Ăp nar aơ, yuh Hly Bya, ta phường Thành Nhất, n'gor Dak Lak, ndăn joi rvăt ndrôm sam ƀŭt giáo khoa an bar hê kon, du hê kon nti jrô 3 n'hanh du hê kon lăp jrô 10. Ăp kon mpeh tâm nău dơi kơl, an manh ndrôm sam ƀŭt giáo khoa jêng bah năp nĕ rnăk wâl kâp ngih sam ƀŭt pă an ndrôm sam ƀŭt, mô nchrăp rvăt ơm. Tât rnôk năm nti mhe ntơm, ngih sam ƀŭt mô hŏ tŏng ndrôm sam ƀŭt gay an kon hŏk manh, ri ăp ntŭk tăch ndrôm sam ƀŭt lĕ mô hôm geh ndrôm sam ƀŭt giáo khoa. "Hăn joi rvăt săm ƀŭt ăp ntŭk ngăn. Nklăp ma tât 5, 6, 7 ngih sam ƀŭt đŏng. Jrô 1 ri tŏng hôm yơn ma hôm kon gâp nti cấp 3 ri lŏ mô tŏng 4, 5 ntil sam ƀŭt đŏng hôm ".

Mô knŭng me bơ̆ nsrôih joi ndrôm sam ƀŭt, ta du đêt ngih sam ƀŭt, nai ntĭm dôl ngăch joi ăp ntil ndrôm sam ƀŭt gay nău ntĭm nti mô geh roh, tăch proăt. Nai Lê Nguyễn Phương Minh, nai Ngih sam ƀŭt phổ thông nội trú Tiểu học - THCS Buôn Đôn, xă Buôn Đôn, n'gor Dak Lak an gĭt: "Aƀaơ lĕ rngôch ăp jrô nti geh du đêt băl mô tŏng ndrôm sam ƀŭt đŏng. Ăp kon djăt manh ndrôm sam ƀŭt bah oh nô hăn lor gay dŏng ƀa ƀơ. Geh ăp mpôl bar hê băl geh ndrôm sam ƀŭt ri tâm pă nsum, đê̆ đŏng pe hê dŏng nsum du ndrôm sam ƀŭt".

Wa Thái Văn Lộc, Hiệu trưởng Ngih sam ƀŭt nội trú Tiểu học - THCS Buôn Đôn an gĭt, jêh ntơm lăp năm nti, ngih sam ƀŭt hôm e mô tŏng bơi 65% ndrôm sam ƀŭt giáo khoa. Ta năp măt, ăp nai dôl rgŏ jă ndrôm sam ƀŭt giáo khoa ơm bah ăp rơh nti bah năp gay nkra du gâl. Rnoh hôm ƀa ƀă hôm e kâp: "Ngih sam ƀŭt dăn đă ăp ntŭk ƀư sam ƀŭt sam tra, nkra ơm ntop tay tơm sam ƀŭt, lơn lah ăp bôk sam ƀŭt hôm e mô tŏng ta nkual jru, nkual ngai, gay kon hŏk geh tŏng sam ƀŭt nti".

N'gor Dak Lak geh nklăp 650.000 kon se nti bah mầm non tât trung học phổ thông dôl nti ta ăp ntŭk ntĭm nti. Năm nti 2026-2027, rlău 34% kon se nti mpeh ăp rmôt nuĭh dơi kơl dơi geh nău kơl an ndrôm sam ƀŭt giáo khoa. N'gâng kan ntĭm nti Dak Lak dôl mbơh ƀư trong nchrăp dŏng tơm prăk ngih dak rwăt ndrôm sam ƀŭt, ndơ̆ tâm thư viện ngih sam ƀŭt gay kon se nti manh. Yơn lah, rnôk ƀư dôl mâp jêr jŏt yor mô tŏng ndơ pă an. Tĭng wa Lê Thị Kim Oanh, Groi Giám đốc N'gâng kan ntĭm nti Dak Lak, n'gâng kan lĕ tâm ôp đah ăp ntŭk tăch sam ƀŭt, uănh năl tơm sam ƀŭt ta du đêt ntŭk êp nê yơn mô hŏ đăp mpăn tŏng rnoh gay ƀư rwăt rgum. "Aƀaơ n’gâng kan ntĭm n’hanh nti n’gor lĕ pah kan đah ăp ntŭk kan tăch rgâl, Nhà xuất bản Giáo dục Việt Nam n'hanh N’gâng kan ntĭm n’hanh nti gay mbơh nău jêr jŏt, dăn đă geh trong mkra droh rklaih mpeh tơm ndơ dng. Nău ŭch ta năp măt lah ơm ntop tay rnoh ndrôm sam ƀŭt hôm e mô tŏng, đăp mpăn kon hŏk geh ndrôm sam ƀŭt gay nti".

Hương Lý/VOV Tây Nguyên