100 ngih rƀŭn rgum nsum tâm rgop ma njrăng rdâng dak lip geh ntrŭnh ƀư tâm 27 xã, phường, rnoh ntuh kơl rlau 170 rmen tă bah tơm prăk n'gor Dak Lak. Bôk nau kan ntơm ƀư lơ 27/6/2026. Ăp ntŭk kan geh nkra 2 dăp, đah 3 ntil ndơ ƀư tâm di ma nau vay ơm bah ăp nkuăl, rnoh neh nklăp 300m2 ăp ngih. Tât rnôk aơ, dĭng lĕ ntŭk kan hŏ jêh ndrel dôl jao ân dŏng. Râng nar ƀư sa nkra, wa Đặng Kim Hùng, thôn Ân Niên, mbơh nau geh tay ngih rƀŭn rgum kơl an ƀon lan nchrăp lơn rnôk trôk nar lơh:  "Du đê̆ rnăk jay jê̆ kơt mhe nơh kônh wa dŭt jêr jŏt ngăn. Rnơm Ngih dak ntop kơl lah ƀư jay nâp nâl kơt aơ lah kônh wa dŭt rhơn ngăn, dŭt răm ngăn."

Gay ndơ ƀư dơi ndâk ƀư di ntŭk, dơh an nuĭh ƀon lan dŏng, âk rnăk lĕ ŭch êng an neh. Wa Nguyễn Liễm, ta thôn Hiệp Đồng, xă Hòa Xuân, lĕ an bơi 450m² neh bah rnăk wâl gay ndâk ƀư jay rgum rƀŭn nsum mpôl nkre der dak bŭk, nkoch:   "Mông nar jay nâp nâl, prêh rlău 1m rđĭl đah rơh dak bŭk mhe nơh, jêng kônh wa dŭt rhơn, lah dak bŭk mô lah phŭt tât ri rgum ta nê lĕ rngôch. Lah nsum ta nê mông nar dŭt đăp mpăn"

 Wa Nguyễn Thiên Văn, Groi Kruanh UBND n'gor Dak Lak lah rjăp, ăp ndơ ƀư nkre rhŏ dŏng nău rêh nsum mpôl, nkre ntŭk nkhah êng đăp mpăn rnôk trôk nar lơh. Yor nê, ăp xã, phường ân mât uănh, mât nkra, dŏng geh nău tam; ôp uănh tay ăp ndơ dŏng mpeh điện, dak, nău lư gay nchrăp dŏng ƀư ntŭk nkhah êng rnôk geh trôk nar lơh. Wa Nguyễn Thiên Văn đă ăp ntŭk kan, n'gâng kan n'hanh ăp xã, phường uănh năl nău kan lvang 1 Nău nchrăp ƀư ntuh kơl ndâk ƀư ngih rƀŭn rgum nsum tâm rgop đah njrăng n'gang dak lip ta thôn, ƀon, nkual phố. Tă bah nĕ, mĭn uănh pơk hvi ta ăp nkual way geh nău tât bâh mih dak buk, pĭch rlâm.  "Lor bôk năp lah rhŏ dŏng an nău ŭch geh dŏng văn hóa nsum mpôl, ăp nău ƀư khlay bah thôn, ƀon, nkual ƀon têh. Lơn lah tâm trong kan njrăng n'gang trôk nar lơh ri nkre đah rdâk njêng trong nchrăp 4 ta ntŭk, yor kơt nê̆ ta ntŭk ân ra uănh tay ăp tŏng ndơ dŏng, điện dak, mbơh nău lư gay nchrăp ƀư ntŭk ntrơn du, njrăng n'gang đăp mpăn an nuĭh ƀon lan rnôk geh nău đă mô lah rnôk geh trôk nar lơh tât."

Nam Trang/VOV - Tây Nguyên