Tâm mir hvi rlau d ha tâm xã Ea Na (Dak Lak), tahen ơm Trần Quốc Đài ndrel ur păng ntơm mô ru ma yan klih play sầu riêng. Wa hôm ơm tâm săk nơm âk ntŭk sôt rmanh yor ndrak nsiu bah rnôk tâm lơh kăl e. Wa Đài hăn tahen năm 1976, tâm lơh tâm dak Campuchia. Tâm du rnôk lơh joi bah phung khmer Đỏ, wa geh ndrak tahen păng tâm ndur kơi, ty ndrel jâng. Jêh rnôk săm, wa lŏ tâm lơh tât rnôk ƀư lôch jêh nau kan jêh ri mơ hăn sĭt tâm năm 1981. Plŏ ma nau rêh ăp nar, wa hăn tăm cag phê, tiêu, jêh ri leo sầu riêng tăm tay. Tât rnôk aơ, mir rlau du ha geh nklăp 900 rkeh prăk ăp năm. Đah wa Trần Quốc Đài, nau sôt rmanh ƀư ăp nau kan jêng jâk rgănh lơn ma bu êng, yơn mô di nau nê lah păng nsrŭng:

            ‘ƀư moh nau kan ri saơ rgănh da dê, yơn nau vay ri hăn ƀư mir lĕ jêr rgănh hôm, kơt gâp aơ lŏ lah tahen sôt rmanh ri ma geh nau jêr jŏt lơn. Ri ma rnôk gâp ƀư ri nơm ân săch nau kan tâm di ma n’hâm soan, ƀư 6 mông rlu, rđil ma nŭih êng ri bu ƀư 8 mông. Gâp nchiăr săk mbrơi mbrơi ri mra ntoch tay n’hâm soan’.

            Mô ngai ma mir wa Đài lah mir cà phê tăm nsum ma sầu riêng ndrih ueh bah tahen sôt rmanh Hà Văn Quảng. Jêh ăp năm hăn tahen tâm dak Campuchia, wa hăn tât Dak Lak gay ma ndâk njêng nau kan văng sa mhe. Ntơm bah tahen, wa lŏ nsôih râng ƀư nau kan tâm rmôt công an, tahen tâm nkuăl jêh ri ƀư Bí thư Đảng uỷ xã Ea Bông lor ma rnôk rlu ranh. Lôch nau kan, tahen sôt rmanh aơ mơ ƀư mir tay. Tâm rnoh neh du ha tăm cà phê nsum ma sầu riêng, rnăk wa ndâk nau geh đăp mpăn 600-700 rkeh prăk tâm du năm” Đah nŭih ƀon lan tâm nkuăl, nau geh nau ngăn tâm wa Quảng mô knŭng lah mir geh rnoh văng sa âk, ma hôm lah nuih n’hâm leo trong lor bah tahen kăl e. Rnôk nkuăl pơk hvi tay trong hăn ƀon lan, wa pă bơi tât 100m2 neh. Geh nau blau tâm kan mât chăm cà phê, sầu riêng gay ndrel nsĭt geh nau văng sa âk. Wa Hà Văn Quảng nkoch:

            ‘Gâp sĭt rlu ranh lŏ ranh mât chăm mir bah rnăk vâl. Đah du hê tahen, nau ƀư tĭng ueh nuih n’hâm nau kan Wa Hồ, gâp mro hăn leo trong lor gay kônh wa êp nơm kơt tĭng, ƀư tĭng”.

            Jêh rnôk tâm rnglăp rmôt kan hành chính gưl xã, Rmôt tahen ơm xã Ea Na n’gor Dak Lak geh 816 nŭih, tâm nê geh 39 nŭih lah sôt rmanh ơm. Âk nŭih bol ma săk lĕ ranh, năm lĕ âk ma hôm râng ăp nau kan tâm dâng. Wa Trần Quốc Đài ndrel wa Hà Văn Quảng lah bar nŭih ntoh lư geh rmôt săch gay ƀư rêng hvi tay nau kan tuch tăm. Wa Phương Toại Nguyện, Groi Kruanh rmôt tahen ơm xã Ea Na mbơh, wa Đài ndrel wa Quảng kŏ ƀa ƀơ ntĭm nti ăp nŭih nau blau mât chăm cà phê, sầu riêng, tiêu, kơl an ăp rnăk hôm mâp nau jêr hun hao tâm nau rêh:

            ‘Rƀŭn rgum ƀa ƀơ ăp khay, ăp tĭng khay, phung hên ndâk njêng bôk râng ăp nau kan hăn mêt uănh nau kan hun hao văng sa săk tam. Phung hên hŏ nkoch trêng, pơk rêng vi nau kan aơ tât đah ăp nŭih ê hŏ geh nau dơi blau ngăn mpeh nau kan mât chăm cà phê, sầu riêng, tiêu đah ăp ntrong leo ăp nŭih tât ăp ntŭk mir bah bar đồng chí aơ gay ma uănh, joi kơt tĭng”.

            Nau tâm lơh tâm su hŏ lăn ngai, ăp ntŭk sôt rmanh ơm tâm săk jăn hôm ơm, yơn nau nsôih bah tahen mô knŭng nsrŭng tâm rnôk dôl hăn tahen. Ntơm bah ntŭk tâm lơh tâm su kăl e ân tât mir cà phê, sầu riêng rnôk aơ, khân păng hôm nsôih ƀư nau kan, pah kan đah rup gui ueh lăng, ngăn ngên mpeh nau ơm uah bah tahen Wa Hồ tâm rnôk tâm lơh: Mô knŭng blau tâm lơh rnôk neh dak ŭch, ma hôm nâp rjăp ndâk njêng ƀon lan rnôk neh dak geh đăp mpăn./.