Tâm nklang yan vai Tây Nguyên, xã Rờ Kơi, nkuăl Sa Thầy, n’gor Kon Tum hôm ndrih bah rlau 4.300 ha tơm tăm jŏ năm ndrel tơm sa play. Tâm nkuăl n’har bri aơ hŏ geh ngih máy nkra rtăk cao su, ntŭk mât rong prêh mhe, ntŭk tăm tơm si dŏng nau kan mhe...wa A Êl, bu ranh ƀon Gia Xiêng, mbơh, nkual n’har bri Rờ Kơi mô hôm lah nkuăl ngai, nkuăl jêr tay ôh:

            ‘Rđil ma bah năp nơh ri âk nau rgâl ngăn, ntơm bah kon nŭih, ndơ nsoh, nau mbơh ngơi tât nau hun hao văng sa. Rơh êp aơ hun hao dăng. Rnôk aơ ri kônh wa n’huch tơm bum ma hao âk tơm cà phê, cao su. Kônh wa ƀư tĭng nau ntrŭnh, ntrong kan bah Đảng, pháp luật bah Ngih dak”.

            N’gor Kon Tum geh 13 xã n’har bri tâm dăch ma 2 dak Lào, Campuchia. Tâm ăp năm tâm lơh mprơh Mỹ, aơ lah nkuăl neh geh Mỹ lơh hăch năn gay rdâng lơi tahen nơm hăn tâm trong Trường Sơn. 50 năm jêh rlaih đăp mpăn, ndrel ma trong Hồ Chí minh, quốc lộ 14C geh ntuh kơl nkra jêng nau nthoi đah nkuăl n’har bri jong rlau 292km.

            Ntơm nkuăl neh geh lơh hăch yor ndrak nsiu, dak si hoá học tâm nrôk tâm lơh, Kon Tum hŏ hao dăng. Năm e, rnoh geh ndơ bah nkuăl lah 50 rbăn rmen, nau geh bôk nŭih rlau 68 rkeh; nau hun hao 8,02% dậ tal 24 tâm lam dak ndrel prêh ngăn tâm nkuăl Tây Nguyên. Wa Nguyễn Tấn Liêm, Giám đốc N’gâng kan tuch tăm ndrel ntŭk ntu nkuăl Tây Nguyên, mbơh, nau kan tuch tăm geh nau dơi rgop khlay đah nau hun hao văng sa bah n’gor:

            ‘Tâm 4 năm plŏ ma aơ, ngăn lah năm 2021 ntŭk kan tuch tăm bah phung hên hao lah 5,75% dâk tal 5 tâm rnoh 63 n’gor, nkuăl ƀon têh. Năm 2022 hao 6,19% dâk bôk năp. Năm 2023 hao 6,67% dâk tal 5 ndrel năm 2024 hao 5,97% dâk tal 2. Tâm 4 năm ma aơ nau hun hao nau kan tuch tăm dâk tâm rnoh 5 âm lam dak”.

            Rnơm hao dăng, n’gor Kon Tum rnôk aơ njêng geh 2 nkuăl văng sa geh nau dăng, geh nkuăl ƀon têh Kon Tum ndrel nkuăl Kon Plông. Ƀư ueh nau dôl geh. N’gor njêng dơi nkuăl tăm tơm dak si rgum ngăn tâm 3 nkuăl Tu Mơ Rông, Đăk Glei, Kon Plông đah rnoh rlau 13 rbăn ha, tâm nê 2.900 ha sâm Ngọc Linh. Nkuăl ƀư nau pâl n’aih neh dak Măng Đen tâm nkuăl Kon Plông jêng ntŭk tât rgum âk năch tâm ndrel bah dih dak.

            Bah năp nau ŭch bah rơh ơm tâm rnôk rach năm hao săk bah rnoi mpôl, ƀư tĭng nau rđau bah Trung ương, n’gor Kon Tum hŏ ƀư dăp rgum trong kan tĭng trong “Nâp-gleh-dăng-săk nâp-săk tam”. Wa Dương Văn Trang, Uỷ viên Trung ương Đảng, Bí thư n’gor uỷ, Kruanh HĐND n’gor Kon Tum mbơh, lam ntrong kan chính trị bah n’gor dôl nsôih ƀư jêh nkô̆ nau hun hao 10% năm 2025, prêh ngăn nkuăl Tây Nguyên:

            ‘Rơh tât mra hôm âk nau kan ndal ŭch lam ntrong kan chính trị ân geh pah kan nsôih, rjăp đah nuih n’hâm njăch ndăn, rjăp ndrel nau kan prêh. Ăp đồng chí tâm gưl uỷ, rmôt rđau kan tâm ntŭk kan ân lŏ ƀư ueh nau dơi leo trong lor, tâm rnglăp, nsum n’hâm, ndrel rlet âk nau jêr, ntul rlong ƀư jêh nau kan geh jao tâm di ma nau rnơm bah Đảng bộ ndrel ƀon lan tâm n’gor”.

            50 năm jêh nar rklaih, ntơm nkuăl neh geh âk nau khuch, hoach tâm rnôk tâm lơh, n’gor Kon Tum dôl hao săk jêng du ntŭk ang tâm nau hun hao bah Tây Nguyên. Lăp tâm rnôk mhe, đah nau nsôih rjăp, Kon Tum dôl ăp nar ƀư rjăp nau dăng, rƀŏng tât nkô̆ nau hun hao ngăch, nâp nâl, tâm di lah nkuăl neh janh dăng./.