Rhoăt luh nău tă ơm gĭt bah rơh dak bŭk têh rơh khay 11/2025, năm aơ, nău joi ntŭk der gŭ an nuĭh ƀon lan ta ăp nkual n'glău dak bât, nkual n'glău dak bât dơi n'gor Dak Lak lơn lah uănh khlay. Ta ăp xã mpeh luh nar n'gor, 100 jay nkhah êng nsum mpôl hŏ nklăp ƀư lôch jêh, tŏng ăp, ngăch ndăn jao an tâm n'gul khay 9 aơ. Ndrel đah nê, ăp ndeh rhiăng jay nkhah êng tĭng ăp rnoh, trong ƀư êng êng dơi rdâk ƀư bah ăp tơm prăk kon nuĭh rgop. Ta ăp ntŭk mô geh jay dêr dak bŭk, kônh wa ntêm nkrem êng gay gay ma ndâk ƀư jay prêh der dak bŭk ta jay.

Ndơ sa, ndơ dŏng khlay n'hanh dak ngêt gay njrăng rnôk mih dak lip geh tât lah nău ân geh nchrăp lor tâm rnăk vâl. Ntơm bah nău ngăn âk nŭih tâm ndrel jêh lôch bôl mô geh tŏng ndơ sa, dak ngêt n'hanh kho ao răm, bok n'gut gay dŏng tâm rơh dak bŭk năm e, kônh wa rhuăt luh nău tă ơm gĭt kan tâm pah kan nchrăp lor tâm khay mih dak lip năm aơ.

 Mpeh đah n'gâng kan ta ntŭk n'hanh ăp mpôl kan way kan, nău kan nchrăp njrăng n'gang trôk nar lĕ dơi nchrăp uĕh. Bah năp khay mih, Cục mât uănh đê điều n'hanh jrô kan njrăng n'gang trôk nar lơh (N’gâng kan tuch tăm mât rong n’hanh Ntŭk ntô gŭ âm) tâm rgop đah N’gâng kan tuch tăm mât rong n'hanh Ntŭk ntô gŭ âm ta n’gor Dak Lak, Viện Dinh Dưỡng (N’gâng kan dak) ƀư jrô tiăr nti "N'hao nău dơi kan nsum mpôl tâm nău ƀư tĭng uănh năl nău tât khuch trôk nar lơh n'hanh mât đăp mpăn ndơ sa ngăch ngăr” ta Dak Lak. Tă bah nĕ, ăp nuĭh nti lah ăp nuĭh kan ăp rmôt kơl nuĭh rmanh, rmôt rnă njrăng đăp mpăn ăp xă, phường… dơi ntĭm nti ƀư tĭng ăp ndơ dŏng uănh năl nău tât khuch trôk nar tĭng nău kan nsum mpôl; uănh năl ăp nkô̆ nău dơh geh tât khuch; dăn đă ăp trong nkra njrăng n'gang, kơt tĭng tâm di đah nău ngăn geh ta ntŭk; ntĭm nti nău kan nchrăp lor n'hanh đăp mpăn ndơ sa kah, ngăn lah kon se n'hanh nuĭh ranh... Wa Phương Văn Lành, Bí thư Đảng ủy xã Hòa Thịnh - ngoăy tâm ăp xã nkual n'har bri mpeh luh nar, n'gor Dak Lak, an gĭt: “Xă lĕ tâm rgop nsum đah N'gâng kan njrăng rdâng trôk nar ƀư nău ntĭm nti nău gĭt blău, nău dơi mpeh njrăng n'gang trôk nar, rdâng lơh mih sial an kônh wa; nkre nchrăp ndeh n'hanh ao n’ông an ăp thôn gay lor nchrăp. Ndrel đah nĕ, xă lĕ dơn geh ăp cano đah nău dăng têh gay ma kơl an nău kan rdâng lơh nchrăp njrăng n'gang trôk nar lơh tâm let năp tay”.

Tĭng wa Đào Mỹ, Groi kruanh UBND n'gor Dak Lak, aƀaơ n'gor dôl ndăn ngăch kơp uănh, nchih rgum trong nchrăp rdâng lơh trôk nar lơh ăp khay kêng dŭt năm 2026. Tâm ăp xã, rgum ƀư nâp nău kan "puăn ta ntŭk", n'hao nău dơi gưl kan xă; tâm pă ndơ dŏng, ndeh rklư, ndơ ntrŭp dŏng n'hanh ndơ ngêt sa ta ăp nkual geh ma nău tât âk, đăp mpăn gĭt tât n’hanh dŏng dâl. Nkre, UBND n'gor Dak Lak ntĭm rđău ăp xă ndâk njêng trong kan tâm rgop, tâm kơl tĭng n'glău dak bât, n'hong dak bât chŏl, nkual mper dak lêng n'hanh ăp nkual geh ma nău tât âk. Mpôl way gŭ kâp njrăng kơl bah n'gor tât xă rgum ntĭm nti nchrăp rdâng lơh tâm ăp nău tât ndal đŏng.  “Aƀaơ hin phung hên lĕ dôl ƀư tay uănh rjăp Rnâng kan rđău kan Njrăng n'gang ƀon lan ta gưl bah dâng gay tâm di đah nău nơm rdâng lơh đah ăp nău tât ndal ta ntŭk.