Trong hăn jong 1,7 km leo lăp tâm ƀon Bu Sir, xã Quảng Sơn, n’gor Lâm Đồng nar aơ têh, hvi, kloh, nthoi ma ăp ngih mât nau đăp mpăn tâm nklang âk nau jêng n’ir bah cà phê ndrel yôk prêh. Nŭih ƀon lan hăn ro, nchuăn rdeng ndoh ndơ tuch tăm nơih ueh; trong ƀon geh nâp nâl, nau rêh tâm ƀon geh đăp mpăn, ueh lăng. Wa H’Thoan, nŭih ƀon Bu Sir mbơh, lĕ ma ƀon lĕ ndrel rgop n’hâm, pă êng neh, ndrel ma Ngih dak ndâk trong ƀon aơ. Ndrel kŏ tĭng wa H’Thoan, bu ranh nkre lah ƀư Kruanh ƀon Y Long hŏ rgop âk ngăn n’hâm soan. Wa nsôih tât ăp rnăk vâl bonh đă ƀon lan pă neh, nsum n’hâm pơk trong: "Bah năp nơh ri trong hăn jêr ngăn, yơn geh wa Y Long hăn tât ăp ngih bonh đă ƀon lan pă ân neh, rgop n’hâm ƀư trong. Rnôk aơ trong ueh, ndeh têh, ndeh hon đa hăn ro nơih ngăn, n’ăp ma nơm hăn jâng kŏ kloh, ueh”.

Bu ranh Y Long lah ngoai tâm 880 nŭih bu rnơm ngăn tâm ƀon lan rnoi mpôl đê̆ Lâm Đồng. Mô knŭng bonh đă ƀư trong, leo trong tâm pah kan jan sa, wa hôm geh nau ngơi khlay tâm ƀon lan, rgop nau nkoch trêng, mbơh pháp luật, mbơh rklaih nau tâm rkeh, ƀư nâp nau tâm rnglăp ndrel mât nau đăp mpăn tă tâm dâng.

 Wa ƀa ƀơ hăn mâp, tâm nkoch bri, nkah đă kônh wa ƀon lan ndrel ăp mon sau ƀư tĭng pháp luật, mô djăt nau nsŭk, mô tâm joi nau tâm lơh, ntŭng rmuănh, rgum n’hâm pah kan, jan sa, ndâk njêng nau rêh. Đah Wa, ŭch kônh wa kơt tĭng ndrel ƀư tĭng ri ê lor săm nơm ndrel rnăk nơm ân geh ƀư leo trong: ‘Bonh đă kônh wa ƀư ân tâm di, mô dơi tĭng nau bu lah, lah nơm tĭng djăt nau nsŭk đă ri mô tâm di ôh. Nơm mô dơi tâm joi nau, mô tâm lah tâm janh, mô ntŭng rmuănh...Nsôih pah kan jan sa dơm. Ê lor, nơm ân geh ntĭm nti kon sau tâm rnăk vala nơm, ur kon nơm jêh ri mơ dơi nkoch mbơh, đă bu djăt nau nơm”.

 Lah kơt ƀon Bu Sir geh nau leo trong, tâm dăch dơh bah bu ranh ƀon Y Long ndrel âk năm ƀon geh nau dơi rnê nkhôm ƀon văn hoá, nau kan đăp mpăn chính trị, rnăk njrăng nâp, nau rêh ƀon lan nar lơn ntor ueh, ri tâm xã Bảo Thuận, bu ranh K’Tiếu, thôn Duệ kŏ lah nŭih bu rnơm, hŏ kơl an rnoi K’Ho thôn Duệ mât nau ơm yau, ƀư ueh nau ơm yau ueh bah rnoi nơm. Lah nŭih blau mât chĭng gong ơm yau nơm, wa nsôih ntĭm nti ân rơh mom, nkoch mbơh ân ƀon kan jăng lơi ăp nau rluk mâl, nau vay ơm mô hôm tâm di, tâm rnglăp gay hun hao tuch tăm ndrel mât đăp mpăn, rnă njrăng.

 Wa ƀa ƀơ râng ăp nau rƀŭn rgum tâm dâng gay gĭt nau ntrŭnh, trong kan, jêh nê nkoch trêng tay ân rnăk vâl, rnoi deh ndrel kônh wa đah nau ƀư tâm dăch, nơih gĭt. Ntơm bah nau kan n’hêl tâm nau rêh, bu ranh K’Tiếu nsôih bonh đă ƀon lan ƀư tĭng pháp luật, tâm rnglăp, mô ân ăp nau tâm rkkeh geh ntoh jêng nau tât jêr têh: ‘Gâp ân geh nsôih gơih râng ăp rnôk rƀŭn nchră gay ma djăt ăp nau ntrŭnh, ntrong kan bah Đảng ndrel pháp luật bah Ngih dak, jêh nê tât nkoch mbơh ân rnăk vâl, ân ƀon lan ndrel rnoi deh nơm. Gâp bonh đă, leo nau ntrŭnh, ntrong kan lăp dŏng ngăn tâm nau rêh gay ma ân bu gĭt rbăng”.

Ntơm bah Quảng Sơn tât Bảo Thuận ndrel âk nkuăl rnoi mpôl đê̆ êng êng, rmôt kan geh bơi tât 900 nŭih geh bu rnơm dôl jêng ntung thoi đah ƀon lan ndrel gưl uỷ, n’gâng kan, Mặt trận ndrel rmôt Công an. Đah nau gĭt tât nkuăl gŭ ndrel nau ngơi geh nau nâp tâm ƀon lan, khân păng rgip nau leo nau ntrŭnh, pháp luật tât ma ăp rnăk vâl, năn gĭt nau ŭch, au kan, rklaih nau tâm rkeh, bonh đă kônh wa mô dơi tih pháp luật, mô djăt nau nsŭk đă, ƀư rlăm, lơh jêng tâm nkhah.

Nau kan nê hôm geh ƀư ueh bah nau kan mât njrăng êng tâm dâng. Tât rnôk aơ, Lâm Đồng ndâk geh 214 nau kan mât njrăng êng mpeh nau đăp mpăn, rnă njrăng, geh nau râng bah nŭih bu rnơm, tâm nê geh 186 nau kan ƀa ƀơ, săk tam. Ăp nau kan kơt “Giáo xứ đăp mpăn”, “Nteh loa đăp mpăn”, “Nteh mông đăp mpăn”. “Ƀon lan đăp mpăn, rnă njrăng nâp nâl”... dôl ƀư ueh nau dăng dơi tâm ƀon lan tâm nau mât nâp nau njrăng, rdâng dnrel mât nau đăp mpăn tâm ƀon lan.

Wa Bon Yô Soan, Groi Kruanh Uỷ ban MTTQ Việt Nam n’gor Lâm Đồng ân lah, bu ranh ƀon, nŭih bu rnơm lah ăp nŭih leo trong tâm nau kan rgum rƀŭn ƀon lan, ƀư nâp nau tâm rnglăp ndrel ndâk njêng ƀon lan đăp mpăn tă bah tâm dâng: ‘Nau dơi bah bu ranh ƀon, ăp nŭih bu rnơm ntoh lư tâm ƀon lan rnoi mpôl đê̆ dôl ƀưu ueh kloh ngăn tâm ăp nhoat ntrŭt jăng, jut jăng ăp nau rluk mâl ơm mô hôm geh tâm di. Ngăn lah, nau ntrŭnh mbơh nau ntrŭnh, ntrong kan bah Đảng, pháp luật bah Ngih dak tâm ƀon lan, lah nŭih leo trong, nŭih leo ăp nkô̆ nau kan ueh lăng tâm nau ndâk njêng ƀon lan, ndâk jêng ƀon, xã, ndâk ƀon lan gŭ ndrel nau ton tă ơm kăl e bah ƀon lan. Nau dơi bah bu ranh ƀon, kruanh ƀon, nŭih bu rnơm lah nau khlay ngăn”.

 Du nau nkah ân năn, du nau rjaih nau ân năn rnôk geh tâm rkeh mô lah nau kan hăn bonh đă kônh wa ƀon lan mô dơi tĭng ăp nau nsŭk đă, nau rlăm kŏ rgop nau ƀư ueh ngăn nau dơi rklaih ăp nau jêr tă bah ơm, tă bah tâm dâng. Rnơm nau nê, nau leo trong ndrel nau kan ƀư npa nâl bah ăp bu ranh ƀon, nŭih bu rnơm, nau mât nâp tâm ƀon lan, rnă njrăng bah tâm dâng geh mât nâp ndrel nau đăp mpăn mro geh bun dăp ăp nar tâm ăp ƀon, lan bah n’gor Lâm Đồng./.