Nghị quyết lah rjăp neh ntu lah drăp ndơ khlay mha êng bah neh dak, ntŭk gŭ rêh n’hanh hun hao; lah ndơ n’guăk jêng nău ƀư tơm neh dak, ƀư tơm wăng sa n’hanh rnă njrăng neh dak; lah ndơ dŏng kan ƀư njêng mha êng, tơm ndơ khlay hun hao neh dak. Neh ntu mpeh ndơ dŏng lam ƀon lan tă bah Ngih dak lah ntơh măt nuĭh tơm ndơ n’hanh dơn ngoăy mât uănh; mô dơi ƀư jêng ndơ êng he nơm mpeh neh ntu n’hanh mô an nuĭh dak bah dih dơn rgâl tăch neh ma ăp ntil trong ƀư.

Nghih dak tĭng ƀư nău dơi ntơh măt tơm nuĭh mât dŏng ma nău n’glêh an dăp rgum, trong nchrăp dŏng neh; sŏk mplơ̆ neh, jao neh, an manh neh, kơp dơn nău dơi dŏng neh , an rgâl nău ŭch dŏng neh n’hanh n’glêh an rnoh jong năm dŏng neh; n’glêh an rnoh khlay neh.... Nău dơi dŏng neh, drăp ndơ nkre đah neh dơi pháp luật mât njrăng.

Mpeh rnoh ŭch tât kan na nê̆, Nghị quyết lah rjăp rdâk njêng lam nău lư gưl neh dak mpeh neh ntu tĭng trong rƀŏng rgum, dơn ngoăy, ăp kôp, têh dăng mhe, âk rnoh tât; đăp mpăn buăt nthoi, mbluh rloh, tâm pă nău lư đah ăp ntŭk mât prăp nău lư gưl neh dak mpeh ƀon lan gŭ, sŏk soăy... Tât lĕ năm 2026, wat jêh rdâk njêng ntŭk mât prăp nău lư mbrô đah lĕ rngôch ăp blah neh hŏ dơi rgum nchih nău lư. Nsrôih tât lĕ năm 2027, wat jêh pah kan weh ntrŏng njêng bản đồ địa chính, njêng hồ sơ địa chính n’hanh rdâk njêng ntŭk mât prăp nău lư neh ntu đah rnoh neh mô hŏ geh rgum nchih nău lư.   

Mpeh trok tâm, ntop kơl, đă ntrơn du, sŏk mplơ̆ neh, nghị quyết ân quy định kloh lơn mpeh n’glĕ tât sŏk mplơ̆ neh nkhêp geh nău khlay dŏng an njrăng n’gang neh dak, rnă njrăng, hun hao wăng sa- rêh jêng kon nuĭh, yor ma nău geh neh dak, nsum mpôl. Rgâl âk bah nău mĭn “trok tâm drăp ndơ geh sŏk mplơ̆” tât nău mĭn “plơ̆ jêng tay nău rêh an nuĭh ƀon lan rnôk Ngih dak sŏk mplơ̆ neh”. Ăp ntŭk nchrăp ntrơn du tât ntŭk gŭ mhe đăp mpăn tŏng ăp ndơ dŏng, rhŏ dŏng, uănh khlay tât joi geh trong rêh ƀon lan. ƀư jêng ngăn ngăn nău way nuĭh geh neh sŏk mplơ̆ ân geh ntŭk gŭ, nău rêh ân geh dah mô lah uĕh rlău ntŭk ơm.

Ngih dak tâm pă, mât uănh n’hanh n’glêh an rnoh khlay neh rnôk n’glăp dŏng, mô an jêng trong tĭng âk ir. Rnoh khlay neh tă bah Ngih dak n’glêh an nsing tâm nău ŭch tât hun hao bah tĭng rơh, đăp mpăn ntrŭt ntrôl hun hao wăng sa – rêh jêng kon nuĭh. Ngih dak n’gluh an dŏng nchih rnoh khlay neh, rnoh mbrô rgâl khlay neh, rnoh âk sŏk prăk dŏng neh, prăk manh neh, rnoh âk trok tâm di đah nô nău ngăn geh, tĭng ntil neh đăp mpăn geh nău tâm ban, kloh rvah, tâm ban nău geh ngih dak, ƀon lan n’hanh nuĭh tơm ntuh kơl.

Mpeh leo tĭng ƀư, Nghị quyết jao nău kan na nê̆ tĭng nuih n’hâm kloh nuĭh, kloh nău kan, kloh nuĭh dơn kan an ăp nhih pah kan Trung ương, n’gâng kan, ăp ntŭk tâm dâng tâm nău ƀư trong tĭng n’hanh leo tĭng ƀư Nghị quyết, lơn lah nău rgâl nkra, kơi ntop Luật Neh ntu n’hanh ăp luật geh tât, đăp mpăn geh ăp kôp, dơn ngoăy, năn ngăch.