Ôi ntri (5/3), ta nkual ƀon têh Đà Lạt, UBND n’gor Lâm Đồng n’hanh Công ty Rdâk ƀư dak bah dih Cục 2 trong loih Trung Quốc hŏ geh rơh pah kan gay ntrŭt ntrôl ngăch tâm boh tĭng ƀư rdâk nkra tay njăr trong loih Đà Lạt – Tháp Chàm n’hanh pơk tay ăp trong mpăr hăn dak bah dih.  

Ta rơh pah kan, ntơh măt Công ty Rdâk ƀư ndơ dak bah dih Cục 2 trong loih Trung Quốc ŭch rŏng n’gor Lâm Đồng mbơh gĭt mpeh dăp rgum geh tât trong loih Đà Lạt - Tháp Chàm, nta trong dơh gay đơn vị tât uănh, an ƀư ăp njuat hăn khlay tât ƀư wat jêh siƀŭt mbơh gŭ mĭn nău dơi gay rdâk nkra tay trong loih dja. Nkre, Công ty Rdâk ƀư ndơ dak bah dih Cục 2 trong loih Trung Quốc dăn đă n’gor Lâm Đồng an joi gĭt, tâm ôp joi trong tâm boh gay ntrŭt ntrôl ngăch an ƀư pơk hvi trong mpăr hăn dak bah dih nthoi Đà Lạt – Singapore, Đà Lạt – Siem Reap n’hanh du đêt dak Đông Bắc Á kơt Nhật, Hàn Quốc đŏng. Tĭng wa Trần Hồng Thái – Kruanh UBND n’gor Lâm Đồng, nău rdâk nkra tay trong loih Đà Lạt – Tháp Chàm tâm ban kơt pơk hvi ăp trong mpăr dŭt khlay da dê, tâm di đah ăp dăp rgum hŏ dơi uănh an ƀư.