Tĭng Nghị quyết Trung ương 11 khóa 13, ntơm bah nar 1/7/2025, lam dak mbra ƀư n’gâng kan bar gưl lah gưl n’gor (n’gor, nkual ƀon têh mpeh Trung ương), gưl xã (xã, phường, đặc khu mpeh n’gor, nkual ƀon têh). Aơ dơi uănh lah njuat hăn đăt ndal tâm rgâl trong dăp rgum nuĭh kan, gay glêh tam, kan geh nău ngăch yach n’hanh tâm di đah nău ŭch geh hun hao tâm rơh mhe.

Đah nău ƀư n’gâng kan bar gưl rlău ma tĭng ƀư nău dơn kan, n’glĕ nău dơi kan aƀaơ, gưl xã mbra dơn mât tay nău dơn kan bah gưl nkuâl; dơi tâm pă gưl âk lơn. Ntop tay nău kan, ntop tay nău dơn kan, mhâm ƀư gay nhih pah kan gưl xã mât dŏng rhong uĕh, rhŏ dŏng an ƀon lan uĕh lơn?

Tĭng Thứ trưởng Bộ Nội vụ Nguyễn Thị Hà, gưl xã lôch n’glăp mbra dơi njêng ăp Ntŭk rgum kan gay wơt dơn n’hanh nkra ƀư siƀŭt an nuĭh ƀon lan n’hanh doanh nghiệp. Ăp siƀŭt ntơm nơh mpeh gưl nkuâl mbra dơi ndơ̆ na nê̆ an gưl xã. Rêng ƀư siƀŭt mbra dơh glêh, koh hŭch gưl ƀư ndranh:

N’gâng kan ta gưl xã mbra dơi ntăm an âk nău dơi lơn, leo ƀư nuĭh kan n’hanh trong kơl công chức, công vụ mbra dơi rgâl mhe, mbra tŏng dơi đah nău ŭch geh nău kan. Mpeh ăp siƀŭt ntơm nơh tĭng ƀư ta gưl nkuâl ri mbra tă bah gưl xã ƀư na nê̆. yor kơt nê̆, jêng ân n’hao dŏng âk công nghệ thông tin, rgâl mbrô dơh ngăch rêng ƀư, siƀŭt nchrăp n’hanh rhuăt glêh  mông nar ƀư siƀŭt rhŏ dŏng an nuĭh ƀon lan n’hanh doanh nghiệp uĕh lơn.

Tiến sĩ Nguyễn Văn Đáng, Học viện Chính trị Quốc gia Hồ Chí Minh an lah: mô ƀư n’gâng kan gưl nkuâl, nklăp 2/3 nău kan bah gưl nkuâl mbra dơi njŭr gưl tâm dâng. Nkre, gưl xã, phường mbra ntăm nău dơi kan âk lơn, jêng ăp nhih pah kan mât uănh ngih dak dăch dêh ngăch đah nuĭh ƀon lan:

He ân weh ƀư tay gay tâm pă tay nău dơi kan, nău dơn kan bah n’gâng kan gưl xã mhâm ƀư? Mpeh nău tâm ntêng lêng kan ri lĕ rngôch ăp ndơ rhŏ dŏng khlay an nuĭh ƀon lan an doanh nghiệp ri ân njŭr tâm xã, gay jêng n’gâng kan grêt dăch nău ŭch geh bah nuĭh ƀon  lan n’hanh  doanh nghiệp n’hanh ntơm bah nê rƀŏng tât di nău dơn kan dăch dêh ƀon lan, rhŏ dŏng n’hanh kơl an ƀon lan uĕh lơn rđĭl đah ntơm nơh.

Tâm rnôk lam trong kan n’gâng kan tâm dâng dôl dăp rgum tay trong trong rƀŏng glêh tam, n’hanh yach ngăch, rmôt công chức gưl xã mbra mbăk anh tay jâk nău dơn kan mhe, đah rnoh nău kan ăp nar lơn ma têh n’hanh nău ŭch geh hăr blău kan nar lơn ma âk. Nău dja n’gluh nău ŭch geh khlay ân n’hao nău dơi kan, nău blău kan n’hanh săk blău rmôt cán bộ, công chức gưl xã gay tŏng di đah nău mpŏng mpeh du n’gâng kan têh blău mhe, dăch ƀon lan n’hanh rhŏ dŏng an ƀon lan uĕh lơn. Tiến sĩ Nguyễn Đức Hà, cán bộ ơm Ban Tổ chức Trung ương, nkoch nău mĭn:

Đă cán bộ gưl xã lah grêt dăch ƀon lan, nkra na nê̆ ăp nău kan geh tât nuĭh ƀon lan. Tâl bar lah dah âk trong nchrăp, gung trong, trong kơl bah Đảng, Ngih dak rsŭn tâm dâng lĕ, ndrĭ ri cán bộ ta gưl xã ân geh âk nău blău kan, jêng lah he ƀư du nău kan yơn ân gĭt âk nău kan êng ƀa ƀă đŏng, geh kơt nê ri mơ ƀư dơi nău kan.

Gưl xã mhe ân ăp tŏng nău dơn kan dơi jao, yơn đăp mpăn krêp dêh đah ƀon lan tâm dâng. Yor kơt nê̆, wa Hoàng Văn Cường, Đại biểu Quốc hội khóa 15 dăn đă n’hao âk tâm pă gưl, tâm pă nău dơi kan an gưl xã tĭng nău way “n’gâng kan tâm dâng n’glêh an, n’gâng kan tâm dâng ƀư, n’gâng kan tâm dâng dơn nău tih di”:

He ân geh du trong ƀư nkre lah tâm pă gưl, tâm pă nău dơi kan yơn nău dơn kan ân hăn di tĭng n’glĕ nău dơi kan. N’glĕ nău dơi kan nê ân nkre đah nău dơn kan. He ân geh du trong ôp uănh, groi nđôi, uănh năl gay đăp mpăn an lah cán bộ bah dâng mô tĭng ƀư ăp nău dơn kan, nău dơi kan du trong dah rŏng. Tâm pă gưl tâm pă nău dơi kan ân tĭng jăp ăp quy định bah Ngih dak, nkre tŏng ngăch nău ŭch geh bah nuĭh ƀon lan.

Ta du mpeh êng, PGS.TS Đinh Xuân Thảo, Viện trưởng ơm Viện gŭ mĭn njêng pháp luật bah Quốc hội an lah, n’hao âk tâm pă nău dơi kan an gưl xã yơn ân geh nău buăt nthoi đah gưl n’gor n’hanh gưl xã gay đăp mpăn ăp nău kan mbluh soih, geh nău dơi tam:

Na nê̆ ta aơ lah gưl n’gor jŭr na nê̆ gưl xã n’hanh ân geh nău buăt nthoi lhăt ngăn, mbluh soih, đăp mpăn tâm rloh mbro gay gưl xã nkra dơi nău kan du trong geh nău tam ta nâm nău mât uănh, groi nđôi n’hanh ntĭm nti n’hanh ntop kơl năn ngăch bah gưl n’gor. Aơ lah nkô̆ nău dŭt n’hâm khlay gay đăp mpăn an nău ƀư tơm êng, dơn nău kan êng n’hanh wat jêh uĕh nău dơn kan mât uănh bah n’gâng kan gưl xã geh rnoh têh hvi lôch n’glăp.

Lah n’glôch jêh ta rơh mpôch dŭt tâm nchră Trung ương tâl 11, khóa XIII, Tổng Bí thư Tô Lâm hŏ lah rjăp, đah trong leo ƀư n’gâng kan mhe, gưl n’gor mbra mât nău kan ndrop, nkre lah gưl tĭng ƀư na nê̆ trong nchrăp kan, trong kơl bah Trung ương, nkre lah gưl lor nchrăp n’gluh an dŏng trong kan tâm di đah hun hao ngăn ngăn bah n’gor, nkre rđău đă na nê̆, mât uănh lĕ rngôch nău kan bah gưl xã. Tâm rnôk nê, gưl xã dơi ntrŏng lah gưl tơm khlay tĭng ƀư ăp trong kan bah Trung ương n’hanh gưl n’gor yơn mbra dơi n’hao dăng tâm pă gưl, tâm pă nău dơi kan. N’gâng kan gưl xã mbra geh nău dơi kan an n’gluh siƀŭt quy phạm pháp luật gay n’glêh an nău njêng pháp luật ta ntŭk n’hanh nkra ăp nkô̆ nău mpeh n’glĕ nău dơi bah he. Tổng Bí thư lah rjăp đŏng, n’gâng kan ta ntŭk lôch  dăp rgum ân tât dơi nău n’glêh tam kan, dăch dêh ƀon lan n’hanh tŏng nău dơi mât njrăng nău rêh mhe aƀaơ, rƀŏng tât nău hun hao ngăch, hun hao nâp dăng, rhŏ dŏng uĕh lơn nău rêh bah nuĭh ƀon lan.