Nău aơ lĕ ƀư dŭt âk ta Dak Lak tâm yan Lễ hội Sầu riêng mhe rlău. Ta ăp xă Krông Pắc, Ea Knuếc, Cư M’gar, Krông Búk, Quảng Phú, Ea Tul, Krông Năng, phường Cư Bao n’hanh nkual mpla nsơ ndơ OCOP bah n’gor Dak Lak lĕ ƀư 16 rơh livestream ta Facebook, TikTok Shop n’hanh ăp trong tăch rgâl điện tử. Ăp rơh livestream wăch rgum rlău 4 rkeh nuĭh uănh, nklăp 8.700 samƀŭt nchăm ndơ, rlău 146 tấn sầu riêng rih dơi tăch, sŏk geh nklăp 11 rmen prăk. Nău dôl uăn lơn ăp rnoh nĕ lŏ geh ta ăp nuĭh ntoh bah năp măy quay. Nĕ mô knŭng lah ăp nuĭh ntoh lư, mô lah ăp nuĭh tăch ndơ blău. Âk cán bộ, kruanh xă, đoàn viên druh ndăm, doanh nghiệp, HTX n’hanh ăp nuĭh ƀon lan nơm na nê̆ lăp sóng.

Ta xă Ea Knuếc, Bí thư Đảng ủy, Kruanh Hội nông dân xă Ngô Thị Minh Trinh na nê̆ râng livestream, nkoch mbơh n’hanh tăch sầu riêng an nuĭh ƀon lan. Ta âk ntŭk êng, cán bộ xă “lăp ƀư đŏng” nuĭh tăch ndơ, ndrel ƀon lan nkoch nkô̆ nău mpeh nkuao neh, mir tơm n’hanh ndơ bah ƀon tơm.

Dơi lah, du gâl cán bộ bah dâng dôl jêng ăp “nuĭh ntoh măt mrô” bah ndơ lŏ mir Tây Nguyên. Nău aơ an saơ livestream mô êng lah trong tăch ndơ. Tă bah ăp rơh pơk sóng, nuĭh dŏng dơi uănh sa nkual tăm, nuĭh tăm, trong mât chăm, nău nkoch bah ndơ n’hanh nău uĕh bah nkual neh Tây Nguyên.

Gay kơl ăp nuĭh tơm OCOP n’hao blău mpla nsơ, nkoch mbơh n’hanh tăch ndơ ta ntŭk mrô, mhe rlău, N’gâng kan Khoa học n’hanh Công nghệ n’gor Dak Lak lĕ ƀư tiăr nti “Gĭt blău livestream tăch ndơ ta trong mrô”, mpeh trong tăch ndơ n’hanh ndâk njêng moh êng ta trong mrô; trong ndâk ƀư nkô̆ nău, nchih livestram; nău blău nkoch mbơh, tâm rgop n’hanh mkra nu nău tâm rnôk tăch ndơ trực tuyến. Ăp nuĭh way kan ntĭm trong ndâk ƀư rup an êng nơm hăn ndrel đah moh êng ndơ, ƀư săk rnglăy nău rêh jêng, ntŭk tăch điện tử n’hanh kơt dŏng rgâl mrô tâm mpla nsơ ndơ OCOP.

Bôk nău ƀư tiăr nti ƀư 5 rơh livestream ta Ntŭk rgâl mhe ƀư mhe n’hanh du đêt ntŭk kơt Tuy Hòa, Tây Hòa, Krông Năng, Buôn Ma Thuột. Tă bah nĕ, ăp nuĭh tơm dơi ntĭm ƀư ngăn, ntơm gĭt blău n’hanh ndâk ƀư trong tăch trực tuyến tâm di đah ndơ bah nơm.

Wa Trần Văn Sơn, Groi Giám đốc N’gâng kan Khoa học n’hanh Công nghệ n’gor Dak Lak, an gĭt jêh ăp bôk nău kan ƀư ngăn, N’gâng kan n’glôn jêh, lôch trong ƀư gay ăp xă dơi kơt dŏng, mbơh ƀư tâm di đah nău geh ngăn. “Jêh rnôk ƀư ngăn, mpôl hên mbra n’glôch jêh tay trong ƀư gay an ăp xă dơi kơt dŏng n’hanh mbơh ƀư, lơn lah an geh du ntŭk kan hăn ndrel. N’hanh ntŭk kan hăn ndrel nĕ mbra hăn đah ăp xă gay ma ndâk njêng ăp ntŭk tăch ndơ livestream, lơn lah ăp ndơ ueh kah, ndơ OCOP bah n’gor ndơ̆ an ntŭk tăch điện tử”.

Yơn lah, livestream tăch ndơ mô di mpông pơk ueh ngăn gay mkra nău ntŭk tăch ab bdơ lŏ mir. Du rơh tăch ndơ dơi nsĭt hang rbăn samƀŭt nchăm, yơn gay dơi mât năch, ndơ an đăp mpăn ueh kah; ndoh ndơ an geh kloh tu tơm; tâl dŭng, mât prăp, rdêng an ueh. Ngai lơn tay lah nău nkoch ndâk njêng moh êng n’hanh boăt nthoi nkra njêng nâp nâl./.