoh nuĭh kan, tâm rnôk ntŭk kan ba lơ, mpôl hên dôl geh mô tŏng nuĭh kan âk ngăn”.

Uănh năl âk nău kan răng dăng bâh n’gor Gia Lai tâm nău uănh năl tay ăp nău kŏ khan, mpôl kan uănh năl kơp dơn Gia Lai lah ngoăy tâm âk ntŭk hăn bôk năp tâm nău ntrŭnh ăp nghị quyết geh âk nai dak si tât kan. Yơn lah, mpôl kan lĕ nkah đă n’gor an geh n’hao nău pah kan ntŭk pah kan, rdâk njêng ntrong kan hao nău kan n’hanh ntĭm nti lôch nti đại học gay ma ăp nai dak si đăp mpăn pah kan. Wa Trần Thị Nhị Hà, Groi kruanh Uỷ ban dân nguyện bâh Quốc hội, Kruanh mpôl kan uănh nđôi lah na nê̆.  “Gia Lai an geh mbơh nău kan, nău kơl gay ma tŏng nău dơi an geh ndâk nsơm ăp nău jêr jŏt, n’gor djăt ma mbơh dăn. Mpôl kan uănh nđôi mbra uănh năl tay na nê̆ lĕ rngôch n’hanh tâm di gay ma ndrel doh rklaih ăp nău jêr jŏt. Lĕ rngôch an geh nău kơl bâh ƀon lan, mhâm ƀư gay ma ƀon lan ngăn ngên lah dơn ăp nău kơl kan ma ăp đồng chí leo kan Đảng, ngih dak dôl knơm  n’hanh geh nău ŭch rŏng.

Nău hăn ndrel n’hanh djăt nău rgop bâh Quốc hội mbra lah nău nsan ntrôl kan gay ma Gia Lai geh njoat doh rklaih nău kŏ văk nuĭh kan, ndâk nsơm nău kan dak si ta ntŭk kan ba dâng, an tâm di đah nău knơm bâh ƀon lan ta ntŭk prêh Tây Nguyên.